ឧបសម្ព័ន្ធ ច៖ ផលិតផល និងសេវាកម្មផ្សេងទៀត
កិច្ចព្រមព្រៀងអតិថជនស្តីពីលិខិតធានា ឬលិខិតឥណទានបម្រុង
ប្រការ ១៖ លិខិតធានា និងលិខិតឥណទានបម្រុង
១.១ លិខិតធានា (Bank Guarantee – BG) សំដៅដល់ផលិតផលហិរញ្ញវត្ថុពាណិជ្ជកម្មមួយប្រភេទដែលផ្តល់ដោយធនាគារ សម្រាប់ជាការធានាជាលាយលក្ខណ៍អក្សរថានឹងបង់ប្រាក់ចំនួនជាក់លាក់ណាមួយទៅឲ្យអ្នកទទួលផល ប្រសិនបើលោកអ្នកបរាជ័យក្នុងការបំពេញកាតព្វកិច្ចតាមកិច្ចសន្យា។
១.២ លិខិតឥណទានបម្រុង (Standby Letter of Credit – SBLC) សំដៅដល់ផលិតផលហិរញ្ញវត្ថុពាណិជ្ជកម្មមួយប្រភេទ ដែលផ្តល់ដោយធនាគារ សម្រាប់ជាការធានាថា នឹងមានការបង់ប្រាក់ប្រសិនបើលោកអ្នកមានកំហុស។
១.៣ លោកអ្នកយល់ព្រមប្រើប្រាស់លិខិតធានា និងលិខិតឥណទានបម្រុង ដែលផ្តល់ជូនដោយធនាគារ និងគោរពតាមកិច្ចព្រមព្រៀងអតិថិជនស្តីពីលិខិតធានា និងលិខិតឥណទានបម្រុង។
ប្រការ ២៖ ការចេញលិខិតធានា និងលិខិតឥណទានបម្រុង
២.១ លោកអ្នកត្រូវដាក់សំណើជាលាយលក្ខណ៍អក្សរផ្លូវការ ដោយប្រើសំណុំបែបបទស្នើសុំរបស់ធនាគារ ដែលរួមមាន៖
(១) ព័ត៌មានលម្អិតទាំងស្រុងអំពីអ្នកទទួលផល។
(២) គោលបំណង និងលក្ខណៈនៃប្រតិបត្តិការ។ និង
(៣) ចំនួនទឹកប្រាក់ដែលស្នើសុំ រូបិយប័ណ្ណ និងរយៈពេលមានសុពលភាព។
២.២ ធនាគារអាចចេញលិខិតធានា ឬលិខិតឥណទានបម្រុង បន្ទាប់ពីទទួលបានសំណុំបែបបទស្នើសុំដែលបានបំពេញត្រឹមត្រូវ និងឯកសារគាំទ្រដែលទាក់ទង។ ការចេញនឹងអនុវត្តតាមការវាយតម្លៃឥណទានផ្ទៃក្នុង និងដំណើរការអនុម័តរបស់ធនាគារ។
២.៣ ការចេញត្រូវគោរពតាមច្បាប់ជាតិ និងអន្តរជាតិដែលអាចអនុវត្តបាន រួមទាំងបទប្បញ្ញត្តិពាក់ព័ន្ធនឹងការពិន័យផងដែរ។ ធនាគារអាចបដិសេធការចេញលិខិតធានា ឬលិខិតឥណទានបម្រុង ប្រសិនបើប្រតិបត្តិការនោះពាក់ព័ន្ធនឹងយុត្តាធិការ ឬភាគីដែលត្រូវបានរឹតបន្តឹង។
២.៤ ធនាគារអាចបដិសេធការចេញលិខិតធានា ឬលិខិតឥណទានបម្រុង ដោយឆន្ទានុសិទ្ធិរបស់ខ្លួន ទោះបីជាបន្ទាប់ពីបានទទួលសំណុំបែបបទស្នើសុំ និងទ្រព្យធានាពេញលេញហើយក៏ដោយ។
ប្រការ ៣៖ ថ្លៃសេវា
៣.១ លោកអ្នកយល់ព្រមបង់ថ្លៃសេវា កម្រៃជើងសារ និងកម្រៃផ្សេងៗទាំងអស់ដែលបានកំណត់ដោយធនាគារ សម្រាប់ការចេញ ការកែប្រែ ការលុបចោល និងការគ្រប់គ្រងលិខិតធានា ឬលិខិតឥណទានបម្រុង។ កម្រៃទាំងនេះរួមមានថ្លៃសេវាចេញលិខិត ថ្លៃសេវាកែប្រែ ថ្លៃឯកសារ និងសេវាផ្លូវច្បាប់ កម្រៃធនាគារអន្តរការី ពន្ធដែលតម្រូវ និងការចំណាយផ្សេងៗ។
៣.២ លោកអ្នកអនុញ្ញាតឲ្យធនាគារកាត់ថ្លៃសេវា កម្រៃផ្សេងៗ ឬការទូទាត់ក្រោមលិខិតធានា ឬលិខិតឥណទានបម្រុង ដោយផ្ទាល់ពីប្រាក់ក្នុងគណនីប្រាក់បញ្ញើ ឬគណនីសន្សំដែលបានភ្ជាប់ជាមួយលិខិតធានា ឬលិខិតឥណទានបម្រុង។ ប្រសិនបើគណនីនោះមិនមានទឹកប្រាក់គ្រប់គ្រាន់ លោកអ្នកយល់ព្រមឲ្យធនាគារកាត់ប្រាក់ដែលត្រូវបង់នោះពីគណនីផ្សេងទៀតដែលលោកអ្នកមាននៅធនាគារ ដោយមិនចាំបាច់មានការយល់ព្រមបន្ថែមពីលោកអ្នកទៀតឡើយ។
៣.៣ ថ្លៃសេវា និងកម្រៃផ្សេងៗទាំងអស់ដែលបានបង់រួច មិនអាចដកវិញបានទេ ទោះបីជាលិខិតធានា ឬលិខិតឥណទានបម្រុងមិនត្រូវបានប្រើប្រាស់ក៏ដោយ ហើយត្រូវបង់ជាមុន ឬតាមការយល់ព្រមផ្សេងទៀតប្រសិនបើមាន។
ប្រការ ៤៖ កាតព្វកិច្ចរបស់លោកអ្នក
៤.១ លោកអ្នកត្រូវសងប្រាក់ឲ្យធនាគារសម្រាប់ការទូទាត់ណាមួយក្រោមលិខិតធានា ឬលិខិតឥណទានបម្រុងភ្លាមៗនៅពេលមានការទាមទារ។ ប្រសិនបើកាតព្វកិច្ចទូទាត់មិនត្រូវបានបំពេញ នោះការទូទាត់ដែលនៅជំពាក់ទាំងអស់នឹងត្រូវដល់កំណត់សងភ្លាមៗ ហើយអាចត្រូវប្រើប្រាស់វិធានការពាក់ព័ន្ធនឹងទ្រព្យធានា ឬវិធានការអនុលោមភាពបន្ថែមទៀត។ ក្នុងករណីក្ស័យធន វិធានតុលាការ ឬព្រឹត្តិការណ៍ស្រដៀងគ្នា បំណុលទាំងអស់នឹងត្រូវដល់កំណត់សងភ្លាមៗផងដែរ។
៤.២ លោកអ្នកយល់ព្រម និងត្រូវបង់ថ្លៃសេវា កម្រៃផ្សេងៗ និងកម្រៃជើងសារទាំងអស់ ស្របតាមកាលវិភាគដែលបានកំណត់ដោយធនាគារ។
៤.៣ លោកអ្នកត្រូវផ្តល់ និងរក្សាទុកទ្រព្យធានា ដូចដែលបានតម្រូវដោយធនាគារ។ ធនាគារអាចទាមទារទ្រព្យធានាបន្ថែមគ្រប់ពេល ដោយផ្អែកលើការផ្លាស់ប្តូរនៃស្ថានភាពហិរញ្ញវត្ថុ ឬប្រវត្តិហានិភ័យរបស់លោកអ្នក។
៤.៤ លោកអ្នកត្រូវធានាថា ប្រតិបត្តិការទាំងអស់ដែលទាក់ទងនឹងលិខិតធានា ឬលិខិតឥណទានបម្រុង ត្រូវអនុលោមតាមច្បាប់ បទបញ្ជា និងបទប្បញ្ញត្តិពិន័យដែលមានជាធរមាន រួមទាំងច្បាប់ប្រឆាំងនឹងការសម្អាតប្រាក់ (AML) និងការប្រយុទ្ធប្រឆាំងហិរញ្ញប្បទានភេរវកម្ម (CFT)។
៤.៥ លោកអ្នកត្រូវជូនដំណឹងមកធនាគារឲ្យបានទាន់ពេលវេលា អំពីការផ្លាស់ប្តូរសំខាន់ៗនៃស្ថានភាពហិរញ្ញវត្ថុ ស្ថានភាពផ្លូវច្បាប់ ឬព្រឹត្តិការណ៍ណាមួយដែលអាចប៉ះពាល់ដល់សមត្ថភាពក្នុងការបំពេញកាតព្វកិច្ចក្រោមកិច្ចព្រមព្រៀងអតិថិជនស្តីពីលិខិតធានា និងលិខិតឥណទានបម្រុងនេះ។
៤.៦ លោកអ្នកធានាថា ព័ត៌មានទាំងអស់ដែលបានផ្តល់ឲ្យធនាគារទាក់ទងនឹងលិខិតធានា ឬលិខិតឥណទានបម្រុង គឺពិតប្រាកដ ពេញលេញ និងត្រឹមត្រូវ។ ការបង្ហាញព័ត៌មានមិនពិតណាមួយអាចបណ្តាលឲ្យមានការបញ្ចប់ភ្លាមៗនៃកាតព្វកិច្ចរបស់ធនាគារ។
ប្រការ ៥៖ សំណងការខូចខាត
លោកអ្នកត្រូវទទួលខុសត្រូវ និងផ្តល់សំណងឲ្យធនាគារ និងការពារធនាគារពីផលប៉ះពាល់ដែលកើតចេញពីសកម្មភាពទាំងអស់ (ផ្លូវច្បាប់ ឬក្រៅពីនេះ) ការបាត់បង់ ការខូចខាត បណ្តឹង ការចំណាយ ការទាមទារ និងកាតព្វកិច្ចគ្រប់ប្រភេទ ដែលធនាគារអាចជួបប្រទះ ឬរងផលប៉ះពាល់ ដោយសារការចេញលិខិតធានា ឬលិខិតឥណទានបម្រុងតាមសំណើរបស់លោកអ្នក រួមមាន សោហ៊ុយ កម្រៃផ្សេងៗ ការចំណាយ និងកាតព្វកិច្ចគ្រប់ប្រភេទ ដែលធនាគារអាចទទួលរង ឬទទួលខុសត្រូវ ឬ ពាក់ព័ន្ធនឹងការទាមទារណាមួយដែលទាក់ទងនឹងការអនុវត្ត ឬការប៉ុនប៉ងអនុវត្តលិខិតធានា ឬលិខិតឥណទានបម្រុង ដោយភាគីណាមួយ មិនថាការពារនោះត្រឹមត្រូវ ឬមិនត្រឹមត្រូវក៏ដោយ។ ក្នុងករណីមានអ្នកស្នើសុំច្រើននាក់ (លោកអ្នក) នោះកាតព្វកិច្ចទាំងអស់នឹងជាកាតព្វកិច្ចរួម និងដោយផ្ទាល់។
ប្រការ ៦៖ សិទ្ធិ និងការសម្រេចរបស់ធនាគារ
៦.១ ធនាគាររក្សាសិទ្ធិពេញលេញក្នុងការទទួល ឬបដិសេធសំណុំបែបបទស្នើសុំលិខិតធានា ឬលិខិតឥណទានបម្រុងដោយផ្អែកលើការសម្រេចចិត្តផ្ទាល់របស់ខ្លួន។
៦.២ ធនាគារមានសិទ្ធិផ្តាច់មុខក្នុងការកំណត់ពាក្យប្រើប្រាស់ រចនាសម្ព័ន្ធ និងទម្រង់នៃលិខិតធានា ឬលិខិតឥណទានបម្រុង។ ធនាគារអាចបដិសេធការចេញឯកសារដែលមានលក្ខខណ្ឌមិនច្បាស់លាស់ មិនអាចអនុវត្តបាន ឬមិនស្របតាមស្តង់ដារអន្តរជាតិ (ឧ. UCP 600, ISP98, URDG 758)។
៦.៣ ធនាគារអាចទាមទារឲ្យលោកអ្នកផ្តល់ទ្រព្យធានា ដូចជា ប្រាក់បម្រុង ប្រាក់បញ្ញើមានកាលកំណត់ ទ្រព្យបញ្ចាំ ឬលិខិតធានាពីតតិយជន ឬទ្រព្យធានាផ្សេងទៀត ក្នុងប្រភេទ និងចំនួនដែលធនាគារយល់ឃើញថាសមស្រប។ ធនាគារអាចទាមទារទ្រព្យធានាបន្ថែមគ្រប់ពេល ប្រសិនបើស្ថានភាពហិរញ្ញវត្ថុ ឬប្រវត្តិហានិភ័យរបស់លោកអ្នកមានការផ្លាស់ប្តូរ។ ប្រភេទ និងចំនួនទ្រព្យធានានឹងត្រូវកំណត់ដោយការសម្រេចផ្តាច់មុខរបស់ធនាគារ ដោយផ្អែកលើទំហំប្រតិបត្តិការ និងបរិបទនៃប្រតិបត្តិការនោះ។
៦.៤ ធនាគារមិនមានកាតព្វកិច្ចក្នុងការយល់ព្រមលើសំណើសុំកែប្រែ បន្ថែមរយៈពេល ឬការចេញលិខិតធានា ឬលិខិតឥណទានបម្រុងជាថ្មីឡើយ។ សំណើនីមួយៗនឹងត្រូវបានវាយតម្លៃឡើងវិញ និងអាចមានថ្លៃសេវាបន្ថែម ឬត្រូវការឯកសារថ្មី។
៦.៥ កាតព្វកិច្ចរបស់ធនាគារនៅក្នុងការទទួលខុសត្រូវក្រោមលិខិតធានា ឬលិខិតឥណទានបម្រុង ត្រូវបានកម្រិតត្រឹមតែលក្ខខណ្ឌដែលមាននៅក្នុងលិខិតនោះប៉ុណ្ណោះ។ ធនាគារមិនតម្រូវឲ្យត្រួតពិនិត្យប្រតិបត្តិការ ឬផ្ទៀងផ្ទាត់ភាពត្រឹមត្រូវនៃការទាមទាររបស់អ្នកទទួលប្រាក់ឡើយ ប្រសិនបើឯកសារដែលបានដាក់ស្នើគោរពតាមលក្ខខណ្ឌដែលបានកំណត់។
៦.៦ ប្រសិនបើធនាគារបានធ្វើការទូទាត់ក្រោមលិខិតធានា ឬលិខិតឥណទានបម្រុង នោះធនាគារមានសិទ្ធិទាមទារប្រាក់ទាំងអស់នោះមកវិញពីលោកអ្នកភ្លាមៗ រួមទាំងការប្រាក់ ថ្លៃសេវា និងថ្លៃសេវាផ្លូវច្បាប់ដែលពាក់ព័ន្ធ។
៦.៧ ធនាគាររក្សាសិទ្ធិក្នុងការកែប្រែគោលនយោបាយផ្ទៃក្នុង តារាងថ្លៃសេវា និងនីតិវិធីប្រតិបត្តិគ្រប់ពេល ដោយគោរពតាមច្បាប់ និងបទប្បញ្ញត្តិជាធរមាន។
ប្រការ ៧៖ វិធានគ្រប់គ្រង
៧.១ ការចេញ ការប្រតិបត្តិ និងការអនុវត្តលិខិតធានា និងលិខិតឥណទានបម្រុង នឹងត្រូវបានគ្រប់គ្រងដោយវិធានអន្តរជាតិដែលទទួលស្គាល់ រួមមានដូចខាងក្រោម៖
(១) លិខិតឥណទានបម្រុងគ្រប់គ្រងដោយបទបញ្ជា Uniform Customs and Practice for Documentary Credits (UCP 600) ឬ ISP98 ដែលមានជាធរមាន។
(២) លិខិតធានាគ្រប់គ្រងដោយច្បាប់ជាតិ និង Uniform Rules for Demand Guarantees (URDG 758) ដែលតម្រូវឲ្យអនុវត្ត។
៧.២ ធនាគាររក្សាសិទ្ធិក្នុងការកំណត់ថា វិធានណាមួយ (UCP 600, ISP98, URDG 758) នឹងអនុវត្តចំពោះឯកសារនីមួយៗ ដោយផ្អែកលើលក្ខណៈនៃប្រតិបត្តិការ និងការសម្រេចរបស់ភាគីពាក់ព័ន្ធ។
៧.៣ ប្រសិនបើវិធានដែលគ្រប់គ្រង (ឧ. UCP, ISP, URDG) ត្រូវបានកែប្រែ ឬធ្វើបច្ចុប្បន្នភាពក្នុងអំឡុងពេលសុពលភាពនៃ BG/SBLC វិធានដែលបានបញ្ជាក់នៅពេលចេញលិខិតធានា និងលិខិតឥណទានបម្រុង នឹងត្រូវអនុវត្តបន្ត លើកលែងតែមានការយល់ព្រមជាលាយលក្ខណ៍អក្សរផ្សេងទៀត។
៧.៤ ក្នុងករណីមានភាពខុសគ្នារវាងខចែងនិងលក្ខខណ្ឌនៅក្នុងកិច្ចព្រមព្រៀងនេះ និងវិធានអន្តរជាតិដូចដែលបានរៀបរាប់ខាងលើ វិធានអន្តរជាតិទាំងនោះនឹងត្រូវចាត់ទុកថាអសុពលភាពត្រឹមតែផ្នែកដែលមានភាពខុសគ្នានោះ។
ប្រការ ៨៖ លក្ខខណ្ឌនៃការទាមទារ និងការទូទាត់
៨.១ លិខិតធានា និងលិខិតឥណទានបម្រុង នឹងអាចទូទាត់បាននៅពេលមានការដាក់ស្នើ៖
(១) សំណើទាមទារជាលាយលក្ខណ៍អក្សរពីអ្នកទទួលផល ដែលបញ្ជាក់ថាលោកអ្នកបានបរាជ័យក្នុងការបំពេញកាតព្វកិច្ចរបស់ខ្លួន។ និង
(២) ឯកសារផ្សេងទៀតដែលបានកំណត់យ៉ាងច្បាស់នៅក្នុងលិខិតធានា ឬលិខិតឥណទានបម្រុង (ឧ. វិក័យប័ត្រ លិខិតបញ្ជាក់អំពីការមិនបានបំពេញកាតព្វកិច្ចជាដើម)។
៨.២ សំណើទាមទារត្រូវដាក់ស្នើនៅការិយាល័យដែលបានកំណត់របស់ធនាគារ ឬតាមវិធីសាស្ត្រដែលបានបញ្ជាក់ក្នុងលិខិត (ឧទាហរណ៍ SWIFT ឬអ្នកបញ្ជូន)។ សំណើនោះត្រូវតែទទួលបានមុន ឬនៅថ្ងៃផុតកំណត់នៃ លិខិតធានា ឬលិខិតឥណទានបម្រុង។
