ធនាគារ វីង និង អ៊ីស្ត គ្រុប ចុះ MOU ពង្រីកឱកាសលើសេវាធនាគារ ការទូទាត់ និងហិរញ្ញប្បទាន

រាជធានីភ្នំពេញ ថ្ងៃទី2 ខែវិច្ឆិកា ឆ្នាំ2026៖ ធនាគារ វីង (ខេមបូឌា) ម.ក និង ក្រុមហ៊ុន អ៊ីស្ត គ្រុប បានចុះអនុស្សរណៈយោគយល់គ្នា (MOU) ដើម្បីស្វែងរកឱកាសសហការលើសេវាធនាគារ ការទូទាត់ ហិរញ្ញប្បទាន និងការវិនិយោគ ក្នុងគោលបំណងជួយបង្កើនប្រសិទ្ធភាពប្រតិបត្តិការអាជីវកម្ម និងផ្តល់ភាពងាយស្រួលកាន់តែប្រសើរជូនអតិថិជន។ 

កិច្ចព្រមព្រៀងនេះបង្កើតជាក្របខណ្ឌសម្រាប់កិច្ចសហប្រតិបត្តិការលើវិស័យសំខាន់ៗជាច្រើន រួមមាន៖ ការប្រមូលការទូទាត់ពាក់ព័ន្ធនឹងអចលនទ្រព្យ សេវាធនាគារសម្រាប់បុគ្គលិក ការទទួលការទូទាត់ពីអាជីវករ ហិរញ្ញប្បទានសម្រាប់អ្នកទិញអចលនទ្រព្យ សញ្ញាបណ្ណសាជីវកម្ម ​ព្រមទាំងការពិនិត្យលើលទ្ធភាពក្នុងការវិនិយោគគម្រោងអាជីវកម្មរួមគ្នាផងដែរ។ 

លោកបណ្ឌិត ឌីមីត្រូ ខូលេកកូ អគ្គនាយកធនាគារ វីង បានលើកឡើងថា៖ “អាជីវកម្មអចលនទ្រព្យត្រូវគ្រប់គ្រងប្រតិបត្តិការជាច្រើនប្រភេទ ចាប់ពីប្រាក់កក់ និងការបង់រំលស់របស់អតិថិជន រហូតដល់ការប្រមូលថ្លៃជួល និងការបើកប្រាក់បៀវត្ស។ ភាពជាដៃគូនេះ ផ្តល់ឱកាសឱ្យយើងខ្ញុំអាចធ្វើឱ្យដំណើរការទាំងអស់នោះកាន់តែមានភាពងាយស្រួល និងមានប្រសិទ្ធភាពខ្ពស់។ អាទិភាពចម្បងរបស់យើង គឺប្រែក្លាយកិច្ចសហការនេះ ទៅជាសេវាកម្មជាក់ស្តែងដែលអាចគាំទ្រដល់ប្រតិបត្តិការរបស់ក្រុមហ៊ុន អ៊ីស្ត គ្រុប និងបង្កើតតម្លៃ ក៏ដូចជាអត្ថប្រយោជន៍កាន់តែច្រើនជូនអតិថិជន។” 

ចំណុចសំខាន់ៗនៃកិច្ចសហការនេះ គឺការផ្តល់ដំណោះស្រាយលើការទូទាត់ និងការប្រមូលប្រាក់សម្រាប់ការលក់អចលនទ្រព្យ ប្រាក់កក់ ការបង់រំលស់ ថ្លៃជួល និងថ្លៃថែទាំផ្សេងៗ។ ទាំងនេះ សុទ្ធសឹងតែជាការបង់ប្រាក់ដែលអតិថិជន និងអ្នកជួលតែងតែធ្វើជាប្រចាំ។ ស្ថាប័នទាំងពីរ នឹងស្វែងរកលទ្ធភាពក្នុងការប្រមូលប្រាក់ទាំងនេះតាមរយៈគណនីធនាគារ វីង ការស្កេន KHQR និងបណ្តាញឌីជីថលផ្សេងៗទៀត ដោយមានការគាំទ្រពីប្រព័ន្ធទូទាត់ស្វ័យប្រវត្តិ និងរបាយការណ៍ច្បាស់លាស់។ 

ភាពជាដៃគូនេះក៏នឹងស្វែងរកឱកាសពង្រីកការទទួលការទូទាត់តាមឌីជីថលសម្រាប់អ្នកជួល និងអាជីវករដែលប្រតិបត្តិការនៅក្នុងវិស័យអចលនទ្រព្យពាណិជ្ជកម្មរបស់ អ៊ីស្ត គ្រុប ផងដែរ។ កិច្ចសហការនេះអាចរួមមានសេវាប្រមូលការទូទាត់សម្រាប់អាជីវករ និងការតភ្ជាប់ប្រព័ន្ធទូទាត់ដែលសមស្រប។ 

