ធនាគារជាច្រើននៅកម្ពុជា បង្កើនការផ្តល់ហិរញ្ញប្បទានបៃតង ដើម្បីគាំទ្រដល់កំណើនចីរភាព

សមាគមធនាគារនៅកម្ពុជា (ABC) កំពុងខិតខំប្រឹងប្រែងយ៉ាងសកម្មក្នុងការគាំទ្រវិស័យហិរញ្ញវត្ថុរបស់ប្រទេសកម្ពុជា ដើម្បីធានាបាននូវកំណើនអភិវឌ្ឍយូរអង្វែង តាមរយៈគំនិតផ្តួចផ្តើមហិរញ្ញវត្ថុប្រកបដោយចីរភាពកម្ពុជា (CSFI) ដែលជាក្របខណ្ឌមួយជួយផ្សារភ្ជាប់ប្រតិបត្តិការក្នុងវិស័យធនាគារ ទៅនឹងយន្តការការពារបរិស្ថាន និងសង្គមជាតិ។

លោក សុខ ចាន់ ប្រធានផ្នែកបរិយាប័ន្នហិរញ្ញវត្ថុ និងទំនាក់ទំនងសាធារណៈ ABC បានលើកឡើងថា ការជំរុញហិរញ្ញប្បទានប្រកបដោយចីរភាពនៅកម្ពុជា កំពុងជួយដល់គ្រឹះស្ថានផ្តល់ឥណទាននានាក្នុងការគ្រប់គ្រងហានិភ័យ តែទោះជាយ៉ាងណាលោកថា បញ្ហាប្រឈមនៅតែមានក្នុងការជំរុញការពង្រីកឥណទានបៃតងនេះឱ្យបានទូលំទូលាយ។

គំនិតផ្តួចផ្តើម CSFI នេះ គឺជាលទ្ធផលនៃការខិតខំប្រឹងប្រែងរៀបចំយ៉ាងហ្មត់ចត់អស់រយៈពេល ២ ឆ្នាំ ក្រោមកិច្ចសហការរួមគ្នាដ៏ធំមួយដែលដឹកនាំដោយ ABC ព្រមទាំងទទួលបានការគាំទ្រយ៉ាងពេញទំហឹងពីធនាគារជាតិនៃ​ កម្ពុជា  និងក្រសួងបរិស្ថាន។

គំនិតផ្តួចផ្តើម CSFI ដែលត្រូវបានដាក់ឱ្យដំណើរការដោយ ABC ក្នុងឆ្នាំ ២០១៦ បានក្លាយជាគ្រឹះដ៏សំខាន់មួយសម្រាប់ការអនុវត្តគោលការណ៍​ហិរញ្ញវត្ថុ​ប្រកបដោយ​ចីរភាព​កម្ពុជា​ (CSFP)ក្នុងឆ្នាំ ២០១៩ ឱ្យកាន់តែរឹងមាំ ដែលជាក្របខណ្ឌស្ម័គ្រចិត្តមួយមាន ៩ គោលការណ៍ ដើម្បីណែនាំដល់គ្រឹះស្ថានធនាគារនានាឱ្យយកចិត្តទុកដាក់លើហានិភ័យលើក្របខណ្ឌ បរិស្ថាន សង្គម និងអភិបាលកិច្ច (ESG) មុននឹងសម្រេចចិត្តផ្តល់ឥណទាន និងធ្វើការវិនិយោគ។

លោក សុខ ចាន់ បានគូសបញ្ជាក់ថា ទោះបីជាបច្ចុប្បន្នមិនទាន់មានស្តង់ដា ESG ណាមួយត្រូវបានកំណត់ជាកាតព្វកិច្ចដាច់ខាតសម្រាប់ធនាគារទាំងអស់ក្តី ប៉ុន្តែធនាគារជាច្រើនបាននិងកំពុងរៀបចំក្របខណ្ឌ ESG ផ្ទៃក្នុងរបស់ខ្លួន ដែលស្របតាមស្តង់ដាអន្តរជាតិ ដោយប្រើប្រាស់គោលការណ៍ CSFP នេះជាយន្តការសម្រាប់គ្រប់គ្រងហានិភ័យ។