៨.៣ លោកអ្នកយល់ព្រមថាសំណើ ឬការទាមទារណាមួយ ដែលបានដាក់ស្នើជាមួយធនាគារ ឬធនាគារអន្តរការី ដោយអ្នកទទួលផលនៃលិខិតធានា ឬលិខិតឥណទានបម្រុង ឬដោយធនាគារអន្តរការី ក្រោមការធានា នឹងត្រូវចាត់ទុកជាភស្តុតាងច្បាស់លាស់នៃចំនួនប្រាក់ដែលត្រូវបង់។ សំណើ ឬការទាមទារនេះនឹងត្រូវចាត់ទុកថាជាការបញ្ជាក់សិទ្ធិគ្រប់គ្រាន់សម្រាប់ឲ្យធនាគារ ឬធនាគារអន្តរការីធ្វើការទូទាត់ ដោយមិនចាំបាច់មានភស្តុតាងបន្ថែម ឬការផ្ទៀងផ្ទាត់សុពលភាពនៃចំនួនប្រាក់នោះ។ ធនាគារ ឬដៃគូធនាគារមិនមានកាតព្វកិច្ចក្នុងការជូនដំណឹង ឬស្នើសុំការផ្តល់សិទ្ធិបន្ថែមពីលោកអ្នកឡើយ។ លោកអ្នកយល់ព្រមមិនបដិសេធសុពលភាពនៃសំណើ ឬការទាមទារណាមួយនោះឡើយ។
៨.៤ លោកអ្នកក៏យល់ព្រមមិនសួរនាំ ឬតវ៉ាលើសុពលភាព ឬភាពស្របច្បាប់នៃការទូទាត់ណាមួយដែលធ្វើឡើងដោយធនាគារ ឬធនាគារអន្តរការីផងដែរ។ លោកអ្នកនឹងមិនបដិសេធកាតព្វកិច្ចដោយផ្អែកលើមូលហេតុថាការទូទាត់នោះ ឬផ្នែកណាមួយនៃការទូទាត់នោះ មិនមែនជាកាតព្វកិច្ចរបស់ធនាគារ ឬធនាគារអន្តរការីទេ ឬមានការពារសមហេតុផល ឬមូលហេតុសមហេតុផលក្នុងការបដិសេធការទូទាត់ក្រោមលិខិតធានា ឬលិខិតឥណទានបម្រុង ឬដោយមូលហេតុផ្សេងទៀតណាមួយក៏ដោយ។
៨.៥ នៅពេលការទូទាត់ត្រូវបានអនុវត្តតាមលក្ខខណ្ឌនៃលិខិតធានា ឬលិខិតឥណទានបម្រុង លោកអ្នកយល់ព្រមថាកាតព្វកិច្ចរបស់ធនាគារត្រូវបានបញ្ចប់។
ប្រការ ៩៖ ប្រាតិភោគ និងការផ្តល់សិទ្ធិលើគណនី
៩.១ លោកអ្នកយល់ព្រមបញ្ចាំឯកសារ និងទំនិញទាំងអស់ដែលទទួលបានក្រោម ឬពាក់ព័ន្ធនឹងលិខិតធានា ឬលិខិតឥណទានបម្រុង ជាប្រាតិភោគ សម្រាប់កាតព្វកិច្ចបច្ចុប្បន្ន ឬអនាគតដែលលោកអ្នកជំពាក់ធនាគារ។ ធនាគារមានសិទ្ធិកាន់កាប់ ប្រើប្រាស់ ឬទូទាត់ទ្រព្យទាំងនេះដើម្បីសងកាតព្វកិច្ចទាំងអស់ និងអាចអនុវត្តវិធានការបន្ថែមដើម្បីធានាកាតព្វកិច្ច ប្រសិនបើយល់ថាសមស្រប។ ការចាត់ចែងនេះនឹងនៅមានសុពលភាព ទោះបីឯកសារ ឬទំនិញត្រូវបានជំនួស ឬផ្ទេរចេញ ដើម្បីធានាការការពារបំណុលទាំងមូល។
៩.២ លោកអ្នកទទួលស្គាល់សិទ្ធិរបស់ធនាគារនៅក្នុងការកាន់កាប់ និងចាត់ចែងឯកសារ និងទំនិញដែលជាប្រាតិភោគសម្រាប់ធានាបំណុល ឬកាតព្វកិច្ចណាមួយដែលលោកអ្នកជំពាក់ក្រោមលិខិតធានា ឬលិខិតឥណទានបម្រុងនេះ ឬកាតព្វកិច្ចផ្សេងទៀត។ ក្នុងករណីដែលមានកំហុស ឬការបំពានណាមួយ ធនាគារអាចលក់ ផ្ទេរ ឬចាត់ចែងទំនិញទាំងនេះដោយមិនចាំបាច់ជូនដំណឹង ដោយប្រើប្រាស់ប្រាក់ដែលទទួលបានដើម្បីសងបំណុលរហូតដល់គ្រប់ចំនួន។ ប្រាតិភោគ និងផលដែលបានមកពីប្រាតិភោគទាំងនេះនឹងត្រូវរក្សាទុកជាប្រយោជន៍របស់ធនាគាររហូតដល់កាតព្វកិច្ចទាំងអស់ត្រូវបានសង។
៩.៣ លោកអ្នកយល់ព្រមធានាទំនិញដែលទាក់ទងនឹងប្រតិបត្តិការនេះ ជាមួយក្រុមហ៊ុនធានារ៉ាប់រងដែលត្រូវបានទទួលស្គាល់ ដោយកំណត់ការផ្ទេរធានារ៉ាប់រងនោះទៅឲ្យធនាគារ ឬបញ្ជាក់ឈ្មោះធនាគារជាអ្នកទទួលប្រាក់សំណង។ ការទូទាត់ធានារ៉ាប់រងណាមួយដែលលោកអ្នកទទួលបាន ត្រូវផ្ញើទៅឲ្យធនាគារភ្លាមៗ ហើយរក្សាទុកជាសិទ្ធិរបស់ធនាគាររហូតដល់កាតព្វកិច្ចក្រោមលិខិតធានា ឬលិខិតឥណទានបម្រុងនេះ ត្រូវបានសងទាំងស្រុង។
៩.៤ លោកអ្នកយល់ព្រមឲ្យធនាគារទូទាត់ប្រាក់ក្នុងគណនីចរន្ត ឬគណនីផ្សេងទៀតរបស់លោកអ្នកដែលមាននៅធនាគារ ឬប្រាតិភោគផ្សេងទៀតដែលបានផ្តល់ឲ្យធនាគារ មិនថាទ្រព្យធានានោះជាប្រាក់បម្រុង ឬប្រាក់បញ្ញើមានកាលកំណត់ ដើម្បីអនុញ្ញាតឲ្យធនាគារទទួលខុសត្រូវចំពោះការទាមទារណាមួយក្រោមលិខិតធានា ឬលិខិតឥណទានបម្រុង។
៩.៥ នៅពេលដែលធនាគារទាមទារ លោកអ្នកត្រូវដាក់ប្រាក់បម្រុងជាមួយធនាគារភ្លាមៗ ដើម្បីរ៉ាប់រងកាតព្វកិច្ចរបស់ធនាគារក្រោមលិខិតធានា ឬលិខិតឥណទានបម្រុង។
៩.៦ លោកអ្នកយល់ព្រមឲ្យធនាគារកាត់ប្រាក់ពីគណនីចរន្ត ឬគណនីផ្សេងទៀត ដើម្បីទូទាត់សម្រាប់ការទាមទារណាមួយដែលបានធ្វើចំពោះធនាគារ ក្រោមលិខិតធានា ឬលិខិតឥណទានបម្រុង ដោយមិនចាំបាច់ជូនដំណឹងជាមុនទៅកាន់លោកអ្នក។
៩.៧ ធនាគារមានសិទ្ធិពេញលេញក្នុងការបម្លែងប្រាក់ទៅជាប្រាក់រៀល (KHR) ឬដុល្លារអាមេរិក (USD) ដែលមានតម្លៃសមមូលសម្រាប់ការទូទាត់សងការទាមទារទំាងអស់ដែលចេញដោយធនាគារ ជារូបិយប័ណ្ណបរទេសនៅក្រោមលិខិតធានា ឬលិខិតឥណទានបម្រុង ដោយផ្អែកលើអត្រាប្តូរប្រាក់បច្ចុប្បន្នរបស់ធនាគារ។
ប្រការ ១០៖ សុពលភាព និងការបញ្ចប់
១០.១ លិខិតធានា ឬលិខិតឥណទានបម្រុង នឹងមានសុពលភាពចាប់ពីថ្ងៃចេញ ឬដូចដែលបានបញ្ជាក់នៅក្នុងឯកសារ ហើយនឹងនៅមានសុពលភាពរហូតដល់ថ្ងៃផុតកំណត់ដែលបានបញ្ជាក់។ ប្រសិនបើឯកសារនោះមានវិធានបន្ថែមសុពលភាពដោយស្វ័យប្រវត្តិ វានឹងបន្តសុពលភាពជាបន្តបន្ទាប់ លើកលែងតែធនាគារជូនដំណឹងទៅអ្នកទទួលប្រាក់ អំពីការមិនបន្តសុពលភាពក្នុងរយៈពេលជូនដំណឹងដែលបានកំណត់។
១០.២ ការបញ្ចប់មុនអាចកើតឡើងក្នុងករណីដូចខាងក្រោម៖ (i) នៅពេលមានការបង្វិលត្រឡប់លិខិតច្បាប់ដើមមកធនាគារ (ii) នៅពេលទទួលបានការបញ្ជាក់ជាលាយលក្ខណ៍អក្សរពីអ្នកទទួលផលថាមិនត្រូវការលិខិតនោះទៀតទេ ឬទទួលបានលិខិតបញ្ជាក់ពីអ្នកទទួលផលដែលបញ្ជាក់ពីការបញ្ចប់កាតព្វកិច្ចរបស់ធនាគារក្រោមលិខិតធានា ឬលិខិតឥណទានបម្រុង ឬ (iii) តាមការព្រមព្រៀងជាលាយលក្ខណ៍អក្សររបស់ភាគីទាំងអស់។ ធនាគារក៏រក្សាសិទ្ធិក្នុងការផ្អាក ឬបញ្ចប់កាតព្វកិច្ចរបស់ខ្លួនក្នុងករណីមានការឆបោក ការបំពានកិច្ចព្រមព្រៀង ឬការហាមឃាត់ដោយបទប្បញ្ញត្តិច្បាប់។
១០.៣ ការបញ្ចប់នឹងមិនប៉ះពាល់ដល់កាតព្វកិច្ចបន្តរបស់លោកអ្នកក្នុងការសង និងទទួលខុសត្រូវចំពោះធនាគារលើការទូទាត់ ឬកាតព្វកិច្ចណាមួយដែលបានកើតឡើងមុនពេលបញ្ចប់នោះឡើយ។
១០.៤ ក្នុងករណីមានព្រឹត្តិការណ៍ប្រធានសក្តិ កាតព្វកិច្ចរបស់ធនាគារអាចត្រូវផ្អាក ប៉ុន្តែរយៈពេលសុពលភាពនៃ លិខិតធានា ឬលិខិតឥណទានបម្រុងនឹងមិនត្រូវបានពន្យារឡើយ លើកលែងតែមានការបញ្ជាក់ច្បាស់លាស់ណាមួយ។
១០.៥ ក្នុងករណីដែលសុពលភាពនៃលិខិតធានា ឬលិខិតឥណទានបម្រុង បានចាប់ផ្តើមមុនថ្ងៃស្នើសុំ លោកអ្នកធានាអះអាងជូនធនាគារថា លោកអ្នកមិនបានបំពានលើលក្ខខណ្ឌនៃកិច្ចសន្យាណាមួយដែលបានធ្វើជាមួយអ្នកទទួលផលមុនថ្ងៃស្នើសុំឡើយ។ លោកអ្នកក៏យល់ព្រមទទួលខុសត្រូវជំនួស និងការពារធនាគារមិនរងផលប៉ះពាល់ពីការទាមទារ ការខូចខាត ឬការបាត់បង់ណាមួយដែលកើតឡើងពីការបំពានលើការធានាអះអាងនេះ។ ការបង្ហាញព័ត៌មានមិនត្រឹមត្រូវ ឬការបំពានលើប្រការនេះ នឹងផ្តល់សិទ្ធិឲ្យធនាគារបញ្ចប់លិខិតធានា ឬលិខិតឥណទានបម្រុង និងទាមទារការសងប្រាក់សម្រាប់ចំនួនដែលបានទូទាត់ក្រោមការធានា។
ប្រការ ១១៖ ការកែប្រែ និងការលុបចោល
១១.១ ការកែប្រែ ឬការលុបចោលលិខិតធានា ឬលិខិតឥណទានបម្រុង ត្រូវការការយល់ព្រមជាលាយលក្ខណ៍អក្សរពីភាគីទាំងអស់ដែលពាក់ព័ន្ធ រួមទាំងអ្នកទទួលផលផងដែរ។
១១.២ ធនាគាររក្សាសិទ្ធិក្នុងការបដិសេធសំណើសុំកែប្រែ ឬលុបចោលណាមួយដោយ ផ្អែកតាមឆន្ទានុសិទ្ធិរបស់ខ្លួន។
១១.៣ ធនាគារនឹងបន្តរក្សាទ្រព្យធានាទាំងអស់ដែលបានដាក់ជាទ្រព្យធានាសម្រាប់លិខិតធានា ឬលិខិតឥណទានបម្រុង រហូតដល់លិខិតធានា ឬលិខិតឥណទានបម្រុងច្បាប់ដើមត្រូវបានបង្វិលទៅធនាគារដើម្បីលុបចោល ឬទទួលបានលិខិតពីអ្នកទទួលផលដែលបញ្ជាក់ពីការបញ្ចប់កាតព្វកិច្ចរបស់ធនាគារក្រោមលិខិតធានា ឬលិខិតឥណទានបម្រុងនោះ។
១១.៤ សម្រាប់លិខិតធានា ឬលិខិតឥណទានបម្រុង ដែលបានចេញដោយមានថ្ងៃផុតកំណត់បើកចំហ និង/ឬគ្មានវិធានសម្រាប់រយៈពេលទាមទារ លោកអ្នកសន្យាថានឹងបង់កម្រៃជើងសារសម្រាប់លិខិតធានា ឬលិខិតឥណទានបម្រុង ចាប់ពីថ្ងៃមានសុពលភាពរហូតដល់លិខិតធានា ឬលិខិតឥណទានបម្រុងត្រូវបានលុបចោល។ លោកអ្នកអនុញ្ញាតឲ្យធនាគារកាត់ប្រាក់ពីគណនីចរន្ត ឬគណនីផ្សេងទៀតសម្រាប់កម្រៃជើងសារដែលទាក់ទងនឹងការចេញលិខិតធានា ឬលិខិតឥណទានបម្រុង។
ប្រការ ១១៖ ការប្រាក់
ក្នុងករណីដែលធនាគារធ្វើការទូទាត់ក្រោមលិខិតធានា ឬលិខិតឥណទានបម្រុង លោកអ្នកត្រូវទូទាត់សងប្រាក់ឲ្យធនាគារភ្លាមៗនៅពេលមានការទាមទារ។ ប្រសិនបើមិនបានសងតាមកាលកំណត់ ធនាគារមានសិទ្ធិក្នុងការគិតការប្រាក់លើចំនួនប្រាក់ដែលនៅជំពាក់ ដោយផ្អែកលើអត្រាដែលបានយល់ព្រមជាលាយលក្ខណ៍អក្សរ ឬបើមិនបានបញ្ជាក់ អត្រានឹងអនុវត្តតាមអត្រាខ្ចីប្រាក់បច្ចុប្បន្នរបស់ធនាគារ។ ការប្រាក់នឹងចាប់ផ្តើមគិតចាប់ពីថ្ងៃដល់កំណត់សងរហូតដល់ការសងត្រូវបានទូទាត់ទាំងស្រុង ហើយអាចគិតបន្ថែមរៀងរាល់ខែតាមគោលនយោបាយរបស់ធនាគារ និងច្បាប់ជាធរមានរបស់ព្រះរាជាណាចក្រកម្ពុជា។
កិច្ចព្រមព្រៀងអតិថជនស្តីពីលិខិតឥណទាន
ប្រការ ១៖ លិខិតឥណទាន
១.១ លិខិតឥណទាន (Letter of Credit – LC) សំដៅដល់ឧបករណ៍ហិរញ្ញវត្ថុពាណិជ្ជកម្មមួយប្រភេទ ដែលចេញដោយធនាគារតាមសំណើរបស់លោកអ្នក ដើម្បីធានាការទូទាត់ទៅឲ្យអ្នកទទួលផល នៅពេលមានការដាក់ស្នើឯកសារដែលអនុលោមតាមលក្ខខណ្ឌតម្រូវ ដែលបញ្ជាក់ពីការដឹកជញ្ជូន ឬការអនុវត្តកាតព្វកិច្ចក្រោមកិច្ចសន្យាពាណិជ្ជកម្ម។
១.២ លោកអ្នកយល់ព្រមប្រើប្រាស់លិខិតឥណទាន ដែលផ្តល់ជូនដោយធនាគារ និងគោរពតាមកិច្ចព្រមព្រៀងអតិថិជនស្តីពីលិខិតឥណទាន។
ប្រការ ២៖ ការចេញលិខិតឥណទាន
២.១ លោកអ្នកត្រូវដាក់សំណើជាលាយលក្ខណ៍អក្សរផ្លូវការ ដោយប្រើសំណុំបែបបទស្នើសុំរបស់ធនាគារ រួមមាន៖
(១) ព័ត៌មានលម្អិតទាំងស្រុងអំពីអ្នកទទួលផល។
(២) ការពិពណ៌នាអំពីទំនិញ/សេវាកម្ម កិច្ចសន្យាមូលដ្ឋាន និងឯកសារដែលពាក់ព័ន្ធនឹងប្រតិបត្តិការ។
(៣) ចំនួនទឹកប្រាក់ រូបិយប័ណ្ណ រយៈពេលសុពលភាព និងលក្ខខណ្ឌនៃការដឹកជញ្ជូន។ និង
(៤) ឯកសារដែលត្រូវការផ្សេងទៀត (ឧ. វិក្កយប័ត្រ ប័ណ្ណដឹកជញ្ជូន វិញ្ញាបនបត្របញ្ជាក់ពីប្រភពទំនិញ)។
២.២ ធនាគារអាចចេញលិខិតឥណទាន បន្ទាប់ពីទទួលបានសំណុំបែបបទស្នើសុំដែលបានបំពេញត្រឹមត្រូវ និងឯកសារគាំទ្រដែលពាក់ព័ន្ធ ដោយអនុលោមតាមការវាយតម្លៃឥណទានផ្ទៃក្នុង និងដំណើរការអនុម័តរបស់ធនាគារ។
២.៣ ការចេញលិខិតឥណទាន ត្រូវគោរពតាមច្បាប់ជាតិ និងអន្តរជាតិដែលអាចអនុវត្តបាន រួមទាំង វិធាន UCP 600 និងបទប្បញ្ញត្តិពាក់ព័ន្ធនឹងទណ្ឌកម្មផងដែរ។ ធនាគារអាចបដិសេធការចេញលិខិតឥណទានប្រសិនបើប្រតិបត្តិការនោះពាក់ព័ន្ធនឹងយុត្តាធិការ ឬភាគីដែលត្រូវបានរឹតបន្តឹង។
២.៤ ធនាគារអាចបដិសេធការចេញលិខិតឥណទាន ដោយឆន្ទានុសិទ្ធិរបស់ខ្លួន ទោះបីជាបន្ទាប់ពីបានទទួលសំណុំបែបបទស្នើសុំ និងទ្រព្យធានាពេញលេញហើយក៏ដោយ។
ប្រការ ៣៖ ថ្លៃសេវា
