ធនាគារ វីង ក្លាយជាដៃគូធនាគារផ្តាច់មុខរបស់សមាគមសណ្ឋាគារកម្ពុជា

វិស័យសណ្ឋាគារនៅកម្ពុជាកំពុងបន្តវិវឌ្ឍខ្លួនជាលំដាប់ ស្របពេលដែលកំណើនភ្ញៀវទេសចរអន្តរជាតិចាប់ផ្តើមវិលទៅរកភាពល្អប្រសើរឡើងវិញ។ ក្នុងបរិបទដ៏មានសក្តានុពលនេះ ម្ចាស់អាជីវកម្មតែងតែព្យាយាមរក្សាតុល្យភាពរវាងការគ្រប់គ្រងប្រតិបត្តិការប្រចាំថ្ងៃ និងការជំរុញកំណើនអាជីវកម្មក្នុងរយៈពេលវែង។

សព្វថ្ងៃនេះ ភាពជោគជ័យនៃអាជីវកម្មមួយមិនមែនវាស់វែងត្រឹមតែការពង្រីកខ្លួនប៉ុណ្ណោះទេ ប៉ុន្តែក៏អាស្រ័យទៅលើភាពរលូននៃប្រតិបត្តិការ ការជួយជ្រោមជ្រែងដល់បុគ្គលិក ភាពងាយស្រួលនៃលំហូរសាច់ប្រាក់ និងការសម្រេចចិត្តប្រកបដោយភាពច្បាស់លាស់ និងទំនុកចិត្តផងដែរ។

ដោយមើលឃើញពីទិសដៅនេះ ធនាគារ វីង និងសមាគមសណ្ឋាគារកម្ពុជា (CHA) បានសម្រេចចុះអនុស្សរណៈនៃការយោគយល់គ្នា (MOU) ដើម្បីនាំយកបទពិសោធន៍ហិរញ្ញវត្ថុដ៏ទំនើប ដែលឆ្លើយតបចំតម្រូវការជាក់ស្តែងនៃប្រតិបត្តិការនៃវិស័យសណ្ឋាគារ។

តាមរយៈបណ្តាញសមាជិក CHA ជាង ១៤០ សណ្ឋាគារ និងបុគ្គលិករាប់ពាន់នាក់ ប្រតិបត្តិការប្រចាំថ្ងៃនឹងកាន់តែងាយស្រួល និងសមស្របជាងមុនទៅនឹងរបៀបដំណើរការជាក់ស្តែងរបស់អាជីវកម្មសណ្ឋាគារ។ ចាប់ពីការបើកប្រាក់បៀវត្ស រហូតដល់ការគ្រប់គ្រងចំណាយប្រចាំថ្ងៃ ដំណើរការហិរញ្ញវត្ថុនឹងអាចប្រព្រឹត្តទៅដោយរលូន និងអាចទុកចិត្តបាន  ជាមួយដំណោះស្រាយធនាគារ វីង ដែលផ្តល់ជូននូវសេវាកម្មកម្រិតស្តង់ដាអន្តរជាតិ ហើយជួយឱ្យប្រតិបត្តិករសណ្ឋាគារអាចផ្តោតលើការអភិវឌ្ឍអាជីវកម្មរបស់ខ្លួនទាំងស្រុង។

មិនត្រឹមតែប៉ុណ្ណោះ ម្ចាស់សណ្ឋាគារអាចធ្វើប្រតិបត្តិការប្រកបដោយភាពបត់បែន និងជឿជាក់ជាងមុន ជាមួយជម្រើសកម្ចីអាជីវកម្មដែលមិនត្រូវការទ្រព្យធានារហូតដល់ ២០ម៉ឺនដុល្លារអាមេរិក ដើម្បីជួយសម្រួលដល់លំហូរសាច់ប្រាក់ ការកែលម្អហេដ្ឋារចនាសម្ព័ន្ធ និងការពង្រីកអាជីវកម្មនាពេលអនាគត។ បន្ថែមពីនេះ សេវាបើកប្រាក់បៀវត្ស និងសេវាធនាគារឌីជីថលដ៏ទំនើប នឹងជួយកាត់បន្ថយភាពស្មុគស្មាញ ហើយអនុញ្ញាតឱ្យបុគ្គលិកអាចផ្តោតអារម្មណ៍ពេញលេញលើការបម្រើសេវាកម្មដ៏ល្អឯកជូនដល់ភ្ញៀវ។ សម្រាប់បុគ្គលិក ពួកគេនឹងទទួលបានភាពងាយស្រួលក្នុងការប្រើប្រាស់សេវាហិរញ្ញវត្ថុ ដូចជាការបើកប្រាក់ខែបានទាន់ពេលវេលា និងការចាត់ចែងចំណាយផ្ទាល់ខ្លួន ដែលផ្តល់នូវស្ថិរភាពសំដៅលើកកម្ពស់ជីវភាពរស់នៅប្រចាំថ្ងៃ​ឱ្យកាន់ប្រសើរ។

