នៅឆ្នាំ២០២០ គឺជាឆ្នាំដែលយានដ្ឋាន សុគៀ អូតូ និងមីស្ទ័រឃ្លីន ខាឃែរ ​ចាប់កំណើតឡើង ពោលគឺក្នុងអំឡុងពេលនៃការរីករាលនៃជំងឺកូវីដ១៩។ លោក យឺន សុគៀដែលជាម្ចាស់យានដ្ឋាននេះ បានចាប់ផ្តើមអាជីវកម្មនេះ ​ក្រោមដើមទុនប្រមាណជាង១ម៉ឺន៥ពាន់ដុល្លារ ដោយជួលដីគេមួយកន្លែង ក្នុងក្រុងខេមរភូមិន្ទ ខេត្តកោះកុង ក្នុងមួយខែ៣០០ដុល្លារ។

មុនពេលចាប់ផ្តើមដំណើរការយានដ្ឋានជួសជុលយានយន្តនេះ លោកសុគៀ បានបម្រើការងារជាងជាងជួសជុលម៉ូតូ និង​ឡាននៅតាមបណ្តាយានដ្ឋានជាច្រើននៅរាជធានីភ្នំពេញ ​អស់រយៈពេលជាង១០ឆ្នាំ។

ជាកូនទី៣ ក្នុងចំណោមបងប្អូន៦នាក់ ​លោក យឺន សុគៀ បានចាប់ផ្តើមទៅរៀនជុសជួលម៉ូតូតាំងពីវ័យ១៤ឆ្នាំ ក្រោយមកលោកបានវិវត្តទៅធ្វើជាជាងជួសជុសឡាន។ បើទោះបីជាលោក បានរៀន និងបម្រើការងារនៅរាជធានីភ្នំពេញក្តី ប៉ុន្តែលោកបានសម្រេចចិត្តមកបើករបរនេះនៅក្នុងខេត្តកោះកុងដែលជាស្រុកកំណើតរបស់ខ្លួន។ ​

ក្នុងការ​បើកដំណើរការដំបូង យានដ្ឋានជួសជុលរថយន្ត របស់បុរសវ័យ៣៥ឆ្នាំរូបនេះ ជាលក្ខណៈយានដ្ឋានតូចមួយដែលអាចទទួលជួលជុសឡានបានត្រឹមតែពី១គ្រឿងទៅ៣គ្រឿង ក្នុងមួយថ្ងៃប៉ុណ្ណោះ ប៉ុន្តែបច្ចុប្បន្ននេះ យានដ្ឋាននេះមានលទ្ធភាពទទួលជុសជួលឡានបានចាប់ពី៥គ្រឿងឡើងទៅ បន្ទាប់ពីលោកទទួលបានកម្ចីពីធនាគារ​ដើម្បីពង្រីកលទ្ធភាពនៃការផ្តល់សេវាកម្ម។​

ភាពជោគជ័យ​នៃការពង្រីកយានដ្ឋាននេះ គឺមិនមែនកើតចេញ​ដោយភាព​ចៃ​ដន្យ​នោះទេ ប៉ុន្តែកើតចេញ​ពីការត្រៀមខ្លួន ​មានជំនាញច្បាស់លាស់ និងទំនុកចិត្តរបស់លោក ​រួមជាមួយនឹងការ​​សន្សំចំណេះម្តងបន្តិចៗ​​ ក្នុងអំឡុងពេលស៊ីឈ្នួលជាជាងឡាននៅតាមយានដ្ឋាននានា។ ​

លើសពីនេះ ​វាក៏រួមផ្សំនឹងការចេះគ្រប់គ្រងកម្ចីបានល្អ ​ពោលគឺការប្រើប្រាស់កម្ចីឱ្យមានប្រសិទ្ធិភាព និងប្រើប្រាស់ចំគោលដៅ។

មានបទពិសោធជាង១៥ឆ្នាំ ក្នុងវិស័យជួសជុលយានយន្ត បើទោះបីជាលោកជួបបញ្ហាប្រឈមមួយចំនួន​ និងមានដៃគូប្រជែងច្រើន ចាប់តាំងពីចាប់ផ្តើមបើកដំណើរការដំបូងមកទល់ពេលបច្ចុប្បន្នក៏ដោយ ប៉ុន្តែលោកមិនដែលចង់បោះបង់ចោលអាជីវកម្មនេះនោះទេ​ ហើយនៅពេលខាងមុខ លោកគ្រោងនឹងពង្រីកសាខាបន្ថែមទៀតផងដែរ។

លោក ហោ ប៊ុនថែ អគ្គនាយករងធនាគារ វីង បានលើកឡើងថា ធនាគារបានរួមចំណែកយ៉ាងសំខាន់ ក្នុងការផ្តល់កម្ចីដល់ម្ចាស់អាជីវកម្មទាំងខ្នាតតូចនឹងធំ ប្រើសម្រាប់ចាប់ផ្តើម និងពង្រីកអាជីវកម្ម។ ប៉ុន្តែយ៉ាងណាមិញ ក៏ទាមទារឱ្យពួកគាត់ប្រើប្រាស់កម្ចីដោយមានប្រសិទ្ធភាពផងដែរ។

លោកបានពន្យល់ថា ការប្រើប្រាស់កម្ចីដោយមានប្រសិទ្ធភាព និងចំគោលដៅ គឺមានសារៈសំខាន់ណាស់ ដើម្បីធ្វើឱ្យអាជីវកម្ម​កាន់តែរីកចម្រើន និងមានលទ្ធភាពពង្រីកកាន់តែធំជាងមុន។ ប៉ុន្តែការណ៍នេះ ម្ចាស់អាជីវកម្ម គួរតែ​រៀបចំផែនការអាជីវកម្ម និងហិរញ្ញវត្ថុឱ្យច្បាស់លាស់ បើមិនដូច្នេះទេ កម្ចីនោះអាចក្លាយទៅជាកម្ចីវ័ន្តករ។ ដូច្នេះហើយ​រាល់ការផ្តល់កម្ចីដល់ម្ចាស់អាជីវកម្មណាមួយ មន្រ្តីឥណទានរបស់ធនាគារវីង តែងតែធ្វើការចុះវាយតម្លៃដោយផ្ទាល់ និងផ្តល់ជាការប្រឹក្សាយោបល់ ដើម្បីជំរុញឱ្យម្ចាស់អាជីវកម្ម ប្រើប្រាស់កម្ចីដោយមានប្រសិទ្ធភាព និងចំគោលដៅ​។

សូមទស្សនា បទយកការណ៍ដូចតទៅ៖

អត្ថបទនេះត្រូវបានរាយការណ៍ដំបូងដោយ FreshNews ។ សូមអានរឿងពេញនៅទីនេះ