ចំណុចចម្បងនៃ CSFI គឺតម្រូវឱ្យធនាគារដែលចូលរួមត្រូវរក្សាតុល្យភាពរវាងកំណើនសេដ្ឋកិច្ច ជាមួយនឹងការគិតគូរលើការការពារបរិស្ថាន ព្រមទាំងបេតិកភណ្ឌវប្បធម៌របស់កម្ពុជាផងដែរ។ គ្រឹះស្ថានធនាគារមួយចំនួនបានប្តេជ្ញាចិត្តយ៉ាងសកម្មក្នុងការវាយតម្លៃ និងកាត់បន្ថយហានិភ័យ ទាក់ទងនឹងកត្តាដែលបណ្តាលឱ្យមានផលប៉ះពាល់ដល់បម្រែបម្រួលអាកាសធាតុ ការបំពុលបរិយាកាស និងការគ្រប់គ្រងសំណល់។

លោក សុ​ខ ចាន់ បានបន្ថែមថា៖ “ក្របខណ្ឌនេះជួយឱ្យធនាគារពង្រឹងការវាយតម្លៃហានិភ័យ និងអាចមើលឃើញជាមុនពីផលប៉ះពាល់ដែលអាចកើតមានដល់បរិស្ថាន និងសង្គម។ ការធ្វើបែបនេះ គឺជួយកាត់បន្ថយការពាក់ព័ន្ធជាមួយគម្រោងដែលមានហានិភ័យខ្ពស់ និងជួយគាំទ្រដល់ការបង្កើតផលិតផលហិរញ្ញវត្ថុបៃតង ដែលស្របតាមគោលដៅចីរភាពទាំងថ្នាក់ជាតិ និងសកលលោក។”

គំនិតផ្តួចផ្តើមនៃ CSFI គឺចង់ឱ្យវិស័យធនាគារនៅកម្ពុជា ក្លាយជាគំរូដ៏ល្អមួយសម្រាប់តំបន់ទន្លេមេគង្គ និងអាស៊ីអាគ្នេយ៍ ដែលនេះគឺជាសារមួយបង្ហាញដល់អ្នកវិនិយោគអន្តរជាតិ អំពីការប្តេជ្ញាចិត្តរបស់កម្ពុជាចំពោះការអនុវត្តល្អបំផុតស្របតាមស្តង់ដាសកល និងធានាបាននូវការអភិវឌ្ឍប្រកបដោយចីរភាព។ 

ឧបសគ្គនៃការផ្តល់ឥណទានបៃតង

ដ្បិតមានវឌ្ឍនភាពគួរឱ្យកត់សម្គាល់ក្តី ក៏នៅតែមានឧបសគ្គមួយចំនួនដែលកំពុងពន្យឺតកំណើននៃហិរញ្ញប្បទានបៃតងនេះដែរ។ ធនាគារភាគច្រើននៅតែជួបប្រទះនឹងការខ្វះខាតសមត្ថភាពបច្ចេកទេស ជាពិសេសក្នុងការវាយតម្លៃបច្ចេកវិទ្យាថ្មីៗ និងហានិភ័យពាក់ព័ន្ធនឹង ESG។ បន្ថែមពីនេះទៀត វាមិនទាន់មាននិយមន័យច្បាស់លាស់រួមណាមួយថាអ្វីទៅជា “ហិរញ្ញប្បទានបៃតង” នៅឡើយទេ ហើយទិន្នន័យ ESG ដែលអាចពឹងផ្អែកបានពីការប្រើប្រាស់របស់អតិថិជនក៏នៅមានកម្រិតនៅឡើយដែរ។

លោក សុខ ចាន់ បានលើកឡើងថា ការដាក់ឱ្យដំណើរការនូវប្រព័ន្ធវដ្តករសាស្ត្រហិរញ្ញវត្ថុប្រកបដោយចីរភាពកាលពីពេលថ្មីៗនេះដោយធនាគារជាតិនៃ កម្ពុជា គឺមានគោលបំណងដោះស្រាយបញ្ហានេះ តាមរយៈការផ្តល់នូវការធ្វើចំណាត់ថ្នាក់ឱ្យបានច្បាស់លាស់ជាងមុន និងធ្វើឱ្យការរាយការណ៍កាន់តែមានសង្គតិភាព។

តម្រូវការក៏ជាបញ្ហាមួយផ្សេងទៀតផងដែរ ដោយសារអាជីវកម្មជាច្រើននៅមិនទាន់មានការយល់ដឹងទូលំទូលាយពីហិរញ្ញប្បទានបៃតង ហើយគម្រោងបៃតងដែលមានសក្តានុពលអាចទទួលបានឥណទានពីធនាគារ ក៏នៅមានចំនួនតិចតួចនៅឡើយ។