៣.១ លោកអ្នកយល់ព្រមបង់ថ្លៃសេវា កម្រៃជើងសារ និងកម្រៃផ្សេងៗទាំងអស់ដែលបានកំណត់ដោយធនាគារ សម្រាប់ការចេញ ការកែប្រែ ការចរចារ ការបញ្ជាក់ ការគ្រប់គ្រង និងការទូទាត់លិខិតឥណទាន។ កម្រៃទាំងនេះអាចរួមបញ្ចូល ដូចជា ថ្លៃសេវាចេញលិខិត ថ្លៃសេវាកែប្រែ ថ្លៃសេវាប្រឹក្សា ថ្លៃសេវាបញ្ជាក់ ថ្លៃឯកសារ និងសេវាផ្លូវច្បាប់ កម្រៃធនាគារអន្តរការី ពន្ធដែលតម្រូវ និងការចំណាយផ្សេងៗ។
៣.២ លោកអ្នកអនុញ្ញាតឲ្យធនាគារកាត់ថ្លៃសេវា កម្រៃផ្សេងៗ កម្រៃជើងសារក្នុងការចេញលិខិត កម្រៃជើងសារក្នុងការទទួលយកឯកសារ ឬការទូទាត់ក្រោមលិខិតឥណទាន ដោយផ្ទាល់ពីប្រាក់ក្នុងគណនីប្រាក់បញ្ញើ ឬគណនីសន្សំដែលបានភ្ជាប់ជាមួយលិខិតឥណទាន។ ប្រសិនបើគណនីនោះមិនមានទឹកប្រាក់គ្រប់គ្រាន់ លោកអ្នកយល់ព្រមឲ្យធនាគារកាត់ប្រាក់ ដែលត្រូវបង់នោះពីគណនីផ្សេងទៀតដែលលោកអ្នកមាននៅធនាគារ ដោយមិនចាំបាច់មានការយល់ព្រមបន្ថែមពីលោកអ្នកទៀតឡើយ។
៣.៣ ថ្លៃសេវា និងកម្រៃផ្សេងៗទាំងអស់ដែលបានបង់រួច មិនអាចដកវិញបានទេ ទោះបីជាលិខិតឥណទានមិនត្រូវបានប្រើប្រាស់ក៏ដោយ ហើយត្រូវបង់ជាមុន ឬតាមការយល់ព្រមផ្សេងទៀតប្រសិនបើមាន។
ប្រការ ៤៖ កាតព្វកិច្ចរបស់លោកអ្នក
៤.១ លោកអ្នកត្រូវបង់ និងទទួលខុសត្រូវជំនួសឲ្យធនាគារទាំងស្រុងសម្រាប់ចំនួនទាំងអស់ដែលបានទូទាត់ដោយធនាគារនៅក្រោម ឬទាក់ទងនឹងលិខិតឥណទាន និង/ឬ សំណើទូទាត់ណាមួយក្រោមលិខិតឥណទានភ្លាមៗនៅពេលមានការទាមទារ ដោយមិនប៉ះពាល់ដល់ខចែងដូចបានរៀបរាប់ខាងលើ។ ប្រសិនបើកាតព្វកិច្ចទូទាត់មិនត្រូវបានបំពេញ នោះការទូទាត់ដែលនៅជំពាក់ទាំងអស់នឹងត្រូវដល់កំណត់សងភ្លាមៗ ហើយអាចត្រូវប្រើប្រាស់វិធានការពាក់ព័ន្ធនឹងទ្រព្យធានា ឬវិធានការអនុលោមភាពបន្ថែមទៀត។ ក្នុងករណីក្ស័យធន វិធានតុលាការ ឬព្រឹត្តិការណ៍ស្រដៀងគ្នា បំណុលទាំងអស់នឹងត្រូវដល់កំណត់សងភ្លាមៗផងដែរ។
៤.២ លោកអ្នកយល់ព្រម និងត្រូវបង់ភ្លាមៗនូវកម្រៃ និងចំណាយទាំងអស់ដែលបានបង់ដោយធនាគារ ឬបានកំណត់កាតព្វកិច្ចចំពោះធនាគារ ឬធនាគារអន្តរការី ដែលពាក់ព័ន្ធ និង/ឬកើតឡើងពីការជូនដំណឹង ការបញ្ជាក់ ការសង ការមិនប្រើប្រាស់ ការកែប្រែលក្ខខណ្ឌនៃលិខិតឥណទាន និង/ឬ ការទាមទារទាក់ទងនឹង លិខិតឥណទាន និង/ឬ ទំនិញដែលពាក់ព័ន្ធ ឬដោយវិធីណាមួយដែលបានកើតឡើងក្នុងប្រតិបត្តិការនេះ រួមទាំងកម្រៃជើងសារដែលទាក់ទងនឹងលិខិតឥណទាន តាមអត្រាថ្លៃសេវាបច្ចុប្បន្នរបស់ធនាគារ។
៤.៣ លោកអ្នកយល់ព្រមថា ប្រសិនបើលិខិតឥណទាន បានបញ្ជាក់អំពីការដឹកជញ្ជូនជាជំហាន ឬការទាមទារនៅក្នុងរយៈពេលជាក់លាក់ ហើយអ្នកដឹកជញ្ជូនបរាជ័យក្នុងការដឹកជញ្ជូន ឬការទាមទារក្រោមលិខិតឥណទាន មិនបានធ្វើក្នុងរយៈពេលកំណត់ នោះការដឹកជញ្ជូន ឬការទាមទារបន្ទាប់អាចត្រូវបានអនុវត្តនៅក្នុងរយៈពេលដែលបានកំណត់ណាមួយ ហើយធនាគារអាចអនុវត្តការទូទាត់/សំណើទូទាត់នោះតាមឆន្ទានុសិទ្ធិរបស់ខ្លួន ដោយមិនចាំបាច់មានការជូនដំណឹងទៅកាន់លោកអ្នកឡើយ។
៤.៤ លោកអ្នកត្រូវផ្តល់ និងរក្សាទុកទ្រព្យធានា ដូចដែលតម្រូវដោយធនាគារ។ ធនាគារអាចទាមទារប្រាតិភោគបន្ថែមគ្រប់ពេល ដោយផ្អែកលើការផ្លាស់ប្តូរនៃស្ថានភាពហិរញ្ញវត្ថុ ឬប្រវត្តិហានិភ័យរបស់លោកអ្នក។ លោកអ្នកយល់ព្រមធ្វើសកម្មភាពចាំបាច់នានា ដើម្បីធានាឲ្យបានថាទ្រព្យធានាបន្ថែមនោះមានប្រសិទ្ធភាពអាចអនុវត្តបាន តាមការទាមទាររបស់ធនាគារ។
៤.៥ លោកអ្នកត្រូវធានាថា ប្រតិបត្តិការទាំងអស់ដែលទាក់ទងនឹងលិខិតឥណទាន ត្រូវអនុលោមតាមច្បាប់ បទបញ្ជា និងបទប្បញ្ញត្តិពិន័យដែលមានជាធរមាន រួមទាំងច្បាប់ប្រឆាំងនឹងការសម្អាតប្រាក់ (AML) និងការប្រយុទ្ធប្រឆាំងហិរញ្ញប្បទានភេរវកម្ម (CFT)។
៤.៦ លោកអ្នកត្រូវជូនដំណឹងមកធនាគារឲ្យបានទាន់ពេលវេលា អំពីការផ្លាស់ប្តូរសំខាន់ៗនៃស្ថានភាពហិរញ្ញវត្ថុ ស្ថានភាពផ្លូវច្បាប់ ឬព្រឹត្តិការណ៍ណាមួយដែលអាចប៉ះពាល់ដល់សមត្ថភាពក្នុងការបំពេញកាតព្វកិច្ចក្រោមកិច្ចព្រមព្រៀងអតិថិជនស្តីពីលិខិតឥណទាននេះ។
៤.៧ លោកអ្នកធានាថា ព័ត៌មានទាំងអស់ដែលបានផ្តល់ឲ្យធនាគារទាក់ទងនឹងលិខិតឥណទាន គឺពិតប្រាកដ ពេញលេញ និងត្រឹមត្រូវ ហើយលោកអ្នកត្រូវការពារធនាគារពីការទទួលខុសត្រូវណាមួយដែលកើតឡើង ដោយសារការបង្ហាញព័ត៌មានមិនពិតនោះ។
៤.៨ ក្នុងករណីដែលមានការចេញលិខិតធានាដឹកជញ្ជូនក្រោមលិខិតឥណទាន អ្នកស្នើសុំត្រូវផ្តល់នូវប័ណ្ណដឹកជញ្ជូនច្បាប់ដើម (Bill of Lading) និងទាមទារសំណងនៃលិខិតធានាដឹកជញ្ជូនដើមនោះ ដើម្បីឲ្យធនាគារអនុវត្តការលុបចោលលិខិតធានាដឹកជញ្ជូននោះ។
ប្រការ ៥៖ សំណងការខូចខាត
៥.១ លោកអ្នកត្រូវទទួលខុសត្រូវ និងផ្តល់សំណងឲ្យធនាគារ និងការពារធនាគារពីផលប៉ះពាល់ដែលកើតចេញពីសកម្មភាពទាំងអស់ (ផ្លូវច្បាប់ ឬក្រៅពីនេះ) ការបាត់បង់ ការខូចខាត បណ្តឹង ការចំណាយ ការទាមទារ និងកាតព្វកិច្ចគ្រប់ប្រភេទ ដែលធនាគារអាចជួបប្រទះ ឬរងផលប៉ះពាល់ ដោយសារការចេញលិខិតឥណទាន តាមសំណើរបស់លោកអ្នក រួមមាន សោហ៊ុយ កម្រៃផ្សេងៗ ការចំណាយ និងកាតព្វកិច្ចគ្រប់ប្រភេទ ដែលធនាគារអាចទទួលរង ឬទទួលខុសត្រូវ ឬពាក់ព័ន្ធនឹងការទាមទារណាមួយដែលទាក់ទងនឹងការអនុវត្ត ឬការប៉ុនប៉ងអនុវត្តលិខិតឥណទាន ដោយភាគីណាមួយ មិនថាការពារនោះត្រឹមត្រូវ ឬមិនត្រឹមត្រូវក៏ដោយ។ ក្នុងករណីមានអ្នកស្នើសុំច្រើននាក់ (លោកអ្នក) នោះកាតព្វកិច្ចទាំងអស់នឹងជាកាតព្វកិច្ចរួម និងដោយផ្ទាល់។
៥.២ ដោយពិចារណាថា ធនាគារយល់ព្រមអនុវត្តតាមការណែនាំតាមទូរសព្ទ និង/ឬ សារអេឡិចត្រូនិក ពាក់ព័ន្ធនឹងសំណុំបែបបទស្នើសុំ និងលិខិតឥណទាន ដោយមិនធ្វើការផ្ទៀងផ្ទាត់ជាមួយលោកអ្នក ឬសំណុំបែបបទស្នើសុំដើមរបស់អតិថិជនដែលត្រូវបានផ្ញើមកធនាគារជាបន្តបន្ទាប់ ឬការបញ្ជាក់ជាលាយលក្ខណ៍អក្សររបស់លោកអ្នកចំពោះសំណុំបែបបទស្នើសុំនោះ លោកអ្នកសន្យាថានឹងទទួលខុសត្រូវជំនួស និងការពារធនាគារពីផលប៉ះពាល់ពីកាតព្វកិច្ច បណ្តឹង ការទាមទារ សកម្មភាព ដំណើរការ ការបាត់បង់ ការទូទាត់ (រួមទាំងការទូទាត់ក្រោមលិខិតឥណទាន) ចំណាយ និងកាតព្វកិច្ចផ្សេងទៀតគ្រប់ប្រភេទដែលធនាគារអាចជួបប្រទះ ក្នុងការអនុវត្តសិទ្ធិនោះ។ លោកអ្នកសន្យាថានឹងមិនប្តឹង ឬទាមទារ ឬចាប់ផ្តើមដំណើរការនីតិវិធីណាមួយប្រឆាំងនឹងធនាគារសម្រាប់ការបាត់បង់ ឬកាតព្វកិច្ចមួយដែលលោកអ្នកអាចជួបប្រទះដោយសារធនាគារអនុវត្តតាមសេចក្តីណែនាំរបស់អតិថិជន រួមទាំងការបាត់បង់ ឬការខូចខាតដែលកើតឡើងពីការអនុវត្តតាមការណែនាំ ដែលបានផ្តល់ដោយភាគីដែលអះអាងថាជាលោកអ្នក ឬជាអ្នកតំណាងរបស់លោកអ្នក ឬជាបុគ្គលិករបស់លោកអ្នកឡើយ។
ប្រការ ៦៖ សិទ្ធិ និងឆន្ទានុសិទ្ធិរបស់ធនាគារ
៦.១ ធនាគាររក្សាសិទ្ធិពេញលេញក្នុងការទទួល ឬបដិសេធសំណុំបែបបទស្នើសុំលិខិតឥណទាន ដោយផ្អែកលើការឆន្ទានុសិទ្ធិរបស់ខ្លួន។
៦.២ ធនាគារមានសិទ្ធិផ្តាច់មុខក្នុងការកំណត់ពាក្យប្រើប្រាស់ រចនាសម្ព័ន្ធ និងទម្រង់នៃលិខិតឥណទាន។ ធនាគារអាចបដិសេធការចេញឯកសារដែលមានលក្ខខណ្ឌមិនច្បាស់លាស់ មិនអាចអនុវត្តបាន ឬមិនស្របតាមស្តង់ដារអន្តរជាតិ (ឧ. UCP 600)។
៦.៣ ធនាគារអាចទាមទារឲ្យលោកអ្នកផ្តល់ប្រាតិភោគ ដូចជា ប្រាក់បម្រុង ប្រាក់បញ្ញើមានកាលកំណត់ ទ្រព្យបញ្ចាំ ឬលិខិតធានាពីតតិយជន ឬទ្រព្យធានាផ្សេងទៀត ក្នុងប្រភេទ និងចំនួនដែលធនាគារយល់ឃើញថាសមរម្យសម្រាប់ការចេញលិខិតឥណទាន។ ធនាគារអាចទាមទារប្រាតិភោគបន្ថែមគ្រប់ពេល ប្រសិនបើស្ថានភាពហិរញ្ញវត្ថុ ឬប្រវត្តិហានិភ័យរបស់លោកអ្នកមានការផ្លាស់ប្តូរ។ ប្រភេទ និងទំហំប្រាតិភោគ នឹងត្រូវកំណត់ដោយឆន្ទានុសិទ្ធិរបស់ធនាគារ ដោយផ្អែកលើទំហំប្រតិបត្តិការ និងបរិបទនៃប្រតិបត្តិការនោះ។
៦.៤ ធនាគារមិនមានកាតព្វកិច្ចក្នុងការយល់ព្រមលើសំណើសុំកែប្រែ បន្ថែមរយៈពេល ឬចេញលិខិតឥណទានជាថ្មីឡើយ។ សំណើនីមួយៗនឹងត្រូវបានវាយតម្លៃឡើងវិញ និងអាចមានថ្លៃសេវាបន្ថែម ឬត្រូវការឯកសារថ្មី។
៦.៥ ធនាគារ និងធនាគារអន្តរការីមិនទទួលខុសត្រូវចំពោះភាពខុសគ្នានៃការពណ៌នាទំនិញ គុណភាព ឬតម្លៃនៃទំនិញ ភាពពិតប្រាកដនៃឯកសារ កំហុសក្នុងការផ្ញើសារ ឬកំហុសដោយតតិយជនឡើយ។ សកម្មភាពណាមួយដែលបានអនុវត្តក្រោមលិខិតឥណទាន ឬឯកសារដែលទាក់ទងនឹងលិខិតឥណទាន នឹងមានសុពលភាព និងមិនបង្កើតកាតព្វកិច្ចលើធនាគារ ឬធនាគារអន្តរការីទេ។
៦.៦ លោកអ្នកយល់ព្រមថា ធនាគារមិនមានកាតព្វកិច្ចណាមួយចំពោះលោកអ្នកចំពោះការបាត់បង់ ឬការខូចខាតណាមួយដែលលោកអ្នកបានជួបប្រទះដោយផ្ទាល់ ឬដោយប្រយោល ដែលកើតឡើង ឬទាក់ទងនឹងការផ្តល់ប្រឹក្សាដំបូងរបស់ធនាគារអំពីការខុសគ្នា ឬការមិនអនុលោមតាមលក្ខខណ្ឌឡើយ។
៦.៧ កាតព្វកិច្ចរបស់ធនាគារនៅក្នុងការទទួលខុសត្រូវក្រោមលិខិតឥណទាន ត្រូវបានកម្រិតត្រឹមតែលក្ខខណ្ឌដែលមាននៅក្នុងលិខិតនោះប៉ុណ្ណោះ។ ធនាគារមិនតម្រូវឲ្យត្រួតពិនិត្យប្រតិបត្តិការគោលឡើយ។
៦.៨ ប្រសិនបើធនាគារបានធ្វើការទូទាត់ក្រោមលិខិតឥណទាន នោះធនាគារមានសិទ្ធិទាមទារប្រាក់ទាំងអស់នោះមកវិញពីលោកអ្នកភ្លាមៗ រួមទាំងការប្រាក់ ថ្លៃសេវា និងថ្លៃសេវាផ្លូវច្បាប់ដែលពាក់ព័ន្ធ។
៦.៩ ធនាគាររក្សាសិទ្ធិក្នុងការកែប្រែគោលនយោបាយផ្ទៃក្នុង តារាងថ្លៃសេវា និងនីតិវិធីប្រតិបត្តិគ្រប់ពេល ដោយគោរពតាមច្បាប់ និងបទប្បញ្ញត្តិជាធរមាន។
៦.១០ លោកអ្នកយល់ព្រមដោយមិនអាចបដិសេធបានឲ្យធនាគារ និងមន្រ្តីរបស់ធនាគារ បង្ហាញព័ត៌មានគណនីរបស់លោកអ្នកដោយវិធីណាមួយក៏ដោយ រួមមាន ព័ត៌មានលម្អិតអំពីសេវាឥណទាន ទ្រព្យធានា សមតុល្យឥណទាន និងប្រាក់បញ្ញើជាមួយធនាគារ ទៅឲ្យ៖ (១) និយ័តករ ឬអាជ្ញាធរណាមួយ (២) អ្នកទទួលសិទ្ធិបន្តរបស់ធនាគារ ឬអ្នកចូលរួមផ្សេងទៀតក្នុងការអនុវត្តសិទ្ធិ និង/ឬ កាតព្វកិច្ចរបស់ធនាគារទាក់ទងនឹងសេវាឥណទានរបស់លោកអ្នក (៣) អ្នកធានា ឬអ្នកផ្តល់ទ្រព្យធានា និងភ្នាក់ងារ ឬអ្នកអនុវត្តការងារឯករាជ្យរបស់ធនាគារ និង (៤) ក្រុមហ៊ុនធានារ៉ាប់រងណាមួយដែលបានធានាសម្រាប់សំណុំបែបបទស្នើសុំនេះ។
ប្រការ ៧៖ វិធានគ្រប់គ្រង
៧.១ ការចេញ ការប្រតិបត្តិ និងការអនុវត្តលិខិតឥណទាន នឹងត្រូវបានគ្រប់គ្រងដោយវិធាន Uniform Customs and Practice for Documentary Credits (UCP 600) លើកលែងតែមានការបញ្ជាក់ផ្សេងទៀត។
៧.២ ធនាគាររក្សាសិទ្ធិក្នុងការកំណត់វិធានដែលអាចអនុវត្តបាន ដោយផ្អែកលើប្រតិបត្តិការ និងភាគីដែលពាក់ព័ន្ធ។
