ធនាគារ​ វីង  ដែលជាធនាគារឌីជីថល​រីកចម្រើនយ៉ាងឆាប់រហ័សមួយនៅកម្ពុជា ទទួលបានការអនុម័តជាផ្លូវការពីធនាគារជាតិ នៃកម្ពុជា ក្នុងការបន្ថែមដើមទុនចំនួន ៨៨​លានដុល្លារ​អាមេរិក។ ទុនដែលបន្ថែមនេះរួមមាន៖ ដើមទុនស្នូលចំនួន ៦០លានដុល្លារអាមេរិក និងដើមទុនថា្នក់ទី២​មានចំនួន២៨លានដុល្លារអាមេរិក ដែលការបន្ថែមដើមទុននេះបង្ហាញពីការប្តេជ្ញាចិត្តដ៏ត្រឹមត្រូវចំពោះការពង្រឹងស្ថិរភាពហិរញ្ញវត្ថុ និងជំរុញកំណើនអាជីវកម្មរបស់ខ្លួនឱ្យកាន់តែរឹងមាំថែមទៀត។ ការបន្ថែមទុននេះទៀតសោត ក៏នឹងអនុញ្ញាតដល់ធនាគារ វីង រួមចំណែកបម្រើសង្គមកាន់តែប្រសើរ តាមរយៈការពង្រីកវិសាលភាពផ្តល់កម្ចី ដែលនឹងជួយគាំទ្រសហគ្រាសធុនតូច និងមធ្យម សាជីវកម្មនានា និងអតិថិជនទូទៅ ដើម្បីជំរុញកំណើនលូតលាស់បានកាន់តែប្រសើរ។  

អ្នកឧកញ៉ា គិត ម៉េង ប្រធានក្រុមប្រឹក្សាភិបាលធនាគារ វីង និងជាអគ្គនាយកក្រុមហ៊ុន​រ៉ូយ៉ាល់គ្រុប  បានជំរុញនិងគាំទ្រយ៉ាងពេញទំហឹងក្នុងការសម្រេចចិត្តបន្ថែមទុននៅក្នុងធនាគារ វីង ដែលសបញ្ជាក់ឱ្យឃើញពីការជឿជាក់របស់អ្នកឧកញ៉ាលើភាពរីកចម្រើនប្រកបដោយចីរភាពរបស់ធនាគារ វីង និងសុទ្ធិដ្ឋិនិយមចំពោះទិដ្ឋភាពទូទៅនៃ​សេដ្ឋកិច្ចកម្ពុជា។  

អ្នកឧកញ៉ា គិត ម៉េង បានថ្លែងថា៖ “យើងខ្ញុំមានការជឿជាក់យ៉ាងមុតមាំថា ការបន្ថែមដើមទុននេះនឹងធ្វើឱ្យហិរញ្ញវត្ថុរបស់យើងកាន់តែរឹងមាំ និងក្លាយជាដៃគូផ្តល់សេវាកម្មហិរញ្ញវត្ថុគួរជាទី​ទុកចិត្ត និង​បានគិតគូរវែងឆ្ងាយ​ប្រកបដោយភាពច្នៃប្រឌិតដើម្បីជួយដល់​អតិថិជនទូទៅ និងម្ចាស់​អាជីវកម្មនានា។ កំណើនសេដ្ឋកិច្ច និងការគិត​ប្រកបដោយ​សុទ្ធិដ្ឋិនិយមចំពោះអនាគតកាល​ គឺជាកត្តាសំខាន់ក្នុងការសម្រេចចិត្តនេះ។”  

ស្របពេលដែលសេដ្ឋកិច្ចកម្ពុជាបន្តរីកចម្រើនយ៉ាងឆាប់រហ័ស ធនាគារ វីង នៅតែរក្សាការបេ្តជ្ញាចិត្តផ្តល់នូវដំណោះ​​ស្រាយហិរញ្ញវត្ថុដែល​ងាយស្រួលប្រើប្រាស់ ព្រមទាំង​ផ្តោត​លើ​អតិថិជន​ដើម្បី​ជួយ​បំពេញ​តម្រូវ​ការ​របស់​ប្រជាជន​ដែលកំ​ពុងមានការកើនឡើង។​  

ក្រៅ​ពីការជួយបង្កើនភាពធន់ផ្នែកហិរញ្ញវត្ថុរបស់ធនាគារ វីង ការបន្ថែមដើមទុននេះក៏នឹងផ្តល់ប្រយោជន៍ដោយផ្ទាល់ទៅដល់សហគមន៍មូលដ្ឋាន​ ដោយអនុញ្ញាតឱ្យធនាគារ វីង អាចពង្រីកសេវាកម្មហិរញ្ញវត្ថុរបស់ខ្លួនទៅកាន់តំបន់ដែល​ខ្វះខាត។ មិនថា​​អតិថិជនទូទៅ ឬក៏​ម្ចាស់​អាជីវកម្មជាច្រើននឹងមានលទ្ធភាព​វិនិយោគលើ​អនាគត​របស់​ពួកគេ ជាមួយនឹងភាពងាយស្រួល​ក្នុង​ការ​ប្រើប្រាស់សេវាឥណទាន សេវាហិរញ្ញវត្ថុ​បែបឌីជីថល និង​ប្រព័ន្ធ​ធនាគារ វីង ដែលនឹងជួយលើកកម្ពស់បរិយាប័ន្ន និងចំណេះដឹងហិរញ្ញវត្ថុបានកាន់តែប្រសើរជាបន្តបន្ទាប់។​  

