អត្រាប្ដូរប្រាក់
ជំនួយភ្លាមៗ
English
ក្បួនរថយន្តដឹកជំនួយចំនួន ១១ គ្រឿង ផ្ទុកដោយស្បៀងអាហារ និងសម្ភារៈប្រើប្រាស់ចាំបាច់ បានចេញដំណើរពីអគារធនាគារវីងថៅវើ ក្នុងរាជធានីភ្នំពេញ ឆ្ពោះទៅកាន់ខេត្តកោះកុង និងខេត្តពោធិ៍សាត់ ដើម្បីនាំយកអំណោយសប្បុរសធម៌ជូនដល់គ្រួសារដែលត្រូវបានផ្លាស់ទីលំនៅ ដោយសារជម្លោះព្រំដែននាពេលថ្មីៗនេះ។
រថយន្តទាំងនេះមានផ្ទុកនូវអង្ករចំនួន ៣០ តោន មីចំនួន ២.០០០ កេស ព្រមទាំងកញ្ចប់ចំនួន៣.០០០ ដោយកញ្ចប់នីមួយៗមាននូវមុង ភួយ កន្ទេល ក្រមា និងសារ៉ុង ហើយបន្ថែមពីនេះក៏មាននូវរបស់របរប្រើប្រាស់ចាំបាច់ផ្សេងៗទៀតសម្រាប់តម្រូវការប្រចាំថ្ងៃ។
លោក ហោ ប៊ុនថែ អគ្គនាយករងធនាគារ វីង បានមានប្រសាសន៍ថា៖ «ខ្ញុំសូមថ្លែងអំណរគុណយ៉ាងជ្រាលជ្រៅចំពោះសប្បុរសជននានា ដែលបានបង្ហាញនូវក្ដីស្រឡាញ់ និងការយកចិត្តទុកដាក់ ដល់ប្រជាជនដែលកំពុងខ្វះខាត។ រាល់ការចូលរួមបរិច្ចាគ មិនថាស្ថិតក្នុងរូបភាពណាក៏ដោយ គឺពិតជាមានតម្លៃមិនអាចកាត់ថ្លៃបានសម្រាប់ក្រុមគ្រួសារដែលកំពុងភៀសសឹក។ យើងប្រឹងប្រែងដើម្បីខ្មែរ យើងមិនបោះបង់ចោលគ្នានោះឡើយ។»
គំនិតផ្ដួចផ្ដើមនេះ ត្រូវបានដឹកនាំដោយ អ្នកឧកញ៉ា គិត ម៉េង ប្រធានក្រុមប្រឹក្សាភិបាលនៃធនាគារ វីង និងជាអគ្គនាយកប្រតិបត្តិក្រុមហ៊ុន រ៉ូយ៉ាល់គ្រុប ព្រមទាំង លោកជំទាវ អ្នកឧកញ៉ា ម៉ៅ ចំណាន អនុប្រធានក្រុមប្រឹក្សាភិបាលក្រុមហ៊ុន រ៉ូយ៉ាល់គ្រុប និងជាប្រធានសមាគមសិល្បករខ្មែរ។
ក្នុងរយៈពេលប៉ុន្មានថ្ងៃចុងក្រោយនេះ បុគ្គលិកនៃធនាគារ វីង ក្រុមហ៊ុន រ៉ូយ៉ាល់គ្រុប និងក្រុមហ៊ុនបុត្រសម្ព័ន្ធ ព្រមទាំងសមាជិកនៃសមាគមសិល្បករខ្មែរ បានរួមគ្នាយ៉ាងសកម្មក្នុងការកៀរគរថវិកា និងរៀបចំជំនួយសប្បុរសធម៌ដាក់ក្នុងរថយន្ត ដើម្បីធានានូវការដឹកជញ្ជូនឱ្យបានទាន់ពេលវេលាដល់ដៃប្រជាជនដែលកំពុងខ្វះខាត ។ ទន្ទឹមនឹងនេះ បុគ្គលិកធនាគារ វីង ក៏បានបង្ហាញនូវស្មារតីសាមគ្គីភាពយ៉ាងមោះមុត តាមរយៈការបរិច្ចាគប្រាក់បៀវត្សរ៍ចំនួន ៥% ដែលនេះគឺជាការរួមចំណែកលើកទី៣ បន្ទាប់ពីជម្លោះព្រំដែនបានផ្ទុះឡើងនៅពាក់កណ្ដាលឆ្នាំ ២០២៥។ ការបរិច្ចាគប្រាក់បៀវត្សរ៍លើកទី១ ត្រូវបានធ្វើឡើងកាលពីខែមិថុនា ហើយការបរិច្ចាគប្រាក់បៀវត្សរ៍លើកទី២ ត្រូវបានធ្វើឡើងក្នុងខែសីហា។
ធនាគារ វីង ក្រុមហ៊ុន រ៉ូយ៉ាល់គ្រុប និងក្រុមហ៊ុនបុត្រសម្ព័ន្ធ ព្រមទាំងសមាគមសិល្បករខ្មែរ នឹងបន្តចែកជូននូវជំនួយសប្បុរសធម៌របស់ខ្លួនបន្ថែមទៀតនាពេលឆាប់ៗនេះ។ ទន្ទឹមនឹងនេះ មូលនិធិទ្រទ្រង់ជនភៀសសឹក នៅតែបន្តទទួលរាល់ការបរិច្ចាគពីសប្បុរសជនគ្រប់ទិសទីដើម្បីរួមគ្នាគាំទ្រដល់គ្រួសារជនភៀសសឹកនៅតាមបណ្ដោយព្រំដែន។ សប្បុរសជនអាចចូលរួមបរិច្ចាគបាននូវស្តង់ទទួលជំនួយក្បែរផ្សារបាយ័ន (ខាងលិចផ្សារធំថ្មី) នៅការិយាល័យកណ្ដាលក្រុមហ៊ុនសែលកាត (Cellcard) ឬតាមរយៈការស្កេន QR Code ពីគ្រប់អេបធនាគារទាំងអស់៕
ជំនួយ