៧.៣ ប្រសិនបើវិធាន UCP 600 ត្រូវបានកែប្រែ ឬធ្វើបច្ចុប្បន្នភាពក្នុងអំឡុងពេលសុពលភាពនៃលិខិតឥណទាន វិធានដែលបានបញ្ជាក់នៅពេលចេញលិខិតឥណទាននឹងត្រូវអនុវត្តបន្ត លើកលែងតែមានការយល់ព្រមជាលាយលក្ខណ៍អក្សរផ្សេងទៀត។
៧.៤ ក្នុងករណីមានភាពខុសគ្នារវាងខចែង និងលក្ខខណ្ឌនៅក្នុងកិច្ចព្រមព្រៀងនេះ និងវិធាន UCP 600 នោះ វិធាន UCP 600 នឹងត្រូវចាត់ទុកថាអសុពលភាពត្រឹមតែផ្នែកដែលមានភាពខុសគ្នានោះ។
ប្រការ ៨៖ លក្ខខណ្ឌនៃការទាមទារ និងការទូទាត់
៨.១ លោកអ្នកយល់ព្រមថាសំណើ ឬការទូទាត់ណាមួយដែលបានដាក់ស្នើជាមួយធនាគារ ឬធនាគារអន្តរការីទៅអ្នកទទួលផលនៃលិខិតឥណទាន ឬដោយធនាគារអន្តរការីក្រោមការបញ្ជាក់របស់លិខិតឥណទាន សម្រាប់ការទូទាត់ចំនួនប្រាក់ណាមួយដែលត្រូវបង់ នឹងត្រូវចាត់ទុកជាភស្តុតាងច្បាស់ លាស់នៃចំនួនប្រាក់ដែលត្រូវបង់ និងអាចទូទាត់បាន។ សំណើ ឬការទាមទារនេះនឹងត្រូវចាត់ទុកថាជាការបញ្ជាក់សិទ្ធិគ្រប់គ្រាន់សម្រាប់ឲ្យធនាគារ ឬធនាគារអន្តរការីធ្វើការទូទាត់ ដោយមិនចាំបាច់មានភស្តុតាងបន្ថែម ឬការផ្ទៀងផ្ទាត់សុពលភាពនៃចំនួនប្រាក់នោះ។ ធនាគារ ឬធនាគារអន្តរការីមិនមានកាតព្វកិច្ចក្នុងការជូនដំណឹង ឬស្នើសុំការផ្តល់សិទ្ធិបន្ថែមពីលោកអ្នកឡើយ។ លោកអ្នកយល់ព្រមមិនបដិសេធសុពលភាពនៃសំណើ ឬការទាមទារណាមួយនោះឡើយ។
៨.២ លោកអ្នកក៏យល់ព្រមមិនសួរនាំ ឬតវ៉ានឹងសុពលភាព ឬភាពស្របច្បាប់នៃការទូទាត់ណាមួយដែលធ្វើឡើងដោយធនាគារ ឬធនាគារអន្តរការីនោះទេ។ លោកអ្នកនឹងមិនបដិសេធកាតព្វកិច្ចដោយផ្អែកលើមូលហេតុថាការទូទាត់នោះ ឬផ្នែកណាមួយនៃការទូទាត់នោះ មិនមែនជាកាតព្វកិច្ចរបស់ធនាគារ ឬធនាគារអន្តរការីទេ ឬមានការពារសមហេតុផល ឬមូលហេតុសមហេតុផលក្នុងការបដិសេធការទូទាត់ក្រោមលិខិតឥណទាន ឬដោយមូលហេតុផ្សេងទៀតណាមួយក៏ដោយ។
៨.៣ នៅពេលការទូទាត់ត្រូវបានអនុវត្តតាមលក្ខខណ្ឌនៃលិខិតឥណទាន កាតព្វកិច្ចរបស់ធនាគារត្រូវបានបញ្ចប់។
ប្រការ ៩៖ ប្រាតិភោគ និងការផ្តល់សិទ្ធិលើគណនី
៩.១ លោកអ្នកយល់ព្រមបញ្ចាំឯកសារ និងទំនិញទាំងអស់ដែលទទួលបានក្រោម ឬពាក់ព័ន្ធនឹងលិខិតឥណទាន ជាទ្រព្យធានាសម្រាប់កាតព្វកិច្ចបច្ចុប្បន្ន ឬអនាគតដែលលោកអ្នកជំពាក់ធនាគារ។ ធនាគារមានសិទ្ធិកាន់កាប់ ប្រើប្រាស់ ឬទូទាត់ទ្រព្យទាំងនេះដើម្បីសងកាតព្វកិច្ចទាំងអស់ និងអាចអនុវត្តវិធានការបន្ថែមដើម្បីធានាកាតព្វកិច្ច ប្រសិនបើយល់ថាសមស្រប។ ការចាត់ចែងនេះនឹងនៅមានសុពលភាព ទោះបីឯកសារ ឬទំនិញត្រូវបានជំនួស ឬផ្ទេរចេញ ដើម្បីធានាការការពារបំណុលទាំងមូល។
៩.២ លោកអ្នកទទួលស្គាល់សិទ្ធិរបស់ធនាគារនៅក្នុងការកាន់កាប់ និងចាត់ចែងឯកសារ និងទំនិញដែលជាប្រាតិភោគសម្រាប់ធានាបំណុល ឬកាតព្វកិច្ចណាមួយដែលលោកអ្នកជំពាក់ក្រោមលិខិតឥណទាននេះ ឬកាតព្វកិច្ចផ្សេងទៀត។ ក្នុងករណីដែលមានកំហុស ឬការបំពានណាមួយ ធនាគារអាចលក់ ផ្ទេរ ឬចាត់ចែងទំនិញទាំងនេះដោយមិនចាំបាច់ជូនដំណឹង ដោយប្រើប្រាស់ប្រាក់ដែលទទួលបានដើម្បីសងបំណុលរហូតដល់គ្រប់ចំនួន។ ទំនិញ និងប្រាក់ចំណូលទាំងនេះនឹងត្រូវរក្សាទុកជាសិទ្ធិរបស់ធនាគាររហូតដល់កាតព្វកិច្ចទាំងអស់ត្រូវបានសង។
៩.៣ លោកអ្នកយល់ព្រមធានាទំនិញដែលទាក់ទងនឹងប្រតិបត្តិការនេះ ជាមួយក្រុមហ៊ុនធានារ៉ាប់រងដែលត្រូវបានទទួលស្គាល់ ដោយកំណត់ការផ្ទេរធានារ៉ាប់រងនោះទៅឲ្យធនាគារ ឬបញ្ជាក់ឈ្មោះធនាគារជាអ្នកទទួលប្រាក់សំណង។ ការទូទាត់ធានារ៉ាប់រងណាមួយដែលលោកអ្នកទទួលបាន ត្រូវផ្ញើទៅឲ្យធនាគារភ្លាមៗ ហើយរក្សាទុកជាសិទ្ធិរបស់ធនាគាររហូតដល់កាតព្វកិច្ចក្រោមលិខិតឥណទានត្រូវបានសងទាំងស្រុង។
៩.៤ លោកអ្នកក៏យល់ព្រមលើលក្ខខណ្ឌដូចខាងក្រោម៖
(១) លោកអ្នកយល់ព្រមផ្តល់ឯកសារដឹកជញ្ជូន និងឯកសារផ្ទេរសិទ្ធិ ឬការទទួលទំនិញពីតតិយជន ដើម្បីដាក់ធានាជូនធនាគារ ដូចដែលបានតម្រូវក្រោមឯកសារឥណទាន។
(២) លោកអ្នកធានាថា លោកអ្នកគឺជាម្ចាស់តែម្នាក់គត់ នៃទំនិញ បន្ទាប់ពីការដឹកជញ្ជូននៃទំនិញក្រោមកិច្ចសន្យាមូលដ្ឋាន ហើយនឹងអនុវត្តវិធានការចាំបាច់ដើម្បីអះអាងពីកម្មសិទ្ធិរបស់ខ្លួនចំពោះអ្នកដឹកជញ្ជូន និងតតិយជនផ្សេងទៀតក្នុងនាមធនាគារ។
(៣) លោកអ្នកមិនត្រូវបង្កើតកាតព្វកិច្ច ឬបោះបង់ទំនិញទាំងអស់ ឬមួយផ្នែក ក្រោមកិច្ចសន្យាមូលដ្ឋាន ដោយគ្មានការយល់ព្រមជាលាយលក្ខណ៍អក្សរពីធនាគារឡើយ។
(៤) លោកអ្នកយល់ព្រមតែងតាំងធនាគារ និងមន្រ្តីរបស់ធនាគារដែលទទួលបន្ទុកគណនីរបស់លោកអ្នកជាភ្នាក់ងាររបស់លោកអ្នក ដើម្បីអនុវត្ត និងផ្តល់ឯកសារទាំងអស់ និងធ្វើសកម្មភាពទាំងអស់ដែលធនាគារ ឬមន្រ្តីនោះយល់ថាសមស្រប ដើម្បីបង្កើតអានុភាពលើសិទ្ធិប្រាតិភោគ ឬសម្រាប់អនុវត្តសិទ្ធិណាមួយក្រោមកិច្ចព្រមព្រៀងនេះ រួមទាំងការផ្ទេរទំនិញទៅឲ្យអ្នកទិញ។
៩.៥ លោកអ្នកយល់ព្រមឲ្យធនាគារទូទាត់ប្រាក់ក្នុងគណនីចរន្ត ឬគណនីផ្សេងទៀតរបស់លោកអ្នកដែលមាននៅធនាគារ ឬទ្រព្យធានាផ្សេងទៀតដែលបានផ្តល់ឲ្យធនាគារ មិនថាទ្រព្យធានានោះជាប្រាក់បម្រុង ឬប្រាក់បញ្ញើមានកាលកំណត់ ដើម្បីអនុញ្ញាតឲ្យធនាគារទទួលខុសត្រូវចំពោះការទាមទារណាមួយក្រោមលិខិតឥណទាន។
៩.៦ នៅពេលដែលធនាគារទាមទារ លោកអ្នកត្រូវដាក់ប្រាក់បម្រុងជាមួយធនាគារភ្លាមៗ ដើម្បីរ៉ាប់រងកាតព្វកិច្ចរបស់ធនាគារក្រោមលិខិតឥណទាន។
៩.៧ លោកអ្នកយល់ព្រម និងអនុញ្ញាតឲ្យធនាគារកាត់ប្រាក់ពីគណនីចរន្ត ឬគណនីផ្សេងទៀត ដើម្បីទូទាត់សម្រាប់ការទាមទារណាមួយដែលបានធ្វើចំពោះធនាគារក្រោមលិខិតឥណទាន ដោយមិនចាំបាច់ជូនដំណឹងជាមុនទៅកាន់លោកអ្នក។
៩.៨ ធនាគារមានសិទ្ធិពេញលេញក្នុងការបម្លែងប្រាក់ទៅជាប្រាក់រៀល (KHR) ឬដុល្លារអាមេរិក (USD) ដែលមានតម្លៃសមមូលសម្រាប់ការទូទាត់សងការទាមទារទំាងអស់ដែលចេញដោយធនាគារ ជារូបិយប័ណ្ណបរទេសនៅក្រោមលិខិតឥណទាន ដោយដោយផ្អែកលើអត្រាប្តូរប្រាក់បច្ចុប្បន្នរបស់ធនាគារ។
ប្រការ ១០៖ សុពលភាព និងការបញ្ចប់
១០.១ លិខិតឥណទាន នឹងមានសុពលភាពចាប់ពីថ្ងៃចេញ ឬដូចដែលបានបញ្ជាក់នៅក្នុងឯកសារ ហើយនឹងនៅមានសុពលភាពរហូតដល់ថ្ងៃផុតកំណត់ដែលបានបញ្ជាក់។ ប្រសិនបើឯកសារនោះមានវិធានបន្ថែមសុពលភាពដោយស្វ័យប្រវត្តិ វានឹងបន្តសុពលភាពជាបន្តបន្ទាប់ លើកលែងតែធនាគារជូនដំណឹងទៅអ្នកទទួលប្រាក់ អំពីការមិនបន្តសុពលភាពក្នុងរយៈពេលជូនដំណឹងដែលបានកំណត់។
១០.២ ការបញ្ចប់មុនអាចកើតឡើងក្នុងករណីដូចខាងក្រោម៖ (១) នៅពេលទទួលបានការបញ្ជាក់ជាលាយលក្ខណ៍អក្សរពីអ្នកទទួលផលថាមិនត្រូវការលិខិតឥណទាននោះទៀត ឬ (ii) តាមការព្រមព្រៀងជាលាយលក្ខណ៍អក្សររបស់ភាគីទាំងអស់។ ធនាគារក៏រក្សាសិទ្ធិក្នុងការផ្អាក ឬបញ្ចប់កាតព្វកិច្ចរបស់ខ្លួនក្នុងករណីមានការឆបោក ការបំពានកិច្ចព្រមព្រៀង ឬការហាមឃាត់ដោយបទប្បញ្ញត្តិច្បាប់។
១០.៣ ការបញ្ចប់នឹងមិនប៉ះពាល់ដល់កាតព្វកិច្ចបន្តរបស់លោកអ្នកក្នុងការសង និងទទួលខុសត្រូវចំពោះធនាគារលើការទូទាត់ ឬកាតព្វកិច្ចណាមួយដែលបានកើតឡើងមុនពេលបញ្ចប់នោះឡើយ។
១០.៤ ក្នុងករណីមានព្រឹត្តិការណ៍ប្រធានសក្តិ កាតព្វកិច្ចរបស់ធនាគារអាចត្រូវផ្អាក ប៉ុន្តែរយៈពេលសុពលភាពនៃ លិខិតឥណទាននឹងមិនត្រូវបានពន្យារឡើយ លើកលែងតែមានការបញ្ជាក់ច្បាស់លាស់ណាមួយ។
ប្រការ ១១៖ ការកែប្រែ និងការលុបចោល
១១.១ ការកែប្រែ ឬការលុបចោលលិខិតឥណទាន ត្រូវការការយល់ព្រមជាលាយលក្ខណ៍អក្សរពីភាគីទាំងអស់ដែលពាក់ព័ន្ធ រួមទាំងអ្នកទទួលផលផងដែរ។
១១.២ ធនាគាររក្សាសិទ្ធិក្នុងការបដិសេធសំណើសុំកែប្រែ ឬលុបចោលណាមួយដោយផ្អែកតាមឆន្ទានុសិទ្ធិរបស់ខ្លួន។
១១.៣ ធនាគារនឹងបន្តរក្សាទ្រព្យធានាទាំងអស់ដែលបានដាក់ជាទ្រព្យធានាសម្រាប់លិខិតឥណទាន រហូតដល់ លិខិតឥណទាននោះត្រូវបានលុបចោល។
ប្រការ ១២៖ ការប្រាក់
ប្រសិនបើលោកអ្នកបរាជ័យក្នុងការសងប្រាក់ឲ្យធនាគារ សម្រាប់ការទូទាត់ណាមួយដែលបានធ្វើឡើងក្រោមលិខិតឥណទាន ធនាគារមានសិទ្ធិក្នុងការគិតការប្រាក់លើចំនួនប្រាក់ដែលនៅសល់ ដោយផ្អែកលើអត្រាដែលបានយល់ព្រមជាលាយលក្ខណ៍អក្សរ ឬបើមិនបានបញ្ជាក់ អត្រានឹងអនុវត្តតាមអត្រាខ្ចីប្រាក់បច្ចុប្បន្នរបស់ធនាគារ។ ការប្រាក់នឹងចាប់ផ្តើមគិតចាប់ពីថ្ងៃដល់កំណត់សង និង/ឬ សំណើទូទាត់ណាមួយក្រោមលិខិតឥណទាន រហូតដល់ការសងត្រូវបានទូទាត់ទាំងស្រុង ហើយអាចគិតបន្ថែមរៀងរាល់ខែតាមគោលនយោបាយរបស់ធនាគារ និងច្បាប់ជាធរមានរបស់ព្រះរាជាណាចក្រកម្ពុជា។
កិច្ចព្រមព្រៀងអតិថិជនស្តីពីសេវាបេឡានិច័យដោយឯកសារ និងសេវាជួញដូរឯកសារ
ប្រការ ១៖ សេវាបេឡានិច័យដោយឯកសារ / សេវាជួញដូរឯកសារ
១.១ សេវាបេឡានិច័យដោយឯកសារ (Documentary Collection - DC) សំដៅដល់ផលិតផលហិរញ្ញវត្ថុពាណិជ្ជកម្មមួយប្រភេទដែលផ្តល់ដោយធនាគារ ដែលលោកអ្នក (អ្នកលក់ ឬអ្នកនាំចេញ) ប្រគល់ភារកិច្ចនៃការប្រមូលការទូទាត់សម្រាប់ទំនិញទៅឲ្យធនាគារ ហើយធនាគារបញ្ជូនឯកសារដឹកជញ្ជូនទៅធនាគាររបស់អ្នកទិញ ឬអ្នកនាំចូល រួមជាមួយនឹងសេចក្ដីណែនាំអំពីការទូទាត់។
១.២ សេវាជួញដូរឯកសារ សំដៅដល់ផលិតផលហិរញ្ញវត្ថុពាណិជ្ជកម្មមួយប្រភេទដែលផ្តល់ដោយធនាគារ ដែលធនាគារទូទាត់ប្រាក់ជាមុនទៅលោកអ្នក (អ្នកលក់ ឬអ្នកនាំចេញ) ដោយផ្អែកលើឯកសារដែលអនុលោមតាមលិខិតឥណទាន (LC) ដែលប្រើប្រាស់ជាទ្រព្យធានា។
១.៣ លោកអ្នកយល់ព្រមប្រើប្រាស់សេវាបេឡានិច័យដោយឯកសារ និងសេវាជួញដូរឯកសារ ដែលផ្តល់ជូនដោយធនាគារ និងគោរពតាមកិច្ចព្រមព្រៀងអតិថិជនស្តីពីសេវាបេឡានិច័យដោយឯកសារ និងសេវាជួញដូរឯកសារ។
ប្រការ ២៖ ការផ្តល់សេវាបេឡានិច័យដោយឯកសារ និងសេវាជួញដូរឯកសារ
២.១ លោកអ្នកត្រូវដាក់សំណើជាលាយលក្ខណ៍អក្សរផ្លូវការ ដោយប្រើសំណុំបែបបទស្នើសុំរបស់ធនាគារដែលរួមមាន៖
(១) ព័ត៌មានលម្អិតទាំងស្រុងអំពីអ្នកទទួលផល។
(២) ការពិពណ៌នាអំពីទំនិញ/សេវាកម្ម កិច្ចសន្យាមូលដ្ឋាន និងឯកសារដែលពាក់ព័ន្ធនឹងប្រតិបត្តិការ។
(៣) ចំនួនទឹកប្រាក់ រូបិយប័ណ្ណ លក្ខខណ្ឌទូទាត់ សេចក្ដីណែនាំស្តីពីសេវាបេឡានិច័យដោយឯកសារ និង
(៤) ឯកសារពាក់ព័ន្ធផ្សេងទៀត (ឧ. រូបិយាណត្តិ វិក័យប័ត្រទំនិញ ប័ណ្ណដឹកជញ្ជូន ប័ណ្ណបញ្ជាឲ្យប្រគល់ទំនិញ វិញ្ញាបនបត្របញ្ជាក់ពីប្រភពទំនិញ គោលការណ៍/វិញ្ញាបនបត្រធានារ៉ាប់រង)។
២.២ ធនាគារអាចផ្តល់សេវាបេឡានិច័យដោយឯកសារ ឬសេវាជួញដូរឯកសារ បន្ទាប់ពីទទួលបានសំណុំបែបបទស្នើសុំដែលបានបំពេញត្រឹមត្រូវ និងឯកសារគាំទ្រដែលពាក់ព័ន្ធ។ ការផ្តល់សេវានេះនឹងអនុវត្តតាមការវាយតម្លៃឥណទានផ្ទៃក្នុង និងដំណើរការអនុម័តរបស់ធនាគារ។