អ្នកឧកញ៉ា គិត ម៉េង បានថ្លែងបន្ថែមទៀតថា៖ “ឆ្លៀតក្នុងឱកាសនេះ ខ្ញុំសូមថ្លែងអំណរគុណយ៉ាងជ្រាលជ្រៅចំពោះធនាគារ ជាតិ នៃកម្ពុជា  ជាពិសេសលោកជំទាវបណ្ឌិត​ ជា សិរី ដែលតែងតែយកចិត្តទុកដាក់ និងគាំទ្រក្នុងការលើកកម្ពស់បរិយាប័ន្នហិរញ្ញវត្ថុនៅក្នុងសហគមន៍របស់យើង។ ខ្ញុំក៏សូមថ្លែងអំណរគុណទៅដល់គ្រប់ភាគីពាក់ព័ន្ធទាំងអស់ដែលតែងតែជឿជាក់ការខិតខំប្រឹងប្រែងរបស់យើងខ្ញុំ  ព្រមទាំងសហការ​ជាមួយយើងខ្ញុំដើម្បី​បំពេញ​តម្រូវការរបស់​សហគមន៍ផងដែរ។”  

ភាពជោគជ័យ​ និងវឌ្ឍនភាព​របស់ធនាគារ វីង នៅក្នុងឆ្នាំ២០២៤ ដែលគួបផ្សំជាមួយនឹងការបន្ថែមទុនថ្មីនេះ បានគូសបញ្ជាក់ពីសុខភាពហិរញ្ញវត្ថុដ៏រឹងមាំ ការប្តេជ្ញាចិត្តចំពោះគំនិតច្នៃប្រឌិតថ្មីៗ និងភាពឈានមុខគេនៅក្នុងវិស័យហិរញ្ញវត្ថុ​ដ៏សកម្ម​របស់​ប្រទេសកម្ពុជា។  

