ធនាគារ វីង និង អង្គការ WELL ចូលរួមលើកកម្ពស់យុវជនកម្ពុជាដើម្បីអនាគតមួយដែលមានភាពធន់

ការចូលរួមចំនែកក្នុងសង្គម

ធនាគារ វីង ​សហការជាមួយកម្មវិធីសិក្សា WELL Academy នៃអង្គការ WELL បានបោះជំហាន​មួយទៀត​ដើម្បីបង្កើតអនាគតដ៏ភ្លឺស្វាងមួយ​សម្រាប់យុវជនកម្ពុជា។​ «វេទិកាសុខុមាលភាពយុវជន២០២៥៖ ផ្តោតលើការកសាងភាពធន់ដើម្បីដោះស្រាយចំណោទជីវិត» បាន​បណ្តុះ​បណ្តាល​យុវជននូវបំណិនជីវិតតាមរយៈ​ការជំរុញភាពធន់ សុខុមាលភាព និងការ​កំណត់​គោលដៅ។

ភាពរឹងមាំរបស់សហគមន៍គឺអាស្រ័យទៅលើសក្តានុពលរបស់យុវជនផ្ទាល់តែម្តង ហើយ​មិនសំដៅលើ​តែ​ទេពកោសល្យ និងមហិច្ឆតារបស់​ពួកគេនោះឡើយ​ ប៉ុន្តែគឺជា​សមត្ថភាពក្នុងការប្រឈមមុខជាមួយបញ្ហាប្រកបដោយភាពជឿជាក់ ការ​ចេះសម្របខ្លួន និងសុខុមាលភាពល្អផងដែរ។ ដោយយល់ឃើញអំពីសារៈសំខាន់ទំាង​នេះហើយ​ ទើប​ធនាគារ វីង បានផ្តល់ការគាំទ្រសិក្ខាសាលាដែល​មានរយៈ​ពេល​មួយ​ថ្ងៃពេញ​កាលពីចុងសប្តាហ៍មុន ដោយ​មានយុវជនជាង ២០០នាក់ ចូលរួមរៀនសូត្រនិងដកពិសោធន៍ជាក់ស្តែងអំពី​ការ​ពង្រឹងសុខមាលភាពផ្លូវកាយ ចិត្ត ស្មារតី ទំនាក់ទំនង និងហិរញ្ញវត្ថុ ។

លោក Dymtro Kolechko អគ្គនាយកនៃធនាគារ វីង បានលើកឡើងពីសារៈសំខាន់នៃសុខុមាលភាពរបស់យុវជនក្នុងការកសាងសង្គមដែលរីកចម្រើន។​​ លោក​បានលើក​ឡើងថា៖​ “សុខភាព និងសុភមង្គលរបស់យុវជនគឺជាមូលដ្ឋានគ្រឹះនៃភាពជោគជ័យ មិនមែនសម្រាប់តែបុគ្គលម្នាក់ៗប៉ុណ្ណោះទេ ប៉ុន្តែគឺសម្រាប់សហគមន៍ទាំងមូលផងដែរ​។ នៅពេលដែលចិត្តគំនិត​របស់​យុវជន​ត្រូវបានបំពាក់​បំប៉ន​ជាមួយ​ភាពធន់ ចំណេះដឹង និងការចេះឱ្យតម្លៃលើខ្លួនឯង ពួកគេនឹងក្លាយជាកម្លាំងចលករនៅពីក្រោយការច្នៃប្រឌិតថ្មី ការ​រីក​ចម្រើន​សេដ្ឋកិច្ច និងភាពសុខដុមរមនាក្នុងសង្គម។”