២.៣ ការផ្តល់សេវាបេឡានិច័យដោយឯកសារ ឬសេវាជួញដូរឯកសារត្រូវគោរពតាមច្បាប់ជាតិ និងអន្តរជាតិដែលអាចអនុវត្តបាន រួមទាំងបទប្បញ្ញត្តិពាក់ព័ន្ធនឹងការពិន័យផងដែរ។ ធនាគារអាចបដិសេធការផ្តល់សេវាបេឡានិច័យដោយឯកសារ ឬសេវាជួញដូរឯកសារ ប្រសិនបើប្រតិបត្តិការនោះពាក់ព័ន្ធនឹងយុត្តាធិការ ឬភាគីដែលត្រូវបានរឹតបន្តឹង។
២.៤ ធនាគារអាចបដិសេធការផ្តល់សេវាបេឡានិច័យដោយឯកសារ ឬសេវាជួញដូរឯកសារតាមឆន្ទានុសិទ្ធិរបស់ខ្លួន ទោះបីជាបន្ទាប់ពីបានទទួលសំណុំបែបបទស្នើសុំពេញលេញហើយក៏ដោយ។
ប្រការ ៣៖ ថ្លៃសេវា
៣.១ លោកអ្នកយល់ព្រមបង់ថ្លៃសេវា កម្រៃជើងសារ និងកម្រៃផ្សេងៗទាំងអស់ដែលបានកំណត់ដោយធនាគារ សម្រាប់ការផ្តល់សេវា ការកែប្រែ ការលុបចោល និងការគ្រប់គ្រងទៅលើការផ្តល់សេវាបេឡានិច័យដោយឯកសារ ឬសេវាជួញដូរឯកសារ។ កម្រៃទាំងនេះអាចរួមមាន ថ្លៃសេវាចេញលិខិត ថ្លៃសេវាកែប្រែ ថ្លៃឯកសារ និងសេវាផ្លូវច្បាប់ កម្រៃធនាគារអន្តរការី ពន្ធដែលតម្រូវ និងការចំណាយផ្សេងៗ។
៣.២ លោកអ្នកអនុញ្ញាតឲ្យធនាគារកាត់ថ្លៃសេវា កម្រៃផ្សេងៗ ឬការទូទាត់ក្រោមសេវាបេឡានិច័យដោយឯកសារ ឬសេវាជួញដូរឯកសារ ដោយផ្ទាល់ពីទឹកប្រាក់ដែលមាននៅក្នុងគណនីប្រាក់បញ្ញើ ឬគណនីសន្សំដែលបានភ្ជាប់ជាមួយសេវាបេឡានិច័យដោយឯកសារ និងសេវាជួញដូរឯកសារ។ ប្រសិនបើគណនីនោះមិនមានទឹកប្រាក់គ្រប់គ្រាន់ លោកអ្នកយល់ព្រមឲ្យធនាគារកាត់ប្រាក់ដែលត្រូវបង់នោះពីគណនីផ្សេងទៀតដែលលោកអ្នកមាននៅធនាគារ ដោយមិនចាំបាច់មានការយល់ព្រមបន្ថែមពីលោកអ្នក។
៣.៣ ថ្លៃសេវា និងកម្រៃផ្សេងៗទាំងអស់ដែលបានបង់រួច មិនអាចដកវិញបានទេ ទោះបីជាការផ្តល់សេវាបេឡានិច័យដោយឯកសារ ឬសេវាជួញដូរឯកសារមិនត្រូវបានប្រើប្រាស់ក៏ដោយ ហើយត្រូវបង់ជាមុន ឬតាមការយល់ព្រមផ្សេងទៀតប្រសិនបើមាន។
ប្រការ ៤៖ កាតព្វកិច្ចរបស់លោកអ្នក
៤.១ លោកអ្នកត្រូវសងប្រាក់ឲ្យធនាគារសម្រាប់ការទូទាត់ ឬការផ្តល់កម្ចីជាមុនណាមួយដែលបានកើតឡើងក្រោមការផ្តល់សេវាបេឡានិច័យដោយឯកសារ ឬសេវាជួញដូរឯកសារភ្លាមៗនៅពេលមានការទាមទារ។ ប្រសិនបើកាតព្វកិច្ចទូទាត់មិនត្រូវបានបំពេញ នោះការទូទាត់ដែលនៅជំពាក់ទាំងអស់នឹងត្រូវដល់កំណត់សងភ្លាមៗ ហើយអាចត្រូវប្រើប្រាស់វិធានការពាក់ព័ន្ធនឹងទ្រព្យធានា ឬវិធានការអនុលោមភាពបន្ថែមទៀត។ ក្នុងករណីក្ស័យធន វិធានតុលាការ ឬព្រឹត្តិការណ៍ស្រដៀងគ្នា បំណុលទាំងអស់នឹងត្រូវដល់កំណត់សងភ្លាមៗផងដែរ។
៤.២ លោកអ្នកយល់ព្រម និងត្រូវបង់ថ្លៃសេវា កម្រៃផ្សេងៗ និងកម្រៃជើងសារទាំងអស់ ស្របតាមកាលវិភាគដែលបានកំណត់ដោយធនាគារ។
៤.៣ លោកអ្នកត្រូវផ្តល់ និងរក្សាទុកទ្រព្យធានា ដូចដែលតម្រូវដោយធនាគារ។ ធនាគារអាចទាមទារទ្រព្យធានាបន្ថែមគ្រប់ពេល ដោយផ្អែកលើការផ្លាស់ប្តូរនៃស្ថានភាពហិរញ្ញវត្ថុ ឬប្រវត្តិហានិភ័យរបស់លោកអ្នក។ ទ្រព្យធានាអាចជា សាច់ប្រាក់ លិខិតឥណទាន ឬទ្រព្យធានាផ្សេងទៀតដែលធនាគារអាចទទួលយកបាន។
៤.៤ លោកអ្នកត្រូវធានាថា ប្រតិបត្តិការទាំងអស់ដែលទាក់ទងនឹងការផ្តល់សេវាបេឡានិច័យដោយឯកសារ ឬសេវាជួញដូរឯកសារ ត្រូវអនុលោមតាមច្បាប់ បទបញ្ជា និងបទប្បញ្ញត្តិពិន័យដែលអាចអនុវត្តបាន រួមទាំងច្បាប់ប្រឆាំងនឹងការសម្អាតប្រាក់ (AML) និងការប្រយុទ្ធប្រឆាំងហិរញ្ញប្បទានភេរវកម្ម (CFT)។
៤.៥ លោកអ្នកត្រូវជូនដំណឹងមកធនាគារឲ្យបានទាន់ពេលវេលា អំពីការផ្លាស់ប្តូរសំខាន់ៗនៃស្ថានភាពហិរញ្ញវត្ថុ ស្ថានភាពផ្លូវច្បាប់ ឬព្រឹត្តិការណ៍ណាមួយដែលអាចប៉ះពាល់ដល់សមត្ថភាពក្នុងការបំពេញកាតព្វកិច្ចក្រោមកិច្ចព្រមព្រៀងអតិថិជនស្តីពីសេវាបេឡានិច័យដោយឯកសារ និងសេវាជួញដូរឯកសារនេះ។
៤.៦ លោកអ្នកធានាថា ព័ត៌មានទាំងអស់ដែលបានផ្តល់ឲ្យធនាគារទាក់ទងនឹងសេវាបេឡានិច័យដោយឯកសារ និងសេវាជួញដូរឯកសារ គឺពិតប្រាកដ ពេញលេញ និងត្រឹមត្រូវ។ ការបង្ហាញព័ត៌មានមិនពិតណាមួយអាចបណ្តាលឲ្យមានការបញ្ចប់ភ្លាមៗនៃកាតព្វកិច្ចរបស់ធនាគារ។
៤.៧ ប្រសិនបើវិក័យប័ត្រត្រូវបានជួញដូរ និង/ឬទិញ ហើយធនាគារបានផ្តល់ឥណទាន រួមទាំងករណីដែលធនាគារបានទាមទារប្រាក់សងពីធនាគារដែលទទួលខុសត្រូវ វានឹងស្ថិតនៅក្រោមលក្ខខណ្ឌថា ប្រសិនបើធនាគារដែលចេញវិក្កយប័ត្របដិសេធ លោកអ្នកត្រូវសងប្រាក់ទាំងអស់ដែលធនាគារបានទូទាត់ជាមុន រួមជាមួយនឹងការប្រាក់តាមអត្រាដែលកំណត់ដោយធនាគារ និងការចំណាយទាំងអស់ដែលធនាគារបានចំណាយទាក់ទងនឹងករណីនោះ។
ប្រការ ៥៖ សំណងការខូចខាត
លោកអ្នកត្រូវទទួលខុសត្រូវ និងផ្តល់សំណងឲ្យធនាគារ និងការពារធនាគារពីផលប៉ះពាល់ដែលកើតចេញពីសកម្មភាពទាំងអស់ (ផ្លូវច្បាប់ ឬក្រៅពីនេះ) ការបាត់បង់ ការខូចខាត បណ្តឹង ការចំណាយ ការទាមទារ និងកាតព្វកិច្ចគ្រប់ប្រភេទ ដែលធនាគារអាចជួបប្រទះ ឬរងផលប៉ះពាល់ ដោយសារការផ្តល់សេវាបេឡានិច័យដោយឯកសារ ឬសេវាជួញដូរឯកសារ តាមសំណើររបស់លោកអ្នក រួមមាន សោហ៊ុយ កម្រៃផ្សេងៗ ការចំណាយ និងកាតព្វកិច្ចគ្រប់ប្រភេទ ដែលធនាគារអាចទទួលរង ឬទទួលខុសត្រូវ ឬពាក់ព័ន្ធនឹងការទាមទារណាមួយដែលទាក់ទងនឹងការអនុវត្ត ឬការប៉ុនប៉ងអនុវត្តការផ្តល់សេវាបេឡានិច័យដោយឯកសារ ឬសេវាជួញដូរឯកសារ ដោយភាគីណាមួយ មិនថាការអនុវត្តនោះត្រឹមត្រូវ ឬមិនត្រឹមត្រូវក៏ដោយ។ ក្នុងករណីមានអ្នកស្នើសុំច្រើនអ្នក (លោកអ្នក) នោះកាតព្វកិច្ចទាំងអស់នឹងជាកាតព្វកិច្ចរួម និងដោយផ្ទាល់។
ប្រការ ៦៖ សិទ្ធិ និងឆន្ទានុសិទ្ធិរបស់ធនាគារ
៦.១ ធនាគាររក្សាសិទ្ធិពេញលេញក្នុងការទទួល ឬបដិសេធសំណុំបែបបទស្នើសុំការប្រើប្រាស់សេវាបេឡានិច័យដោយឯកសារ ឬសេវាជួញដូរឯកសារ តាមឆន្ទានុសិទ្ធិរបស់ខ្លួន។
៦.២ ធនាគារមានសិទ្ធិផ្តាច់មុខក្នុងការកំណត់ពាក្យប្រើប្រាស់ រចនាសម្ព័ន្ធ និងទម្រង់នៃសេវាបេឡានិច័យដោយឯកសារ (DC) ឬសេវាជួញដូរឯកសារ។ ធនាគារអាចបដិសេធការផ្តល់សេវាបេឡានិច័យដោយឯកសារ ឬសេវាជួញដូរឯកសារ ដែលមានលក្ខខណ្ឌមិនច្បាស់លាស់ មិនអាចអនុវត្តបាន ឬមិនស្របតាមស្តង់ដារអន្តរជាតិ (ឧ. UCP 600, URC 522)។
៦.៣ ធនាគារអាចទាមទារឲ្យលោកអ្នកផ្តល់ប័ណ្ណដឹកជញ្ជូន ច្បាប់ដើម និងទម្រង់ពាក្យស្នើសុំប្រើប្រាស់សេវាបេឡានិច័យដោយឯកសារ ប្រសិនបើលោកអ្នកគឺជាអ្នកនាំចេញ ហើយមានបំណងស្នើសុំប្រើប្រាស់សេវាជួញដូរឯកសាររបស់ធនាគារ។ ធនាគារអាចទាមទារប្រាតិភោគបន្ថែមគ្រប់ពេល ប្រសិនបើស្ថានភាពហិរញ្ញវត្ថុ ឬប្រវត្តិហានិភ័យរបស់លោកអ្នកមានការផ្លាស់ប្តូរ។ ប្រភេទ និងទំហំប្រាតិភោគនឹងត្រូវកំណត់ដោយឆន្ទានុសិទ្ធិរបស់ធនាគារ ដោយផ្អែកលើទំហំប្រតិបត្តិការ និងបរិបទនៃប្រតិបត្តិការនោះ។
៦.៤ ធនាគារមិនមានកាតព្វកិច្ចក្នុងការយល់ព្រមលើសំណើសុំកែប្រែ ពន្យារពេល ឬការផ្តល់សេវាបេឡានិច័យដោយឯកសារ ឬសេវាជួញដូរឯកសារជាថ្មីឡើយ។ សំណើនីមួយៗនឹងត្រូវបានវាយតម្លៃឡើងវិញ និងអាចមានថ្លៃសេវាបន្ថែម ឬមានការទាមទារឯកសារជាថ្មី។
៦.៥ កាតព្វកិច្ចរបស់ធនាគារនៅក្នុងការទទួលខុសត្រូវក្រោមការផ្តល់សេវាជួញដូរឯកសារ ត្រូវបានកម្រិតត្រឹមតែលក្ខខណ្ឌដែលមាននៅក្នុងលិខិតនោះប៉ុណ្ណោះ។ ធនាគារមិនតម្រូវឲ្យត្រួតពិនិត្យប្រតិបត្តិការ ឬផ្ទៀងផ្ទាត់ភាពត្រឹមត្រូវនៃការទាមទាររបស់អ្នកទទួលផលឡើយ ប្រសិនបើឯកសារដែលបានដាក់ស្នើបានគោរពតាមលក្ខខណ្ឌដែលបានកំណត់។
៦.៦ លើកលែងតែមានការអនុញ្ញាតផ្សេងពីនេះនៅក្នុងសេចក្ដីណែនាំស្តីពីការទូទាត់ ធនាគារនឹងផ្តល់ឲ្យតែឯកសារលើការទូទាត់ជារូបិយប័ណ្ណនៃប្រទេសដែលធ្វើការទូទាត់ប៉ុណ្ណោះ។ ធនាគារមិនទទួលខុសត្រូវក្នុងការធានាទៅលើចំនួនទឹកប្រាក់សមមូលទាំងអស់ដែលទទួលបាននោះទេ។
៦.៧ ធនាគារមិនទទួលខុសត្រូវចំពោះសកម្មភាព ការមិនអនុវត្ត ការបំពាន ការផ្អាក អសាធនីយភាព ឬការក្ស័យធនរបស់ភាគីណាមួយ ឬការពន្យារពេលក្នុងការផ្ទេរប្រាក់ ការខាតបង់ទៅលើអត្រាប្តូរប្រាក់ ការបាត់បង់ឯកសារ ឬប្រាក់ដែលទាក់ទងនឹងឯកសារនោះក្នុងនីតិវិធីនៃការទូទាត់ឡើយ។
៦.៨ ធនាគារមានសិទ្ធិក្នុងការបម្លែងចំនួនប្រាក់ដែលទទួលបានជារូបិយប័ណ្ណបរទេសទៅជារូបិយប័ណ្ណខ្មែរ (KHR) ឬដុល្លារអាមេរិក (USD) តាមអត្រាប្តូរប្រាក់ជាក់ស្តែងរបស់ធនាគារ មុនពេលផ្ទេរប្រាក់ទៅអ្នកស្នើសុំ។
៦.៩ ប្រសិនបើធនាគារធ្វើការទូទាត់ក្រោមសេវាបេឡានិច័យដោយឯកសារ (DC) ឬសេវាជួញដូរឯកសារ នោះធនាគារមានសិទ្ធិទាមទារប្រាក់ទាំងអស់នោះមកវិញពីលោកអ្នកភ្លាមៗ រួមទាំងការប្រាក់ ថ្លៃសេវា និងថ្លៃសេវាផ្លូវច្បាប់ដែលពាក់ព័ន្ធ។ ធនាគារមានសិទ្ធិក្នុងការកាត់ទឹកប្រាក់ទាំងអស់ពីគណនីណាមួយរបស់លោកអ្នកដែលមាននៅធនាគារ ដោយមិនចាំបាច់ជូនដំណឹងជាមុនឡើយ។
៦.១០ ធនាគាររក្សាសិទ្ធិក្នុងការកែប្រែគោលនយោបាយផ្ទៃក្នុង តារាងថ្លៃសេវា និងនីតិវិធីប្រតិបត្តិការគ្រប់ពេល ដោយគោរពតាមច្បាប់ និងបទប្បញ្ញត្តិជាធរមាន។
ប្រការ ៧៖ វិធានគ្រប់គ្រង
៧.១ ការចេញ ការប្រតិបត្តិ និងការអនុវត្តការផ្តល់សេវាបេឡានិច័យដោយឯកសារ នឹងត្រូវបានគ្រប់គ្រងដោយវិធាន Uniform Rules for Collection (URC 522) និងសេវាជួញដូរឯកសារ នឹងត្រូវបានគ្រប់គ្រងដោយវិធាន Uniform Customs and Practice for Documentary Credits (UCP 600) លើកលែងតែមានការបញ្ជាក់ផ្សេងទៀត។
៧.២ ធនាគាររក្សាសិទ្ធិក្នុងការកំណត់ថា វិធានណាមួយ (UCP 600, URC 522) នឹងអនុវត្តចំពោះឯកសារនីមួយៗ ដោយផ្អែកលើលក្ខណៈនៃប្រតិបត្តិការ និងការសម្រេចរបស់ភាគីពាក់ព័ន្ធ។
៧.៣ ប្រសិនបើវិធានដែលគ្រប់គ្រង (ឧ. UCP ឬ URC) ត្រូវបានកែប្រែ ឬធ្វើបច្ចុប្បន្នភាពក្នុងអំឡុងពេលសុពលភាពនៃការផ្តល់សេវាបេឡានិច័យដោយឯកសារ ឬសេវាជួញដូរឯកសារ វិធានដែលបានបញ្ជាក់នៅពេលផ្តល់សេវាបេឡានិច័យដោយឯកសារ ឬសេវាជួញដូរឯកសារ នឹងត្រូវអនុវត្តបន្ត លើកលែងតែមានការយល់ព្រមជាលាយលក្ខណ៍អក្សរផ្សេងទៀត។
៧.៤ ក្នុងករណីមានភាពមិនស្របគ្នារវាងខចែងនិងលក្ខខណ្ឌនៅក្នុងកិច្ចព្រមព្រៀងនេះ និងវិធានអន្តរជាតិដូចដែលបានរៀបរាប់ខាងលើ វិធានអន្តរជាតិទាំងនោះនឹងត្រូវចាត់ទុកថាអសុពលភាពត្រឹមតែផ្នែកដែលមានភាពខុសគ្នានោះ។
ប្រការ ៨៖ លក្ខខណ្ឌនៃការទាមទារ និងការទូទាត់
៨.១ សំណើទាមទារត្រូវបានដាក់ស្នើនៅការិយាល័យដែលបានកំណត់របស់ធនាគារ ឬតាមវិធីសាស្ត្រដែលបានបញ្ជាក់ក្នុងលិខិត (ឧទាហរណ៍ តាមប្រព័ន្ធ SWIFT ឬអ្នកបញ្ជូន)។ សំណើនោះត្រូវតែទទួលបានមុន ឬនៅថ្ងៃផុតកំណត់នៃការផ្តល់សេវាបេឡានិច័យដោយឯកសារ ឬសេវាជួញដូរឯកសារ។