សមិទ្ធផល និងកំណើនគួរឱ្យកត់សម្គាល់របស់ធនាគារ វីង ក្នុងឆ្នាំ២០២៤  

• សមិទ្ធផលដែលបានបំបែកកំណត់ត្រា៖ ធនាគារ វីង សម្រេចបានសមិទ្ធផលដ៏ជោគជ័យមិនធ្លាប់មាននៅក្នុងឆ្នាំ២០២៤​ ដោយប្រាក់បញ្ញើ និងទ្រព្យសកម្មបានកើនដល់​ជាង​២​ពាន់លានដុល្លារអាមេរិក។ កំណើនគួរឱ្យកត់សម្គាល់នេះបានឆ្លុះបញ្ចាំងពីយុទ្ធសាស្រ្តវិនិយោគដ៏ត្រឹមត្រូវរបស់ធនាគារ វីង និងជំហរដ៏រឹងមាំក្នុងនាមជាស្ថាប័នហិរញ្ញវត្ថុឈានមុខគេមួយនៅក្នុងប្រទេសកម្ពុជា ដោយសម្រេចបាន​​​   អត្រាកំណើនមិនធ្លាប់មាន ដែល​អាចបន្តសម្រេចលើសពីការរំពឹងទុក។  
• ការពង្រីកខ្លួននៅទូទាំងប្រទេសកម្ពុជា៖ ធនាគារ វីង បានបន្តពង្រីកខ្លួនយ៉ាងឆាប់រហ័សនៅទូទាំងប្រទេសកម្ពុជាដោយ​បាន​សម្ពោធសាខា​ថ្មីចំនួន​បី​បន្ថែមទៀតនៅ ខេត្តតាកែវ ខេត្ត​កំពង់ឆ្នាំង និង     ខេត្តពោធិ៍សាត់។ ជាមួយការបើក​បន្ថែមសាខាថ្មីទាំងនេះ បានធ្វើឱ្យធនាគារ វីង សព្វថ្ងៃះមានចំនួន ២៣ សាខានៅទូទាំងប្រទេស ដែលផ្តល់នូវ​ភាព​ងាយ​ស្រួល​ក្នុង​ការ​ទទួល​បាន​សេវាហិរញ្ញវត្ថុឈានមុខ​គេ​នៅតាម​សហគមន៍នានា​ទូទាំងប្រទេសកម្ពុជា។  
•  ការទទួលស្គាល់ តាមរយៈពានរង្វាន់ដ៏មានកិត្យានុភាព៖ សមិទ្ធផលឆ្នើមរបស់ធនាគារ វីង ត្រូវបាន អបអរសាទរជាមួយការនឹងផ្តល់នូវពានរង្វាន់ចំនួន៦ផ្សេងៗគ្នា ដែលជួយពង្រឹងជំហរធនាគារ វីង កាន់តែរឹងមាំក្នុងនាមជាស្ថាប័ននាំមុខគេនៅក្នុងវិស័យហិរញ្ញវត្ថុ។ ពានរង្វាន់ទាំងនោះរួមមាន៖ ពានរង្វាន់ Leadership in Debit Volume 2024, Leadership in Cross-Border Volume 2024 និងពានរង្វាន់ Innovation Breakthrough 2024 ដែលពានរង្វាន់ទាំងនេះត្រូវបានប្រគល់នៅក្នុងកម្មវិធីជួបជុំប្រចាំឆ្នាំរបស់ក្រុមហ៊ុនម៉ាស្ទ័រកាត។ បន្ថែមពីលើនេះ ថ្នាលឌីជីថល  Wingagri ដែលជាផ្នែកមួយនៅក្នុងប្រព័ន្ធអេកូឡូស៊ីធនាគារ វីង ក៏ត្រូវបានទទួលស្គាល់ជា “ស្ថាប័នឯកជនល្អបំផុតប្រចាំឆ្នាំ”  ពីកម្មវិធីពានរង្វាន់ឌីជីថលកម្ពុជាផងដែរ។ ការទទួលស្គាល់ចំពោះការប្តេជ្ញាចិត្តរបស់ខ្លួនសម្រាប់កម្មវិធីទំនួលខុសត្រូវសង្គម ធនាគារ វីង ក៏ទទួលបានកិត្តិយសផងដែរជាមួយនឹងពានរង្វាន់បរិយាប័ន្នឌីជីថល និងពានរង្វាន់លើកកម្ពស់ចំណេះដឹងហិរញ្ញវត្ថុពីកម្មវិធីពានរង្វាន់ទំនួលខុសត្រូវសង្គមឆ្នើមក្នុងឆ្នាំ២០២៤របស់សភាពាណិជ្ជកម្មអាមេរិកនៅកម្ពុជា។  
• ផលិតផល និងភាពច្នៃប្រឌិតសំខាន់ៗ៖ នៅក្នុងឆ្នាំ២០២៤ ធនាគារ វីង បានដាក់ចេញនូវផលិតផលធំៗ៣ ដែលផ្តល់នូវបទពិសោធន៍ថ្មីនៅក្នុងទីផ្សារហិរញ្ញវត្ថុកម្ពុជា។ ផលិតផលទាំងនោះរួមមាន៖ គណនីសន្សំដើម្បីគោលដៅ ដែលជួយឱ្យអតិថិជន​សម្រេចគោលដៅហិរញ្ញវត្ថុជាមួយផែនការសន្សំងាយស្រួលប្រើប្រាស់។ ការដាក់ឱ្យដំណើរការ​ជាផ្លូវការ ម៉ាស្ទ័រកាត​ វ័នកាត ដែលបញ្ចូលគ្នានូវភាព​ងាយស្រួល​នៃបណ្ណឥណទាន និងបណ្ណឥណពន្ធនៅក្នុងកាតតែមួយដំបូងគេនៅក្នុងប្រទេសកម្ពុជា។ បន្ថែមពីលើនេះ ធនាគារ វីង ក៏បានដាក់ឱ្យដំណើរការ វីសាអ៊ីនហ្វីនីត​ក្រេឌីតកាត ដោយផ្តល់ជូនយ៉ាងពិសេសសម្រាប់អតិថិជនមានចំណូលខ្ពស់ ដែលទាំងនេះបង្ហាញពីការប្តេជ្ញាចិត្តបន្ថែមទៀតរបស់ធនាគារ វីង ក្នុងការផ្តល់ដំណោះស្រាយហិរញ្ញវត្ថុប្រកបដោយភាពច្នៃប្រឌិតដោយផ្តោតលើតម្រូវការជាក់ស្តែងរ​បស់អតិថិជន។ 

សមិទ្ធផលគួរឱ្យកត់សម្គាល់ក្នុងឆ្នាំ ២០២៤ របស់ធនាគារ វីង បានគូសបញ្ជាក់ពីការប្តេជ្ញាចិត្តឥតងាករេចំពោះការនាំមកនូវភាពល្អប្រសើរ ការច្នៃប្រឌិត និងការពេញចិត្តរបស់អតិថិជន ដែលធ្វើឱ្យធនាគារ វីង ឆ្ពោះទៅមុខកាន់តែរឹងមាំក្នុងនាមជាគ្រឹះស្ថានហិរញ្ញវត្ថុឈានមុខគេនៅក្នុងប្រទេសកម្ពុជា៕