លោក សុខ ឡេង នាយកសេវាបើកប្រាក់បៀវត្ស និងធនាគារសាជីវកម្ម នៃធនាគារ វីង បានលើកឡើងថា៖ “កិច្ចសហប្រតិបត្តិការនេះកើតឡើងនៅពេលវេលាដ៏សំខាន់មួយ។ វាមិនមែនគ្រាន់តែជាការផ្តល់ជូនផលិតផលហិរញ្ញវត្ថុប៉ុណ្ណោះទេ ប៉ុន្តែជាការឆ្លើយតបទៅនឹងតម្រូវការជាក់ស្តែងនៅក្នុងវិស័យសណ្ឋាគារ។ ភាពជាដៃគូនេះ នឹងជួយម្ចាស់សណ្ឋាគារឱ្យទទួលបានប្រព័ន្ធទូទាត់ឌីជីថលដ៏ទំនើប ជម្រើសហិរញ្ញប្បទានដែលអាចបត់បែនបាន ព្រមទាំងមានឱកាសក្នុងការទាក់ទាញភ្ញៀវទេសចរ និងលើកកម្ពស់ស្តង់ដាសេវាកម្មរបស់ពួកគេឱ្យកាន់តែប្រសើរ។ លើសពីនេះ វាក៏ផ្តល់នូវភាពងាយស្រួលដល់អាជីវកម្ម ក្នុងការរៀបចំផែនការអនាគតទុកជាមុន មិនថាក្នុងគោលបំណងពង្រីកសាខា កែលម្អសណ្ឋាគារ ឬការបង្កើនបទពិសោធន៍ថ្មីៗជូនអតិថិជននោះឡើយ។”

ឧកញ៉ា ហ៊ី សុធា ប្រធានសមាគមសណ្ឋាគារកម្ពុជា បានបន្ថែមថា៖ “ស្របពេលដែលវិស័យនេះកំពុងបន្តរីកចម្រើន ប្រព័ន្ធគាំទ្រដ៏រឹងមាំនៅតែជាតម្រូវការចាំបាច់សម្រាប់សមាជិករបស់យើង។” 

ស្របពេលដែលវិស័យបដិសណ្ឋារកិច្ចកម្ពុជាបន្តរីកចម្រើន សមាគមនៅតែរក្សាគោលជំហរ ក្នុងការរួមចំណែកបង្កើតបរិយាកាសមួយដែលអាជីវកម្មអាចដំណើរការទៅមុខបានរលូន និងប្រកបដោយទំនុកចិត្ត ដោយមានការគាំទ្រពីដំណោះស្រាយហិរញ្ញវត្ថុដែលត្រូវបានរៀបចំឡើងស្របតាមតម្រូវការរបស់ប្រតិបត្តិករក្នុងវិស័យនេះ។

សមាជិក CHA អាចទំនាក់ទំនងជាមួយធនាគារ វីង ដើម្បីស្វែងយល់បន្ថែមពីដំណោះស្រាយហិរញ្ញវត្ថុទាំងនេះ ដោយគ្រាន់តែអញ្ជើញទៅកាន់សាខាណាមួយរបស់ធនាគារ វីង ដែលនៅជិតបំផុត។ លោកអ្នកក៏អាចចូលទៅកាន់គេហទំព័រផ្លូវការធនាគារ វីង wingbank.com.kh ទំព័រហ្វេសប៊ុក @WingBankKH ឬទូរសព្ទមកលេខ 023 999 989។ លោកអ្នកក៏អាចទុកព័ត៌មានទំនាក់ទំនង ដើម្បីឱ្យក្រុមការងារយើងខ្ញុំទាក់ទងត្រឡប់ទៅវិញបានភ្លាមៗ។