៨.២ លោកអ្នកយល់ព្រមថាសំណើ ឬការទាមទារណាមួយ ដែលបានដាក់ស្នើជាមួយធនាគារ ឬធនាគារអន្តរការី ដោយអ្នកទទួលផលនៃការផ្តល់សេវាបេឡានិច័យដោយឯកសារ ឬសេវាជួញដូរឯកសារ ឬដោយធនាគារអន្តរការីក្រោមការធានា នឹងត្រូវចាត់ទុកជាភស្តុតាងច្បាស់លាស់នៃចំនួនប្រាក់ដែលត្រូវបង់។ សំណើ ឬការទាមទារនេះនឹងត្រូវចាត់ទុកថាជាការបញ្ជាក់សិទ្ធិគ្រប់គ្រាន់សម្រាប់ឲ្យធនាគារ ឬធនាគារអន្តរការីធ្វើការទូទាត់ ដោយមិនចាំបាច់មានភស្តុតាងបន្ថែម ឬការផ្ទៀងផ្ទាត់សុពលភាពនៃចំនួនប្រាក់នោះ។ ធនាគារ ឬធនាគារអន្តរការីមិនមានកាតព្វកិច្ចក្នុងការជូនដំណឹង ឬស្នើសុំការផ្តល់សិទ្ធិបន្ថែមពីលោកអ្នកឡើយ។ លោកអ្នកយល់ព្រមមិនបដិសេធសុពលភាពនៃសំណើ ឬការទាមទារណាមួយនោះឡើយ។
៨.៣ លោកអ្នកក៏យល់ព្រមមិនសាកសួរ ឬតវ៉ានឹងសុពលភាព ឬភាពស្របច្បាប់នៃការទូទាត់ណាមួយដែលធ្វើឡើងដោយធនាគារ ឬធនាគារអន្តរការីនោះទេ។ លោកអ្នកនឹងមិនបដិសេធកាតព្វកិច្ចដោយផ្អែកលើមូលហេតុថាការទូទាត់នោះ ឬផ្នែកណាមួយនៃការទូទាត់នោះ មិនមែនជាកាតព្វកិច្ចរបស់ធនាគារ ឬធនាគារអន្តរការីទេ ឬមានការការពារសមហេតុផល ឬមូលហេតុសមហេតុផលក្នុងការបដិសេធការទូទាត់ក្រោមការផ្តល់សេវាបេឡានិច័យដោយឯកសារ ឬសេវាជួញដូរឯកសារ ឬដោយមូលហេតុផ្សេងទៀតណាមួយក៏ដោយ។
៨.៤ នៅពេលការទូទាត់ត្រូវបានអនុវត្តតាមលក្ខខណ្ឌនៃការផ្តល់សេវាបេឡានិច័យដោយឯកសារ ឬសេវាជួញដូរឯកសារ លោកអ្នកយល់ព្រមថាកាតព្វកិច្ចរបស់ធនាគារត្រូវបានបញ្ចប់។
ប្រការ ៩៖ ទ្រព្យធានា និងការផ្តល់សិទ្ធិលើគណនី
៩.១ លោកអ្នកយល់ព្រមឲ្យធនាគារទូទាត់ប្រាក់ក្នុងគណនីចរន្ត ឬគណនីផ្សេងទៀតរបស់លោកអ្នកដែលមាននៅធនាគារ ឬ LC ជាទ្រព្យធានាដើម្បីអនុញ្ញាតឲ្យធនាគារអាចទទួលបានការទាមទារណាមួយដែលកើតឡើងក្រោមការផ្តល់សេវាជួញដូរឯកសារ។
៩.២ នៅពេលមានការទាមទារពីធនាគារ លោកអ្នកត្រូវដាក់ប្រាក់បម្រុងជាមួយធនាគារភ្លាមៗ ដើម្បីរ៉ាប់រងកាតព្វកិច្ចរបស់ធនាគារក្រោមការផ្តល់សេវាបេឡានិច័យដោយឯកសារ ឬសេវាជួញដូរឯកសារ។
៩.៣ លោកអ្នកយល់ព្រម និងអនុញ្ញាតឲ្យធនាគារកាត់ប្រាក់ពីគណនីចរន្ត ឬគណនីផ្សេងទៀតដូចដែលបានបញ្ជាក់ខាងលើ ដើម្បីទូទាត់សម្រាប់ការទាមទារណាមួយដែលបានកើតឡើងចំពោះធនាគារក្រោមការផ្តល់សេវាបេឡានិច័យដោយឯកសារ ឬសេវាជួញដូរឯកសារ ដោយមិនចាំបាច់មានការជូនដំណឹងជាមុនទៅកាន់លោកអ្នក។
៩.៤ ធនាគារមានសិទ្ធិពេញលេញក្នុងការបំលែងចំនួនប្រាក់ដែលទទួលបានជារូបិយប័ណ្ណខ្មែរ (KHR) ឬដុល្លារអាមេរិក (USD) ដែលសមមូលទៅនឹងចំនួនទឹកប្រាក់ទាំងអស់ដែលធនាគារបានធ្វើការទូទាត់ក្រោមការផ្តល់សេវាបេឡានិច័យដោយឯកសារ ឬសេវាជួញដូរឯកសារ តាមអត្រាប្តូរប្រាក់ជាក់ស្តែងរបស់ធនាគារ។
ប្រការ ១០៖ ការកែប្រែ និងការលុបចោល
១០.១ ការកែប្រែ ឬការលុបចោលការផ្តល់សេវាបេឡានិច័យដោយឯកសារ ឬសេវាជួញដូរឯកសារ ត្រូវទទួលបានការយល់ព្រមជាលាយលក្ខណ៍អក្សរពីភាគីទាំងអស់ដែលពាក់ព័ន្ធ រួមទាំងអ្នកទទួលផលផងដែរ។
១០.២ ធនាគាររក្សាសិទ្ធិក្នុងការបដិសេធសំណើសុំកែប្រែ ឬលុបចោលណាមួយដោយផ្អែកតាមឆន្ទានុសិទ្ធិរបស់ខ្លួន។
ប្រការ ១១៖ ការប្រាក់
ក្នុងករណីដែលធនាគារបានធ្វើការទូទាត់ ឬផ្តល់កម្ចីជាមុន ក្រោមការផ្តល់សេវាបេឡានិច័យដោយឯកសារ ឬសេវាជួញដូរឯកសារ លោកអ្នកត្រូវទូទាត់សងប្រាក់ឲ្យធនាគារភ្លាមៗនៅពេលមានការទាមទារ។ ប្រសិនបើមិនបានសងតាមកាលកំណត់ ធនាគារមានសិទ្ធិក្នុងការគិតការប្រាក់លើចំនួនប្រាក់ដែលនៅជំពាក់ ដោយផ្អែកលើអត្រាដែលបានយល់ព្រមជាលាយលក្ខណ៍អក្សរ ឬបើមិនបានបញ្ជាក់ អត្រានឹងត្រូវអនុវត្តតាមអត្រាខ្ចីប្រាក់បច្ចុប្បន្នរបស់ធនាគារ។ ការប្រាក់នឹងចាប់ផ្តើមគិតចាប់ពីថ្ងៃដល់កំណត់សងរហូតដល់ការសងត្រូវបានទូទាត់ទាំងស្រុង ហើយអាចគិតបន្ថែមរៀងរាល់ខែតាមគោលនយោបាយរបស់ធនាគារ និងច្បាប់ជាធរមានរបស់ព្រះរាជាណាចក្រកម្ពុជា។
កិច្ចព្រមព្រៀងអតិថិជនស្តីពីសេវាកម្មកត់ត្រាចំណូល-ចំណាយ
ប្រការ ១៖ សេវាកម្មកត់ត្រាចំណូល-ចំណាយ
១.១ សេវាកម្មកត់ត្រាចំណូល-ចំណាយ សំដៅលើសេវាកម្មដែលផ្តល់ដោយធនាគារ ដែលអនុញ្ញាតឲ្យលោកអ្នកវិភាគទិន្នន័យហិរញ្ញវត្ថុតាមរយៈបណ្តាញធនាគារ។
១.២ តាមរយៈប្រតិបត្តិការ ឬការប្រើប្រាស់សេវាកម្មកត់ត្រាចំណូល-ចំណាយ លោកអ្នកយល់ព្រមភា្ជប់កាតព្វកិច្ចតាមរយៈកិច្ចព្រមព្រៀងអតិថិជនស្តីពីសេវាកម្មកត់ត្រាចំណូល-ចំណាយនេះ។
ប្រការ ២៖ ប្រតិបត្តិការ
២.១ លោកអ្នកត្រូវធានាឲ្យបានលើការចាប់ផ្តើម ឬអនុវត្តតាមសេចក្តីណែនាំរបស់អតិថិជនជាមួយនឹងទិន្នន័យ និងព័ត៌មានដែលត្រឹមត្រូវ។ ប្រសិនបើសេចក្តីណែនាំរបស់អតិថិជនដែលលោកអ្នកបានផ្តល់ជូនមិនមានទិន្នន័យគ្រប់គ្រាន់ ឬមានទិន្នន័យខុសប្រក្រតី ធនាគារអាចបដិសេធមិនធ្វើប្រតិបត្តិការតាមសេចក្តីណែនាំអតិថិជនតាមឆន្ទានុសិទ្ធិរបស់ខ្លួន។ ធនាគារត្រូវធ្វើប្រតិបត្តិការលើសេចក្តីណែនាំអតិថិជន ដោយផ្អែកលើព័ត៌មាន ទិន្នន័យ ឬឯកសារដែលលោកអ្នកបានផ្តល់ ឬបានភ្ជាប់ជូនតែប៉ុណ្ណោះ។ ធនាគារមិនត្រូវទទួលខុសត្រូវ ឬធានាលើការវិភាគទិន្នន័យ និងព័ត៌មានរបស់លោកអ្នកឡើយវៀរលែងតែព័ត៌មាន ទិន្នន័យ ឬឯកសារនោះត្រូវបានអនុញ្ញាតដោយធនាគារឲ្យបញ្ចូល ភ្ជាប់ ឬបំពេញនៅលើកម្មវិធីទូរសព្ទវីង។
២.២ ក្នុងករណីមានការអនុវត្តតាមសេចក្តីណែនាំរបស់អតិថិជន ដោយមិនមានការអនុញ្ញាត ឬមិនត្រឹមត្រូវ លោកអ្នកត្រូវជូនដំណឹងដល់ធនាគារភ្លាម។
២.៣ ធនាគារត្រូវចាត់ទុកថាបានបំពេញកាតព្វកិច្ចរបស់ខ្លួនដោយជោគជ័យ និងចប់សព្វគ្រប់ ស្របតាមសេចក្តីណែនាំរបស់អតិថិជនដែលលោកអ្នកបានបញ្ជូន បើទោះបីជាទិន្នន័យនៃសេចក្តីណែនាំរបស់អតិថិជនដែលលោកអ្នកបានបញ្ជូននោះមិនត្រឹមត្រូវ ឬមិនគ្រប់គ្រាន់ក៏ដោយ។ ក្នុងករណីនេះ ធនាគារមិនត្រូវទទួលខុសត្រូវលើទិន្នន័យ និងព័ត៌មានដែលមិនត្រឹមត្រូវនោះឡើយ។
២.៤ ធនាគារមានសិទ្ធិឲ្យតតិយជនចូលរួម ដោយផ្នែក ឬទាំងស្រុង ធ្វើប្រតិបត្តិការបញ្ជាអតិថិជនជូនធនាគារ។ ប្រសិនបើធនាគារមានករណីនេះកើតឡើង ធនាគារនឹងតម្រូវឲ្យតតិយជនដែលជាអ្នកផ្តល់សេវាកម្មគោរពកាតព្វកិច្ចដូចគ្នានឹងធនាគារ សម្រាប់ផ្តល់សេវាកម្មជូនលោកអ្នក។
ប្រការ ៣៖ ការកម្រិតការទទួលខុសត្រូវ
ធនាគារមិនត្រូវទទួលខុសត្រូវលើ (១) ប្រតិបត្តិការដែលមានការសង្ស័យ មិនមានការអនុញ្ញាត ឬមិនត្រឹមត្រូវ ដែលបានធ្វើឡើងពីគណនី ឬឧបករណ៍របស់លោកអ្នក (២) ការមិនធ្វើប្រតិបត្តិការ ភាពមិនត្រឹមត្រូវ ឬការពន្យារពេល លើការធ្វើប្រតិបត្តិការតាមសេចក្តីណែនាំរបស់អតិថិជន ដែលបណ្តាលមកពីកំហុសរបស់លោកអ្នក ឬករណីមានកំហុស ឬការបង្អាក់ប្រព័ន្ធរបស់ធនាគារដែលហួសពីការគ្រប់គ្រងរបស់ធនាគារ (៣) កំហុស ភាពខុសប្រក្រតី ភាពស្ទួនគ្នា និង/ឬ ភាពផ្ទុយគ្នាណាមួយក្នុងសេចក្តីណែនាំរបស់អតិថិជនរបស់លោកអ្នក (៤) ការពន្យារពេល ការបង្អាក់ ឬការផ្អាកក្នុងការផ្តល់សេវាកម្មណាមួយ ដែលបណ្តាលមកពីតតិយជន រួមមាន អ្នកផ្តល់សេវាកម្ម ឬដៃគូ ដែលធ្វើឲ្យប៉ះពាល់ ឬរំខានដល់ដំណើរការរបស់ធនាគារ។
កិច្ចព្រមព្រៀងអតិថិជនស្តីពីកម្មវិធីទូរសព្ទវីង
ប្រការ ១៖ សំណើ និងការទទួលយក
១.១ កិច្ចព្រមព្រៀងអតិថិជនស្តីពីកម្មវិធីទូរសព្ទវីងនេះ បង្កើតបានជាកិច្ចព្រមព្រៀងស្របច្បាប់ ដែលធ្វើឡើងរវាងលោកអ្នក ក្នុងឋានៈផ្ទាល់ខ្លួនតាមរយៈគណនីប្រភេទណាមួយដែលលោកអ្នកបានចុះឈ្មោះជាមួយធនាគារ។ លោកអ្នកទទួលស្គាល់ថា លោកអ្នកបានអាន និងយល់ព្រមលើកិច្ចព្រមព្រៀងអតិថិជនស្តីពីកម្មវិធីទូរសព្ទវីង មុនពេលលោកអ្នកចុះឈ្មោះប្រើប្រាស់កម្មវិធីទូរសព្ទវីង។
១.២ តាមរយៈការយល់ព្រមលើកិច្ចព្រមព្រៀងអតិថិជនស្តីពីកម្មវិធីទូរសព្ទវីង លោកអ្នកបញ្ជាក់ថាបានកំពុងប្រតិបត្តិការក្នុងឋានៈផ្ទាល់ខ្លួន និងទទួលខុសត្រូវចំពោះប្រតិបត្តិការដែលមិនបានអនុញ្ញាត ដែលបានចាប់ផ្តើមធ្វើប្រតិបត្តិការក្រោមឈ្មោះរបស់លោកអ្នក។ លោកអ្នកយល់ព្រមទទួលយកភាពមិនប្រក្រតីណាមួយដែលកើតឡើងពីប្រតិបត្តិការទាំងនេះ ដោយមិនចងកាតព្វកិច្ចទទួលខុសត្រូវណាមួយទៅនឹងធនាគារឡើយ។
១.៣ លោកអ្នកយល់ដឹងថា មានកាលៈទេសៈដែលអាចកើតឡើងដោយការបរាជ័យ ឬកំហុសរបស់ប្រព័ន្ធ ដោយសារព្រឹត្តិការណ៍មិនច្បាស់លាស់ដែលជាលក្ខណៈទូទៅនៃការផ្តល់សេវាកម្ម។ លោកអ្នកមានឆន្ទៈក្នុងការសហការជាមួយធនាគារ និងអនុវត្តទៅតាមនីតិវិធីជាធរមានរបស់ធនាគារ និងគោលការណ៍នៃច្បាប់ជាធរមានជំនួសការដោះស្រាយដោយមិនធ្វើឲ្យខូចប្រយោជន៍របស់ភាគីម្ខាងទៀត។ លោកអ្នកទទួលស្គាល់ និងយល់ព្រមចំពោះការកាត់ទឹកប្រាក់របស់ធនាគារ និងទូទាត់ចំនួនទឹកប្រាក់ដែលមានបញ្ហានៅក្នុងគណនីរបស់ លោកអ្នក ដោយមិនចាំបាច់មានការយល់ព្រម ឬអនុញ្ញាតពីលោកអ្នកទៅលើការចំណេញ ឬខាតបង់ដោយការបរាជ័យរបស់ប្រព័ន្ធធនាគារ ឬកំហុសរបស់មនុស្សណាមួយឡើយ។
១.៤ ព័ត៌មានដែលមាននៅលើកម្មវិធីទូរសព្ទវីង មិនមែនផ្តល់ក្នុងគោលបំណងសម្រាប់ចែកចាយ ឬប្រើប្រាស់ដោយបុគ្គល ឬស្ថាប័នណាមួយនៅស្ថិតនៅក្នុងយុត្តាធិការ ឬប្រទេសណាមួយ ដែលការចែកចាយ ឬប្រើប្រាស់នោះអាចផ្ទុយនឹងច្បាប់ ឬបទប្បញ្ញត្តិ ឬតម្រូវឲ្យយើងធ្វើការចុះបញ្ជីក្រោមយុត្តាធិការ ឬប្រទេសនោះឡើយ។
១.៥ ធនាគាររក្សាសិទ្ធិក្នុងការផ្លាស់ប្តូរ កែប្រែ បន្ថែម ឬដកចេញផ្នែកណាមួយនៃកិច្ចព្រមព្រៀងអតិថិជនស្តីពីកម្មវិធីទូរសព្ទវីងនេះ នៅពេលណាមួយ ដោយផ្តល់ការជូនដំណឹងជូនលោកអ្នកមុនកាលបរិច្ឆេទសុពលភាព។ លោកអ្នកនឹងត្រូវបានចាត់ទុកថាបានដឹង និងបានយល់ព្រមចំពោះការផ្លាស់ប្តូរណាមួយក្នុងកិច្ចព្រមព្រៀងអតិថិជនស្តីពីកម្មវិធីទូរសព្ទវីង តាមរយៈការបន្តប្រើប្រាស់កម្មវិធីទូរសព្ទវីងរបស់លោកអ្នក។
១.៦ ប្រសិនបើលោកអ្នកមិនយល់ព្រមលើកិច្ចព្រមព្រៀងអតិថិជនស្តីពីកម្មវិធីទូរសព្ទវីង និងការចំពោះការផ្លាស់ប្តូរនេះទេ នោះលោកអ្នកមានសិទ្ធិក្នុងបញ្ឈប់ការចុះឈ្មោះ ឬការប្រើប្រាស់កម្មវិធីទូរសព្ទវីងនេះបាន។
១.៧ ព័ត៌មាននៅលើកម្មវិធីទូរសព្ទវីង អាចនឹងមានកំហុសអក្ខរាវិរុទ្ធ ភាពមិនត្រឹមត្រូវ ឬការខ្វះខាត រួមទាំង ពិពណ៌នា តម្លៃ ភាពប្រាកដថាមាន និងព័ត៌មានផ្សេងៗទៀត។ យើងរក្សាសិទ្ធិគ្រប់យ៉ាងក្នុងការកែតម្រូវរាល់កំហុស ភាពមិនត្រឹមត្រូវ ឬការខ្វះខាត និងកែប្រែ ឬធ្វើបច្ចុប្បន្នភាពព័ត៌មាននៅលើកម្មវិធីទូរសព្ទវីងគ្រប់ពេលវេលា ដោយមិនមានការជូនដំណឹងជាមុន។
ប្រការ ២៖ ការរឹតត្បិតការប្រើប្រាស់