ដើម្បីគាំទ្រអតិថិជនដែលមានបំណងទិញអចលនទ្រព្យ ធនាគារ វីង និង អ៊ីស្ត គ្រុប ក៏នឹងសិក្សារៀបចំកញ្ចប់កម្ចីគេហដ្ឋាន និងហិរញ្ញប្បទានអចលនទ្រព្យ ដែលមានអត្រាការប្រាក់ពិសេសសម្រាប់អតិថិជនដែលមានលក្ខណៈសម្បត្តិគ្រប់គ្រាន់។ ភាគីទាំងពីរ មានបំណងសម្របសម្រួលក្នុងការណែនាំអតិថិជន និងអភិវឌ្ឍដំណោះស្រាយហិរញ្ញប្បទានដែលស័ក្តិសមបំផុតសម្រាប់អ្នកទិញអចលនទ្រព្យ ដោយរាល់ការផ្តល់ឥណទាន គឺត្រូវឆ្លងកាត់ការវាយតម្លៃ និងការយល់ព្រមពីធនាគារ វីង ជាមុន។ 

តាមរយៈភាពជាដៃគូនេះ ភាគីទាំងពីរក៏នឹងស្វែងរកលទ្ធភាពក្នុងការកំណត់យកធនាគារ វីង ជាដៃគូធនាគារអាទិភាពសម្រាប់សេវាបើកប្រាក់បៀវត្ស ដោយគាំទ្រដល់ការផ្ទេរប្រាក់បៀវត្ស ការបើកគណនីជូនបុគ្គលិក និងការទទួលបានសេវាធនាគារដែលសមស្របនឹងតម្រូវការ។ 

លោកជំទាវ ចាន់ ដានី អនុប្រធានក្រុមប្រឹក្សាភិបាល និងជាអនុប្រធានប្រតិបត្តិសម្ព័ន្ធ អ៊ីស្ត គ្រុប បានមានប្រសាសន៍ថា៖ “ការចុះហត្ថលេខានៅថ្ងៃនេះ មិនមែនគ្រាន់តែជាការចាប់ផ្តើមនៃកិច្ចសហការប៉ុណ្ណោះទេ ប៉ុន្តែជាការបើកទំព័រថ្មីមួយដែលឈរលើទំនុកចិត្តរវាងគ្នា ដោយយើងនឹងរួមបញ្ចូលភាពខ្លាំងរបស់ស្ថាប័នទាំងពីរ ដើម្បីធ្វើឱ្យរាល់ការទូទាត់ពាក់ព័ន្ធនឹងអចលនទ្រព្យកាន់តែងាយស្រួល និងបង្កើតតម្លៃប្រកបដោយចីរភាពសម្រាប់អតិថិជនរបស់យើង។ តាមរយៈការរួមបញ្ចូលចក្ខុវិស័យរយៈពេលវែងរបស់ អ៊ីស្ត គ្រុប ជាមួយជំនាញរបស់ធនាគារ វីង លើវិស័យធនាគារ និងបច្ចេកវិទ្យាហិរញ្ញវត្ថុ យើងរំពឹងថានឹងអាចបើកឱកាសថ្មីៗសម្រាប់អតិថិជន ដៃគូអាជីវកម្ម និងសហគមន៍ដែលយើងបម្រើ។” 

បន្ថែមពីនេះ កិច្ចព្រមព្រៀងនេះ ក៏បានបើកផ្លូវក្នុងការសិក្សាពីលទ្ធភាពក្នុងការផ្តល់សិទ្ធដល់ធនាគារ វីង ជាភ្នាក់ងារលក់ ឬចែកចាយសញ្ញាបណ្ណសាជីវកម្ម ដែលបោះផ្សាយដោយ អ៊ីស្ត គ្រុប ឬក្រុមហ៊ុនបុត្រសម្ព័ន្ធរបស់ខ្លួនផងដែរ។ កិច្ចសហការនេះ អាចរួមបញ្ចូលទាំងការទូទាត់ថ្លៃទិញសញ្ញាបណ្ណ និងសេវាប្រមូលប្រាក់ពាក់ព័ន្ធផ្សេងៗ ដោយអនុលោមតាមលក្ខខណ្ឌតម្រូវ និងការយល់ព្រមជាផ្លូវការ។ 

ក្នុងដំណើរឆ្ពោះទៅមុខរួមគ្នា ធនាគារ វីង និង អ៊ីស្ត គ្រុប មានគោលដៅនាំយកសេវាធនាគារឱ្យកាន់តែខិតជិតនៅរាល់គ្រប់ដំណាក់កាលនៃការទិញអចលនទ្រព្យ ចាប់តាំងពីការកក់ប្រាក់លើកដំបូង រហូតដល់ការបង់ប្រចាំខែ និងហិរញ្ញប្បទាននាពេលអនាគត។ 