វេទិកាសុខុមាលភាពយុវជនដែលបានរៀបចំកាលពីចុងសប្តាហ៍មុននេះ បានក្តោបលើ​ប្រធានបទដែលមានសារៈសំខាន់ជាច្រើនដែលជួយទៅដល់ការ​រី​ក​ចម្រើន​​ជា​លក្ខណៈ​បុគ្គល ដោយ​រួមមានដូចជា៖ ការយកឈ្នះលើបញ្ហាប្រឈមក្នុងជីវិត ការអនុវត្តការស្រលាញ់ខ្លួនឯង យូហ្គា សមាធិ និងអាហារូបត្ថម្ភ ការកសាងថាមពលវិជ្ជមាន ការគ្រប់គ្រងហិរញ្ញវត្ថុ ការប្រើប្រាស់ប្រព័ន្ធផ្សព្វផ្សាយសង្គមប្រកបដោយការទទួលខុសត្រូវ និងឱកាសអភិវឌ្ឍអាជីព ជាដើម។ តាមរយៈការលើកយកប្រធានបទទាំងនេះមកពិភាក្សា កម្មវិធីនេះបាន​ផ្តល់ឱ្យយុវជននូវវិធីសាស្រ្តដែលមានសារប្រយោជន៍​ក្នុងការកសាងជីវិតមួយ​ប្រកបដោយអត្ថន័យ និងតុល្យភាព។

លោកស្រី វិរៈ បុណ្ណារ័ត្ន នាយកប្រតិបត្តិនៃ WELL មានប្រសាសន៍ថា៖ “ការឧត្ថ​ម្ភ​​គាំទ្រនេះអនុញ្ញាតឱ្យយើងបង្កើតនូវព្រឹត្តិការណ៍មួយដែលយុវជនអាចស្វែងរកការបំផុសគំនិត ការលើកទឹកចិត្ត និងទទួលបានបទពិសោធន៍ជីវិតជាក់ស្តែងពីវាគ្មិន ដើម្បីត្រួសត្រាយជីវិតប្រកបដោយភាពជឿជាក់។ សូមអរគុណចំពោះការគាំទ្ររបស់ធនាគារ វីង ដែលអនុញ្ញាតឱ្យយើងបាននាំមកនូវក្តីសង្ឃឹម និងសុទិដ្ឋិនិយមដល់យុវជន ដោយលើកទឹកចិត្តឱ្យពួកគេមានក្តីសុបិន្ត និងរស់នៅដោយមានគោលបំណង”។

នេះមិនមែនជាកិច្ចសហការជាលើកទីមួយដែល​ស្ថាប័ន​ទាំងពីរ​បានធ្វើរួមគ្នា​នោះទេ។ ចាប់តាំងពីខែកញ្ញាឆ្នាំមុនមក ធនាគារ វីង ក៏បានផ្តល់ការគាំទ្រដល់ WELL Academy សម្រាប់កម្មវិធីបណ្តុះបណ្តាលដែលរៀបចំឡើងសម្រាប់ម្ចាស់អាជីវកម្មខ្នាតមីក្រូ ធុនតូច មធ្យម និងធុរកិច្ចថ្មី។ កម្មវិធីទាំងនេះផ្តោតទៅលើប្រធានបទសំខាន់ៗដូចជា៖ ការអភិវឌ្ឍអាជីវកម្ម ចំណេះដឹងផ្នែកហិរញ្ញវត្ថុ ការការពារសុខភាព និយោជិតនិងសុខុមាលភាពអតិថិជន គណនេយ្យភាព ជំនាញឌីជីថល និងការ​ធ្វើ​ទីផ្សារអនឡាញជាដើម​។ តាមរយៈការឧបត្ថម្ភ​គាំទ្រដែលមាន​ជាបន្ត​បន្ទាប់​នេះ ធនាគារ វីង មិនត្រឹមតែចូល​រួម​លើកកម្ពស់យុវជនប៉ុណ្ណោះទេ ថែមទាំងពង្រឹងសហគ្រិនភាព ដោយធានាថាអាជីវកម្ម និងសហគមន៍អាច​រីកចម្រើនជាមួយគ្នា៕​