២.១ កម្មវិធីទូរសព្ទវីង មានគោលបំណងអនុញ្ញាតសម្រាប់អ្នកប្រើប្រាស់ដែលមានអាយុចាប់ពី ១៥ (ដប់ប្រាំ) ឆ្នាំឡើងទៅគិតចាប់ពីថ្ងៃបើកគណនី។ បុគ្គលដែលមានអាយុក្រោមច្បាប់កំណត់ (អនីតិជន) មិនត្រូវបានអនុញ្ញាតឲ្យប្រើប្រាស់ ឬចុះឈ្មោះសម្រាប់កម្មវិធីទូរសព្ទវីងឡើយលុះត្រាតែមានការព្រមព្រៀងពីឪពុកម្តាយ ឬអាណាព្យាបាលក្នុងការប្រើប្រាស់កម្មវិធីទូរសព្ទវីង និងទទួលយកកិច្ចព្រមព្រៀងអតិថិជនស្តីពីកម្មវិធីទូរសព្ទវីង។
២.២ ទោះជាយ៉ាងណាក៏ដោយ អ្នកប្រើប្រាស់ដែលមានអាយុចន្លោះពី ១៥ (ដប់ប្រាំ) ឆ្នាំ ដល់ក្រោម ១៨ (ដប់ប្រាំបី) ឆ្នាំ នឹងត្រូវគ្រប់គ្រងដោយការរឹតត្បឹតមួយចំនួនដូចជា ការស្នើសុំឥណទាន ការប្រើប្រាស់កាត ការកំណត់ប្រតិបត្តិការផ្សេងៗ ការដកប្រាក់ និង/ឬ ការផ្ទេរប្រាក់ចេញពី ឬចូលទៅក្នុងគណនីជាមួយការកម្រិតទាំងនេះ និងការរឹតត្បឹតផ្សេងទៀតដែលបានកំណត់ដោយធនាគារ។
ប្រការ ៣៖ សកម្មភាពហាមឃាត់
៣.១ លោកអ្នកមិនអាចចូល ឬប្រើប្រាស់កម្មវិធីទូរសព្ទវីង សម្រាប់គោលបំណងណាមួយផ្សេងពីគោលបំណងដែលយើងបានអនុញ្ញាតលើកម្មវិធីទូរសព្ទវីងឡើយ។ កម្មវិធីទូរសព្ទវីង មិនអាចត្រូវបានប្រើប្រាស់ពាក់ព័ន្ធនឹងកិច្ចការពាណិជ្ជកម្មណាមួយឡើយ លើកលែងតែមានការយល់ព្រមជាក់លាក់ ឬអនុម័តដោយធនាគារ។
៣.២ ក្នុងនាមជាអ្នកប្រើប្រាស់កម្មវិធីទូរសព្ទវីង លោកអ្នកយល់ព្រមមិន៖
(១) ធ្វើប្រតិបត្តិការទូទាត់ខុសច្បាប់ ឬការផ្ទេរប្រាក់ខុសច្បាប់ ឬសកម្មភាពណាមួយដែលពាក់ព័ន្ធនឹងហិរញ្ញប្បទានភេរវកម្ម។
(២) ទាញយកទិន្នន័យ ឬខ្លឹមសារផ្សេងទៀតពីកម្មវិធីទូរសព្ទវីងដើម្បីបង្កើត ឬចងក្រងដោយផ្ទាល់ ឬដោយប្រយោល ដែលជាការប្រមូល ចងក្រង ទិន្នន័យ ឬថត ដោយមិនមានការអនុញ្ញាតជាលាយលក្ខណ៍អក្សរពីយើងខ្ញុំឡើយ។
(៣) ប្រើប្រាស់កម្មវិធីទូរសព្ទវីងដើម្បីផ្សព្វផ្សាយ ឬផ្តល់ជូនការលក់ទំនិញ និងសេវាកម្ម។
(៤) ចូលរួមក្នុងការរៀបចំបង្កើត ឬភ្ជាប់ដោយគ្មានការអនុញ្ញាតទៅកាន់កម្មវិធីទូរសព្ទវីង។
(៥) បោកបញ្ឆោត ឆបោក ឬបំភ័ន្តយើងខ្ញុំ និងអ្នកប្រើប្រាស់ផ្សេងទៀត ជាពិសេសការប៉ុនប៉ងណាមួយ ដើម្បីស្វែងរក ព័ត៌មានសំខាន់នៃគណនី ដូចជាពាក្យសម្ងាត់របស់អ្នកប្រើប្រាស់។
(៦) ប្រើប្រាស់សេវាកម្មគាំទ្ររបស់យើងខ្ញុំដោយមិនត្រឹមត្រូវ ឬដាក់របាយការណ៍មិនពិតអំពីការរំលោភបំពាន ឬការប្រព្រឹត្តខុស។
(៧) ជ្រៀតចូល រំខាន ឬបង្កើតបន្ទុកធ្ងន់ធ្ងរណាមួយលើកម្មវិធីទូរសព្ទវីង ឬបណ្តាញ ឬសេវាកម្មដែលភ្ជាប់ទៅនឹងកម្មវិធីទូរសព្ទវីង។
(៨) ប៉ុនប៉ងក្លែងបន្លំធ្វើជាអ្នកប្រើប្រាស់ ឬបុគ្គលផ្សេងទៀត ឬប្រើឈ្មោះអ្នកប្រើប្រាស់ និងលេខសម្ងាត់របស់អ្នកប្រើប្រាស់ដទៃទៀត។
(៩) ប្រើប្រាស់ព័ត៌មានដែលទទួលបានពីកម្មវិធីទូរសព្ទវីង (Wing Bank App) ដើម្បីបៀតបៀន បំពាន ឬបង្កគ្រោះថ្នាក់ទៅដល់បុគ្គលដទៃទៀត។
(១០) ប្រើប្រាស់កម្មវិធីទូរសព្ទវីងក្នុងលក្ខណៈណាមួយដើម្បីប្រកួតប្រជែងជាមួយយើងខ្ញុំ ឬប្រើកម្មវិធីទូរសព្ទវីង និង/ឬ មាតិកាសម្រាប់ទាញប្រាក់ចំណូល។
(១១) ប៉ុនប៉ងគេចវេះវិធានការណាមួយនៃកម្មវិធីទូរសព្ទវីង ដែលបង្កើតឡើងដើម្បីបញ្ជៀស ឬរឹតត្បឹតលើការចូលទៅប្រើប្រាស់កម្មវិធីទូរសព្ទវីង ឬផ្នែកណាមួយនៃកម្មវិធីទូរសព្ទវីង។
(១២) បៀតបៀន រំខាន បំភិតបំភ័យ ឬគំរាមកំហែងដល់បុគ្គលិក ឬភ្នាក់ងារណាមួយរបស់យើងខ្ញុំ ដែលបានចូលរួមជាផ្នែកណាមួយក្នុងការផ្តល់កម្មវិធីទូរសព្ទវីងជូនលោកអ្នក។
(១៣) បង្ហោះ ឬបញ្ជូន (ឬប៉ុនប៉ងបង្ហោះ ឬបញ្ជូន) មេរោគ ឬវត្ថុផ្សេងៗទៀត រួមទាំងការប្រើប្រាស់ហួសហេតុ និងការផ្ញើសារដែលមិនចាំបាច់ (ការបង្ហោះអត្ថបទដដែលៗ) ដែលរំខានដល់ការប្រើប្រាស់ និងភាពរីករាយរបស់ភាគីណាមួយនៅលើកម្មវិធីទូរសព្ទវីង ឬកែប្រែ ធ្វើឲ្យខូចគុណភាព រំខាន ផ្លាស់ប្តូរ ឬប៉ះពាល់ដល់ការប្រើប្រាស់ ទម្រង់ មុខងារ ប្រតិបត្តិការ ឬការថែទាំកម្មវិធីទូរសព្ទវីង។
ប្រការ ៤៖ ការអះអាង និងការធានា
តាមរយៈការប្រើប្រាស់កម្មវិធីទូរសព្ទវីង លោកអ្នកអះអាង និងធានាថា៖
(១) រាល់ការយកចិត្តទុកដាក់ស្គាល់អតិថិជនតាមប្រព័ន្ធឌីជីថល គឺជាព័ត៌មានពិត ត្រឹមត្រូវ បច្ចុប្បន្នភាព និងពេញលេញ។
(២) លោកអ្នកត្រូវគ្រប់គ្រងលើភាពត្រឹមត្រូវ នៃការយកចិត្តទុកដាក់ស្គាល់អតិថិជនតាមប្រព័ន្ធឌីជីថល ហើយធ្វើបច្ចុប្បន្នភាពទៅលើការយកចិត្តទុកដាក់ស្គាល់អតិថិជនតាមប្រព័ន្ធឌីជីថលភ្លាមៗប្រសិនបើមានការកែប្រែណាមួយ។
(៣) លោកអ្នកនឹងប្រើប្រាស់កម្មវិធីទូរសព្ទវីង ដោយស្មោះត្រង់ និងស្របតាមច្បាប់ និងបទប្បញ្ញត្តិជាធរមានទាំងអស់ រួមទាំងច្បាប់ពាក់ព័ន្ធនឹងការប្រឆាំងការសម្អាតប្រាក់ និងហិរញ្ញប្បទានភេរវកម្ម។
(៤) លោកអ្នកមានសមត្ថភាពផ្លូវច្បាប់ ហើយលោកអ្នកយល់ព្រមអនុវត្តតាមកិច្ចព្រមព្រៀងអតិថិជនស្តីពីកម្មវិធីទូរសព្ទវីងនេះ។
(៥) លោកអ្នកមិនត្រូវប្រើប្រាស់កម្មវិធីទូរសព្ទវីង សម្រាប់គោលបំណងខុសច្បាប់ ឬគ្មានការអនុញ្ញាតឡើយ ដែលអាចបង្កឲ្យមានការរឹតត្បឹតផ្នែកផ្លូវច្បាប់។ និង
(៦) លោកអ្នកយល់ព្រមផ្តល់សំណងដល់យើងខ្ញុំ បុត្រសម្ព័ន្ធរបស់យើងខ្ញុំ អភិបាល និយោជិត ភ្នាក់ងារ និងអ្នកតំណាង និងមិនឲ្យពួកគេមានការខូចខាត ការបាត់បង់ ការទាមទារ និងការទទួលខុសត្រូវណាមួយ (រួមទាំងថ្លៃចំណាយសេវាផ្នែកច្បាប់ដោយគណនាជាការផ្តល់សំណងទាំងស្រុង) ដែលអាចកើតឡើងពីការបំពានខចែង និងលក្ខខណ្ឌរបស់លោកអ្នកលើកិច្ចព្រមព្រៀងអតិថិជនស្តីពីកម្មវិធីទូរសព្ទវីង ឬកិច្ចព្រមព្រៀងបំពេញបន្ថែមណាមួយជាមួយយើងខ្ញុំ។
ប្រការ ៥៖ សេវាកម្ម និងផលិតផលលើកម្មវិធីទូរសព្ទវីង
៥.១ លោកអ្នកអាចប្រើប្រាស់សេវាកម្ម និងផលិតផលដែលមានលើកម្មវិធីទូរសព្ទវីងតែប៉ុណ្ណោះ ប្រសិនបើលោកអ្នកជាម្ចាស់គណនីវីង។ កម្មវិធីទូរសព្ទវីង មានផ្តល់ជូននូវសេវាកម្ម ឬផលិតផលដែលផ្តល់ដោយវីង ឬតតិយជន ដែលបានអនុញ្ញាតដោយធនាគារក្នុងការផ្តល់សេវាកម្ម និងផលិតផលរបស់តាមរយៈកម្មវិធីទូរសព្ទវីង។
៥.២ រាល់សេវាកម្ម និងផលិតផលរបស់ធនាគារ ដែលមានលើកម្មវិធីទូរសព្ទវីង ត្រូវកំណត់ថាជាការផ្តល់ “ត្រឹមកម្រិត” ដែលបានផ្តល់នោះតែប៉ុណ្ណោះ និងត្រូវគ្រប់គ្រងដោយកិច្ចព្រមព្រៀងអតិថិជនស្តីពីកម្មវិធីទូរសព្ទវីង និងលក្ខខណ្ឌជាក់លាក់នីមួយៗនៃសេវាកម្ម និងផលិតផលដែលបានជ្រើសរើសនោះ។ ការប្រើប្រាស់សេវាកម្ម និងផលិតផលរបស់លោកអ្នកនឹងត្រូវភ្ជាប់នូវការទទួលយក និងការអនុវត្តនូវខចែង និងលក្ខខណ្ឌដែលមានចែងសម្រាប់សេវាកម្ម និងផលិតផលនោះ។
៥.៣ លោកអ្នកអាចនឹងស្វែងរកសេវាកម្ម និងផលិតផលរបស់តតិយជន (ស្ថាប័នផ្សេងៗក្រៅពីស្ថាប័នហិរញ្ញវត្ថុ) នៅលើកម្មវិធីទូរសព្ទវីង។ ដើម្បីចៀសវាងការភ័ន្តច្រលំ សេវាកម្ម និងផលិតផលរបស់តតិយជនលើកម្មវិធីទូរសព្ទវីង ជាការផ្តល់ឲ្យដោយតតិយជននោះដោយផ្ទាល់ ដោយស្របតាមច្បាប់ជាធរមាន។ ក្នុងន័យនេះធនាគារ គ្រាន់តែជាអ្នកផ្តល់កម្មវិធីទូរសព្ទវីង សម្រាប់ជាបណ្តាញក្នុងការផ្តល់សេវាកម្ម និងផលិតផលរបស់តតិយជន សម្រាប់លោកអ្នកជ្រើសរើសតែប៉ុណ្ណោះ។ ការប្រើប្រាស់សេវាកម្ម និងផលិតផលរបស់តតិយជនក្នុងកម្មវិធីទូរសព្ទវីង នឹងត្រូវគ្រប់គ្រងដោយកិច្ចព្រមព្រៀទាំងនេះ ភ្ជាប់ជាមួយនឹងការទទួលយក និងការអនុវត្តនូវខចែង និងលក្ខខណ្ឌដែលមានចែងសម្រាប់សេវាកម្ម និងផលិតផលរបស់តតិយជននោះ។
៥.៤ យើងខ្ញុំមិនធានាថាពណ៌ លក្ខណៈ យថាប្រភេទ គុណភាព និងព័ត៌មានលម្អិតនៃសេវាកម្ម ឬផលិតផលដែលបង្ហាញនៅលើកម្មវិធីទូរសព្ទវីង នឹងមានភាពត្រឹមត្រូវ ពេញលេញ អាចទុកចិត្តបាន មានបច្ចុប្បន្នភាព ឬមិនមានកំហុសផ្សេងទៀត ហើយការបង្ហាញតាមរយៈប្រព័ន្ធអេឡិចត្រូនិករបស់លោកអ្នក អាចនឹងមិនបង្ហាញពីភាពជាក់ស្តែងនៃពណ៌ និងភាពលម្អិតនៃសេវាកម្ម ឬផលិតផលឡើយ។
៥.៥ លោកអ្នកយល់ព្រមថាអត្រាប្តូរប្រាក់ និងការគណនាដែលដាក់បង្ហាញនៅលើកម្មវិធីទូរសព្ទវីង គឺសម្រាប់ព័ត៌មានយោងទូទៅតែប៉ុណ្ណោះ ហើយលោកអ្នកយល់ថា អត្រាប្តូរប្រាក់នោះអាចមិនត្រូវបានដាក់បង្ហាញជាក់ស្តែង ហើយការអនុវត្តចំពោះលោកអ្នកក្នុងប្រតិបត្តិការអាចខុសពីអត្រាការប្រាក់ដែលបានដាក់បង្ហាញនៅលើកម្មវិធីទូរសព្ទវីង។
ប្រការ ៦៖ គេហទំព័រតតិយជន និងមាតិកានៅលើកម្មវិធីទូរសព្ទវីង
៦.១ កម្មវិធីទូរសព្ទវីងអាចមាន (ឬលោកអ្នកអាចបញ្ជូនតាមរយៈកម្មវិធីទូរសព្ទវីង) នូវតំណភ្ជាប់ទៅកាន់គេហទំព័រផ្សេងទៀត (“គេហទំព័រតតិយជន”) ក៏ដូចជាខចែង រូបថត អត្ថបទ ក្រាហ្វិក រូបភាព ការរចនា តន្ត្រី សំឡេង វីដេអូ ព័ត៌មាន កម្មវិធី សូហ្វវែ និងមាតិកាផ្សេងទៀត ឬចំណុចផ្សេងទៀតដែលជាកម្មសិទ្ធិ ឬប្រភពមកពីតតិយជន (“មាតិកាតតិយជន”)។
៦.២ គេហទំព័រតតិយជន និងមាតិកាតតិយជននេះ អាចមិនត្រូវបានស៊ើបអង្កេត គ្រប់គ្រង ឬត្រួតពិនិត្យសម្រាប់ភាពត្រឹមត្រូវ ភាពសមស្រប ឬភាពពេញលេញដោយយើងខ្ញុំឡើយ ហើយយើងខ្ញុំមិនទទួលខុសត្រូវចំពោះគេហទំព័រតតិយជនណាមួយតាមរយៈកម្មវិធីទូរសព្ទវីង ឬមាតិកាតតិយជនណាមួយដែលបានបង្ហោះ ហើយអាចរកបានតាមរយៈ ឬការដំឡើងពីកម្មវិធីទូរសព្ទវីង រួមទាំងមាតិកា ភាពត្រឹមត្រូវ ការវាយប្រហារ មតិយោបល់ ភាពអាចទុកចិត្តបាន ការអនុវត្តសិទ្ធិឯកជន ឬគោលការណ៍ផ្សេងទៀតដែលមាននៅក្នុងគេហទំព័រតតិយជន ឬមាតិកាតតិយជន។
៦.៣ ការបញ្ចូល ការភ្ជាប់ ឬការអនុញ្ញាតឲ្យប្រើប្រាស់ ឬដំឡើង គេហទំព័រភាគីទី ឬមាតិកាតតិយជនណាមួយ មិនត្រូវបានចាត់ទុកជាការអនុម័ត ឬការគាំទ្រពីធនាគារនោះទេ។ ប្រសិនបើលោកអ្នកសម្រេចចិត្តចាកចេញពីវីកម្មវិធីទូរសព្ទវីង ហើយចូលទៅកាន់គេហទំព័រតតិយជន ដើម្បីប្រើប្រាស់ ឬដំឡើងមាតិកាតតិយជនណាមួយ លោកអ្នកត្រូវប្រឈមនឹងហានិភ័យដោយខ្លួនឯង ហើយលោកអ្នកត្រូវជ្រាបថា កិច្ចព្រមព្រៀងអតិថិជនស្តីពីកម្មវិធីទូរសព្ទវីង នឹងមិនគ្រប់គ្រងលើការចូលទៅកាន់គេហទំព័រតតិយជន និងការប្រើប្រាស់មាតិកាតតិយជននោះទេ។
៦.៤ លោកអ្នកត្រូវពិនិត្យមើលខចែង និងលក្ខខណ្ឌ និងគោលនយោបាយជាធរមាន រួមទាំងការអនុវត្តសិទ្ធិឯកជន និងការប្រមូលទិន្នន័យពីគេហទំព័រណាមួយដែលលោកអ្នកចូលប្រើប្រាស់ តាមរយៈកម្មវិធីទូរសព្ទវីង ឬទាក់ទងនឹងកម្មវិធីណាមួយដែលលោកអ្នកប្រើប្រាស់ ឬដំឡើងពីកម្មវិធីទូរសព្ទវីង។ រាល់ការទិញណាមួយដែលលោកអ្នកធ្វើឡើងតាមរយៈគេហទំព័រតតិយជន គឺធ្វើឡើងតាមរយៈគេហទំព័រផ្សេង និងពីក្រុមហ៊ុនផ្សេងទៀត ដូច្នេះយើងខ្ញុំមិនទទួលខុសត្រូវអ្វីទាំងអស់ដែលទាក់ទងនឹងការទិញនោះ ដែលធ្វើឡើងដោយឡែករវាងលោកអ្នក និងតតិយជន។
ប្រការ ៧៖ សំណើ