អតិថិជនរបស់ អ៊ីស្ត គ្រុប អាចត្រៀមខ្លួនសម្រាប់សេវាទូទាត់ និងហិរញ្ញប្បទានថ្មីៗទាំងនេះ ដោយគ្រាន់តែបើកគណនីធនាគារ វីង ថ្ងៃនេះ។ សូមអញ្ជើញមកកាន់សាខាធនាគារ វីង ណាមួយ ឬទូរសព្ទទៅលេខ 023 999 989 ដើម្បីសាកសួរពីការបើកគណនី ឬប្រឹក្សាពីកម្ចីគេហដ្ឋាន។ 

អំពី ធនាគារ វីង 

ធនាគារ វីង (ខេមបូឌា) ម.ក ជាធនាគារខ្មែរ100% និងបង្កើតឡើងសម្រាប់ប្រជាជនខ្មែរ ដោយផ្តល់ជូននូវសេវាកម្មហិរញ្ញវត្ថុដើម្បីជួយគាំទ្រដល់តម្រូវការប្រចាំថ្ងៃរបស់អតិថិជនទូទៅ និងអាជីវកម្មនានា។ ចាប់តាំងពីដំណើរអាជីវកម្មនៅក្នុងឆ្នាំ2008វីង បានពង្រីកលទ្ធភាពទទួលបានសេវាហិរញ្ញវត្ថុតាមរយៈបណ្តាញឌីជីថល សាខា និងភ្នាក់ងារដ៏ទូលំទូលាយរបស់ខ្លួន។ សេវាកម្មទាំងនោះរួមមានការដាក់ប្រាក់ កម្ចី ការផ្ទេរប្រាក់ក្នុង និងក្រៅប្រទេស ការទូទាត់ និងដំណោះស្រាយសេវាធនាគារសម្រាប់អាជីវកម្ម។ ធនាគារ វីង ប្តេជ្ញាជំរុញបរិយាបន្នហិរញ្ញវត្ថុ និងធ្វើឱ្យសេវាធនាគារកាន់តែមានភាពងាយស្រួលសម្រាប់ប្រជាជននៅទូទាំងប្រទេសកម្ពុជា។ 

ស្វែងយល់បន្ថែមនៅលើគេហទំព័ររបស់ធនាគារ វីង៖​ Wing Bank’s website ។ 

អំពី អ៊ីស្ត គ្រុប  

អ៊ីស្ត គ្រុប គឺជាសម្ព័ន្ធអាជីវកម្មពហុវិស័យ ដែលបាននិងកំពុងអភិវឌ្ឍ និងពង្រីកប្រតិបត្តិការរបស់ខ្លួនលើវិស័យស្នូលចំនួន 6 រួមមាន៖ អចលនទ្រព្យ ហិរញ្ញវត្ថុ កសិកម្ម បដិសណ្ឋារកិច្ច ឧស្សាហកម្ម (SEZ) និងពាណិជ្ជកម្ម (Trading)។ ស្ថិតក្នុងវិស័យអចលនទ្រព្យ អ៊ីស្ត គ្រុប ​ដែលផ្តោតលើការអភិវឌ្ឍលំនៅឋានប្រកបដោយគុណភាព ការរចនាដោយយកចិត្តទុកដាក់ និងមានតម្លៃសមរម្យ។ ដោយផ្អែកលើបទពិសោធន៍ និងជំនាញក្នុងវិស័យអភិវឌ្ឍអចលនទ្រព្យតាំងពីឆ្នាំ2000 យើងបន្តបំពេញតម្រូវការលំនៅឋានដែលកំពុងមានការកើនឡើងនៅកម្ពុជា ព្រមទាំងចូលរួមកសាងសហគមន៍រស់នៅប្រកបដោយភាពរស់រវើក។

ការអភិវឌ្ឍរបស់ អ៊ីស្ត គ្រុប ឈរលើគុណតម្លៃសំខាន់ៗ រួមមាន សុចរិតភាព ស្មារតីសហគ្រិនភាព គុណភាព ទំនួលខុសត្រូវ សេវាកម្ម និងការធ្វើការជាក្រុម ដោយមានការប្តេជ្ញាចិត្តចំពោះការអភិវឌ្ឍ និងកំណើនប្រកបដោយចីរភាព។ ក្រុមហ៊ុនប្រកាន់ខ្ជាប់នូវសុចរិតភាព ភាពជាសហគ្រិន គុណភាព ការទទួលខុសត្រូវ សេវាកម្ម និងការធ្វើការជាក្រុម ដោយមានការប្តេជ្ញាចិត្តចំពោះការអភិវឌ្ឍ និងកំណើនប្រកបដោយចីរភាព។ 

ស្វែងយល់បន្ថែមនៅលើគេហទំព័ររបស់ អ៊ីស្ត គ្រុប៖ East Group’s website។