៧.១ លោកអ្នកទទួលស្គាល់ និងយល់ព្រមថា រាល់សំណួរ មតិយោបល់ ការផ្ដល់យោបល់ គំនិត មតិកែលម្អ ឬព័ត៌មានផ្សេងទៀតទាក់ទងនឹងកម្មវិធីទូរសព្ទវីង (“សំណើ”) ដែលលោកអ្នកផ្ដល់ជូនធនាគារ គឺមិនមែនជាព័ត៌មានសម្ងាត់នោះទេ ហើយនឹងត្រូវក្លាយជាកម្មសិទ្ធិរបស់យើងខ្ញុំទាំងស្រុង។ យើងខ្ញុំទទួលបានសិទ្ធិផ្តាច់មុខ រួមទាំងសិទ្ធិកម្មសិទ្ធិបញ្ញាទាំងអស់ និងមានសិទ្ធិក្នុងការប្រើប្រាស់ និងការផ្សព្វផ្សាយដោយគ្មានការរឹតត្បិតនៃសំណើទាំងនោះ សម្រាប់គោលបំណងស្របច្បាប់ណាមួយ ពាណិជ្ជកម្ម ដោយមិនតម្រូវឲ្យមានការទទួលស្គាល់ ឬសំណងជូនលោកអ្នកឡើយ។
៧.២ លោកអ្នកលះបង់សិទ្ធិសីលធម៌ទាំងអស់ចំពោះសំណើ ហើយលោកអ្នកធានាថាខ្លឹមសារនៃសំណើជាច្បាប់ដើមរបស់លោកអ្នក ឬលោកអ្នកមានសិទ្ធិក្នុងការដាក់សំណើទាំងនោះ។ លោកអ្នកយល់ព្រមនឹងមិនមានការទាមទារប្រឆាំងនឹងយើងខ្ញុំលើការចោទប្រកាន់ ឬការរំលោភបំពានជាក់ស្តែងណាមួយ ឬការក្លែងបន្លំនូវកម្មសិទ្ធិណាមួយនៅក្នុងខ្លឹមសារនៃសំណើរបស់លោកអ្នក។
ប្រការ ៨៖ ទំនាក់ទំនងអេឡិចត្រូនិក ប្រតិបត្តិការ និងហត្ថលេខា
៨.១ ការចូលទៅកាន់កម្មវិធីទូរសព្ទវីង ការផ្ញើអ៊ីមែលមកកាន់យើងខ្ញុំ និងការបំពេញទម្រង់តាមរយៈអនឡាញ គឺជាទំនាក់ទំនងអេឡិចត្រូនិក។ លោកអ្នកយល់ព្រមទទួលការទាក់ទងតាមរយៈអេឡិចត្រូនិក ហើយលោកអ្នកយល់ព្រមថា រាល់កិច្ចព្រមព្រៀង ការជូនដំណឹង ការបង្ហាញ និងការទំនាក់ទំនងផ្សេងទៀត ដែលយើងខ្ញុំផ្តល់ជូនលោកអ្នកតាមអេឡិចត្រូនិក តាមរយៈអ៊ីមែល និងនៅលើវីកម្មវិធីទូរសព្ទវីង បំពេញរាល់តម្រូវការផ្លូវច្បាប់ ដែលការទំនាក់ទំនងទាំងនេះត្រូវធ្វើជាលាយលក្ខណ៍អក្សរ។ លោកអ្នកយល់ព្រមចំពោះការប្រើប្រាស់ហត្ថលេខាអេឡិចត្រូនិក កិច្ចសន្យា ការបញ្ជាទិញ និងកំណត់ត្រាផ្សេងទៀត និងចំពោះការបញ្ជូនជាអេឡិចត្រូនិកនូវសេចក្តីជូនដំណឹង គោលនយោបាយ និងកំណត់ត្រានៃប្រតិបត្តិការដែលយើងបានចាប់ផ្តើម ឬបញ្ចប់ តាមរយៈកម្មវិធីទូរសព្ទវីង។
៨.២ លោកអ្នកយល់ព្រមលះបង់រាល់តម្រូវការដែលស្ថិតក្រោមការសរសេរជាលាយលក្ខណ៍អក្សរ ឬដែលតម្រូវឲ្យមានហត្ថលេខាផ្ទាល់ ឬការបញ្ជូន ឬការរក្សាទុកកំណត់ត្រាដែលមិនមែនជាអេឡិចត្រូនិក ឬការទូទាត់ ឬការផ្តល់ឥណទានតាមមធ្យោបាយណាមួយក្រៅពីមធ្យោបាយអេឡិចត្រូនិក លុះត្រាតែតម្រូវការទាំងនោះត្រូវបានកំណត់ជាពិសេស ឬតម្រូវដោយច្បាប់ ឬបទប្បញ្ញត្តិជាធរមាន។
ប្រការ ៩៖ ការគ្រប់គ្រងកម្មវិធីទូរសព្ទវីង
យើងរក្សាសិទ្ធិ ប៉ុន្តែមិនមែនជាកាតព្វកិច្ច ដើម្បី៖
(១) ត្រួតពិនិត្យកម្មវិធីទូរសព្ទវីងចំពោះការរំលោភបំពានលើកិច្ចព្រមព្រៀងអតិថិជនស្តីពីកម្មវិធីទូរសព្ទវីង។
(២) ចាត់វិធានការផ្លូវច្បាប់សមស្របចំពោះជនណាដែលបំពានច្បាប់ ឬកិច្ចព្រមព្រៀងអតិថិជនស្តីពីកម្មវិធីទូរសព្ទវីងនេះ តាមឆន្ទានុសិទ្ធិរបស់យើងខ្ញុំទាំងស្រុង រួមបញ្ចូលតែមិនកម្រិតត្រឹម ការរាយការណ៍អ្នកប្រើប្រាស់ខុសច្បាប់ទាំងនោះទៅអាជ្ញាធរដែលអនុវត្តច្បាប់។
(៣) គ្រប់គ្រងកម្មវិធីទូរសព្ទវីង តាមរបៀបដែលត្រូវបានរៀបចំឡើងដើម្បីការពារសិទ្ធិ និងទ្រព្យសម្បត្តិរបស់យើងខ្ញុំ និងដើម្បីជួយសម្រួលដល់ដំណើរការត្រឹមត្រូវនៃកម្មវិធីទូរសព្ទវីង។
(៤) ស្នើសុំលោកអ្នកឲ្យផ្តល់ឯកសារបន្ថែម ទាក់ទងនឹងការយកចិត្តទុកដាក់ស្គាល់អតិថិជនតាមប្រព័ន្ធឌីជីថល ប្រសិនបើយើងខ្ញុំរកឃើញថាឯកសារការយកចិត្តទុកដាក់ស្គាល់អតិថិជនតាមប្រព័ន្ធឌីជីថល មិនគ្រប់គ្រាន់ ឬបាត់បង់ ឬឯកសារបញ្ជាក់អត្តសញ្ញាណមិនត្រឹមត្រូវ ឬឯកសារការយកចិត្តទុកដាក់ស្គាល់អតិថិជនតាមប្រព័ន្ធឌីជីថលដែលត្រូវការមិនបានបំពេញ។
(៥) កែប្រែ ឬបង្វិលវិញនូវប្រតិបត្តិការ ដែលបណ្តាលមកពីកំហុសរបស់មនុស្ស ឬប្រព័ន្ធ ដែលលោកអ្នកមិនមានសិទ្ធិទទួលបានហើយលោកអ្នកយល់ព្រមឲ្យធនាគារអនុវត្តការកែប្រែដូចដែលបានបញ្ជាក់។
ប្រការ ១០៖ ការជូនដំណឹងក្នុងកម្មវិធីទូរសព្ទវីង
យើងនឹងផ្ញើព័ត៌មានអំពីផលិតផល ឬសេវាកម្មថ្មីៗ ឬដែលបានធ្វើបច្ចុប្បន្នភាព ការផ្សព្វផ្សាយ ការប្រមូលផ្តុំផ្សេងៗ ការផ្លាស់ប្តូរខចែង និងលក្ខខណ្ឌផ្សេងៗ និងព័ត៌មានផ្សេងទៀតអំពីធនាគារ ឬតតិយជនណាមួយទៅកាន់លោកអ្នកតាមរយៈការជូនដំណឹងក្នុងកម្មវិធី។ យើងលើកទឹកចិត្តឲ្យលោកអ្នកបើកការជូនដំណឹងក្នុងកម្មវិធី ដើម្បីអនុញ្ញាតឲ្យលោកអ្នកទទួលបានព័ត៌មានថ្មីៗទាន់ពេលវេលា និងជូនដំណឹងអំពីកម្មវត្ថុដែលមានក្នុងការជូនដំណឹងនោះ។
ប្រការ ១១៖ សុវត្ថិភាពនៃកម្មវិធីទូរសព្ទវីង
១១.១ លោកអ្នកត្រូវទទួលខុសត្រូវ និងខិតខំឲ្យអស់ពីសមត្ថភាពដើម្បីការពារការប្រើប្រាស់ ឬការចូលប្រើកម្មវិធីទូរសព្ទវីងដោយគ្មានការអនុញ្ញាតនៅលើទូរសព្ទដៃ ឬឧបករណ៍ផ្សេងៗរបស់លោកអ្នក ដើម្បីការពារព័ត៌មានផ្ទាល់ខ្លួន និងព័ត៌មានសុវត្ថិភាព រួមមានឈ្មោះអ្នកប្រើប្រាស់ និងពាក្យសម្ងាត់របស់លោកអ្នកគ្រប់ពេលវេលា។
១១.២ លោកអ្នកត្រូវជូនដំណឹងទៅធនាគារភ្លាមៗនៅពេលដែលលោកអ្នកដឹងថា៖
(១) ឧបករណ៍ចល័តរបស់លោកអ្នកបានបាត់ ឬត្រូវបានលួច។
(២) ព័ត៌មានសុវត្ថិភាពរបស់លោកអ្នកត្រូវបានដឹងដោយបុគ្គលម្នាក់ ឬច្រើន។
(៣) មានបុគ្គលផ្សេងអាចបើកដំណើការឧបករណ៍ចល័ត និងកម្មវិធីទូរសព្ទវីងរបស់លោកអ្នកបាន។
(៤) មានការចូលប្រើគណនីរបស់លោកអ្នកដោយគ្មានការអនុញ្ញាតនៅលើកម្មវិធីទូរសព្ទវីង។
(៥) លោកអ្នកសម្គាល់ឃើញថាកម្មវិធីទូរសព្ទវីង កំពុងស្នើឲ្យលោកអ្នកធ្វើការបើកដំណើរការកម្មវិធីឡើងវិញ ដែលមានន័យថាកម្មវិធីទូរសព្ទវីងកំពុងត្រូវបានបើកដំណើរការជាមួយព័ត៌មានសុវត្ថិភាពរបស់លោកអ្នកលើឧបករណ៍ដទៃទៀត។
ប្រការ ១២៖ សិទ្ធិកម្មសិទ្ធិបញ្ញា
១២.១ លើកលែងតែមានការបញ្ជាក់ផ្សេងពីនេះ កម្មវិធីទូរសព្ទវីងគឺជាកម្មសិទ្ធិរបស់យើង និងប្រភពកូដ មូលដ្ឋានទិន្នន័យ មុខងារ កម្មវិធីសូហ្វវែ ការរចនា សំឡេង វីដេអូ អត្ថបទ រូបថត និងក្រាហ្វិកនៅលើកម្មវិធីទូរសព្ទវីង (ជារួមហៅថា “មាតិកា”) និងពាណិជ្ជសញ្ញា សេវាសញ្ញា និងនិមិត្តសញ្ញាដែលមានក្នុងនោះ (“ម៉ាក”) គឺជាកម្មសិទ្ធិ ឬគ្រប់គ្រងដោយយើងខ្ញុំ ឬផ្តល់អាជ្ញាប័ណ្ណឲ្យយើងខ្ញុំ។
១២.២ មាតិកា និងម៉ាក ដែលមាននៅលើកម្មវិធីទូរសព្ទវីងគឺផ្អែកលើមូលដ្ឋាន “លក្ខខណ្ឌដែលមានស្រាប់ (As-Is)” ហើយមាតិកា ឬម៉ាកទាំងនោះ គឺសម្រាប់តែជាព័ត៌មាន និងការប្រើប្រាស់ផ្ទាល់ខ្លួនដល់លោកអ្នកប៉ុណ្ណោះ។ លើកលែងតែមានចែងនៅក្នុងខចែង និងលក្ខខណ្ឌនេះ ពុំមានផ្នែកណាមួយនៃកម្មវិធីទូរសព្ទវីង និងពុំមានមាតិកា ឬម៉ាកណាមួយ អាចត្រូវបានថតចម្លង ផលិតឡើងវិញ ប្រមូលផ្តុំ បោះពុម្ពឡើងវិញ បង្ហោះ បង្ហាញជាសាធារណៈ កូដការ បកប្រែ បញ្ជូន ចែកចាយ លក់ ផ្ដល់អាជ្ញាប័ណ្ណ ឬការធ្វើអាជីកម្មផ្សេងទៀត សម្រាប់គោលបំណងពាណិជ្ជកម្មណាមួយ ដោយគ្មានការយល់ព្រមជាលាយលក្ខណ៍អក្សរជាមុនពីយើងខ្ញុំ។
១២.៣ ក្នុងលក្ខខណ្ឌថាលោកអ្នកទទួលបានសិទ្ធិប្រើប្រាស់កម្មវិធីទូរសព្ទវីង លោកអ្នកត្រូវបានផ្តល់អាជ្ញាប័ណ្ណមានកំណត់ក្នុងការចូលទៅប្រើប្រាស់កម្មវិធីទូរសព្ទវីង និងដើម្បីទាញយក ឬបោះពុម្ពច្បាប់ចម្លងនៃផ្នែកណាមួយនៃមាតិកាដែលលោកអ្នកមានសិទ្ធិចូលប្រើប្រាស់ សម្រាប់តែការប្រើប្រាស់ផ្ទាល់ខ្លួន និងមិនមែនជាការប្រើប្រាស់លក្ខណៈពាណិជ្ជកម្ម។
ប្រការ ១៣៖ ការកម្រិតការទទួលខុសត្រូវ
គ្មានព្រឹត្តិការណ៍ណាមួយដែលយើងខ្ញុំ អភិបាល និយោជិត ឬភ្នាក់ងាររបស់វីង ត្រូវទទួលខុសត្រូវចំពោះលោកអ្នក ឬតតិយជនណាមួយ ចំពោះរាល់ការខូចខាត ឬសំណង ដោយផ្ទាល់ ឬដោយប្រយោល ដោយព្រមាន ជាយថាហេតុ ពិសេស ឬការដាក់ទណ្ឌកម្មផ្ទាល់ រួមបញ្ចូលតែកម្រិតត្រឹម ការខាតបង់ប្រាក់ចំណេញ ការខាតបង់ប្រាក់ចំណូល ការបាត់បង់ទិន្នន័យ ឬការខូចខាតផ្សេងទៀតដែលកើតឡើងទាក់ទងនឹងការប្រើប្រាស់កម្មវិធីទូរសព្ទវីង ទោះបីជាយើងខ្ញុំទទួលបានការណែនាំអំពីលទ្ធភាពនៃការខូចខាតណាមួយក៏ដោយ។ ទោះបីជាមានប្រការផ្សេងចែងផ្ទុយពីប្រការនេះ ការទទួលខុសត្រូវរបស់យើងចំពោះលោកអ្នក គ្រប់ពេលទាំងអស់ និងគ្រប់ករណីទាំងអស់ សម្រាប់រាល់ហេតុការណ៍ និងទោះបីជាក្រោមសកម្មភាពណាក៏ដោយ គឺត្រូវកំណត់ត្រឹមថ្លៃសេវាដែលយើងបានគិតពីលោកអ្នក។
ប្រការ ១៤៖ ការកែប្រែ និងការបង្អាក់
១៤.១ យើងខ្ញុំរក្សាសិទ្ធិក្នុងការផ្លាស់ប្តូរ កែប្រែ ឬលុបចេញនូវមាតិកាពីកម្មវិធីទូរសព្ទវីងនាពេលណាមួយ ឬដោយមូលហេតុណាមួយ តាមការឆន្ទានុសិទ្ធិរបស់យើងខ្ញុំ ដោយពុំបាច់ជូនដំណឹងជាមុន។ ទោះបីជាយ៉ាងណាក៏ដោយ យើងពុំមានកាតព្វកិច្ចធ្វើបច្ចុប្បន្នភាពព័ត៌មានណាមួយនៅលើកម្មវិធីទូរសព្ទវីងឡើយ។ យើងខ្ញុំក៏រក្សាសិទ្ធិក្នុងការកែប្រែ ឬបញ្ឈប់កម្មវិធីទូរសព្ទវីងទាំងស្រុង ឬមួយផ្នែក នាពេលណាមួយ ដោយមិនចាំបាច់ជូនដំណឹង។
១៤.២ យើងខ្ញុំមិនទទួលខុសត្រូវចំពោះលោកអ្នក ឬតតិយជនណាមួយនូវរាល់ការកែប្រែ ការផ្លាស់ប្តូរតម្លៃ ការផ្អាក ឬការបញ្ឈប់កម្មវិធីទូរសព្ទវីងឡើយ។
១៤.៣ យើងខ្ញុំមិនធានាថាកម្មវិធីទូរសព្ទវីង អាចប្រើប្រាស់បាននៅគ្រប់ពេលវេលាឡើយ។ កម្មវិធីរបស់យើងខ្ញុំ អាចជួបបញ្ហាផ្នែកហាដវែរ សូហ្វវែរ ឬបញ្ហាផ្សេងទៀត ឬត្រូវការការថែទាំទាក់ទងនឹងកម្មវិធីទូរសព្ទវីង ដែលនាំឲ្យមានការបង្អាក់ ពន្យារពេល ឬកំហុសនានា។ យើងខ្ញុំរក្សាសិទ្ធិក្នុងការផ្លាស់ប្តូរ កែប្រែ ធ្វើបច្ចុប្បន្នភាព ផ្អាក បញ្ឈប់ ឬកែប្រែកម្មវិធីទូរសព្ទវីង នាពេលណាមួយ ឬដោយហេតុផលណាមួយ ដោយមិនចាំបាច់ជូនដំណឹងដល់លោកអ្នក។
១៤.៤ ពីពេលមួយទៅពេលមួយ ធនាគារអាចតម្រូវឲ្យលោកអ្នកធ្វើបច្ចុប្បន្នភាពកម្មវិធីទូរសព្ទវីងទៅជាទម្រង់ចុងក្រោយបង្អស់ដើម្បីរក្សាសុវត្ថិភាព និងភាពសមស្រប។ លោកអ្នកមិនអាចបន្តប្រើប្រាស់ទម្រង់ចាស់នៃកម្មវិធីទូរសព្ទវីងបានទេ លុះត្រាតែលោកអ្នកធ្វើបច្ចុប្បន្នភាពទៅជាទម្រ់ចុងក្រោយបង្អស់។
១៤.៥ លោកអ្នកយល់ព្រមថា យើងខ្ញុំនឹងមិនទទួលខុសត្រូវអ្វីទាំងអស់ចំពោះការខាតបង់ ការខូចខាត ឬការរអាក់រអួលណាមួយ ដែលលោកអ្នកមិនអាចចូល ឬប្រើប្រាស់កម្មវិធីទូរសព្ទវីង ក្នុងអំឡុងពេលដែលប្រព័ន្ធនៃកម្មវិធីទូរសព្ទវីងមានភាពរអាក់រអួល ឬមិនដំណើរការ។ គ្មានប្រការណាមួយនៅក្នុងកិច្ចព្រមព្រៀងអតិថិជនស្តីពីកម្មវិធីទូរសព្ទវីងនេះត្រូវបានបកស្រាយថា យើងខ្ញុំមានកាតព្វកិច្ចក្នុងការថែទាំ និងទ្រទ្រង់កម្មវិធីទូរសព្ទវីង ឬផ្តល់ការកែតម្រូវការធ្វើបច្ចុប្បន្នភាព ឬការចេញផ្សាយណាមួយទាក់ទងនឹងកម្មវិធីទូរសព្ទវីងនោះឡើយ។
អត្រាប្ដូរប្រាក់
ជំនួយភ្លាមៗ