លោកបានបន្ថែមថា៖ “ម្យ៉ាងវិញទៀត គម្រោងបៃតងអាចប្រឈមនឹងហានិភ័យខ្ពស់។ ហានិភ័យទាំងនោះរួមមាន ប្រាក់ចំណេញមិនទាន់ច្បាស់លាស់ ចន្លោះប្រហោងនៃការអនុវត្តបទប្បញ្ញត្តិ និងរយៈពេលសងត្រឡប់មានរយៈពេលវែង ដែលធ្វើឱ្យធនាគារកាន់តែមានការប្រុងប្រយ័ត្នខ្ពស់ បើធៀបទៅនឹងការផ្តល់ឥណទានធម្មតា។”

ការខ្វះខាតការលើកទឹកចិត្ត ក៏ជាផ្នែកមួយដែលរារាំងដល់កំណើននេះផងដែរ។ លោក សុខ ចាន់ បានគូសបញ្ជាក់ពីភាពចាំបាច់ដែលត្រូវមានការគាំទ្របន្ថែមពីរដ្ឋាភិបាល ដូចជាការលើកលែងពន្ធ ហិរញ្ញប្បទានសម្បទាន និងការធានាឥណទាន ដើម្បីធ្វើឱ្យគម្រោងបៃតងកាន់តែមានភាពទាក់ទាញខ្លាំងឡើង។ 

ប្រែក្លាយការប្តេជ្ញាចិត្ត ទៅជាសកម្មភាពអាចអនុវត្តបាន

សព្វថ្ងៃនេះ គ្រឹះស្ថានហិរញ្ញវត្ថុនានាកំពុងចាប់ផ្តើមប្រែក្លាយការប្តេជ្ញាចិត្តផ្នែកហិរញ្ញប្បទានបៃតងរបស់ខ្លួន ទៅជាដំណោះស្រាយដែលអាចអនុវត្តបាន។

ជាក់ស្តែង ធនាគារ វីង ក្រោមកិច្ចសហការជាមួយក្រសួងកសិកម្ម រុក្ខាប្រមាញ់ និងនេសាទ និងទទួលបានការគាំទ្រពីមូលនិធិបរិស្ថានសកល តាមរយៈមូលនិធិអន្តរជាតិសម្រាប់ការអភិវឌ្ឍកសិកម្ម បានដាក់ឱ្យដំណើរការនូវគំនិតផ្តួចផ្តើមហិរញ្ញប្បទានមួយ ដើម្បីជំរុញការប្រើប្រាស់បច្ចេកវិទ្យាធន់នឹងអាកាសធាតុ នៅក្នុងខ្សែច្រវាក់តម្លៃកសិកម្មកម្ពុជា ខណៈដែលការប្រែប្រួលអាកាសធាតុកំពុងគំរាមកំហែងដល់ផលិតភាពកាន់តែខ្លាំងឡើងពីមួយថ្ងៃទៅមួយថ្ងៃ។

គំនិតផ្តួចផ្តើមនេះផ្តល់ជូនឥណទានដោយមិនត្រូវការទ្រព្យធានារហូតដល់ ២០០.០០០ ដុល្លារអាមេរិក ជូនដល់កសិករ សហគមន៍កសិកម្ម និងអាជីវកម្មកសិកម្មនានា។ គម្រោងនេះកំពុងត្រូវបានអនុវត្តនៅក្នុងខេត្តគោលដៅចំនួន ៥ រួមមាន៖ ខេត្តព្រៃវែង តាកែវ កំពង់ធំ កំពង់ឆ្នាំង និងបាត់ដំបង ដោយផ្តល់ជូននូវហិរញ្ញប្បទានដែលងាយស្រួលទទួលបាន ជាមួយនឹងអត្រាការប្រាក់ប្រកួតប្រជែងបំផុត។

ធនាគារ វីង បានសម្រេចផ្តល់ឥណទានចំនួន ៣ លានដុល្លារអាមេរិក សម្រាប់ការគាំទ្រការអនុវត្តគម្រោងផ្តួចផ្តើមនេះ ជាមួយនឹងរយៈពេលសងត្រឡប់រហូតដល់ ៣៦ ខែ និងមិនមានគិតថ្លៃសេវាអនុម័តប្រាក់កម្ចីនោះឡើយ។

ហិរញ្ញប្បទាននេះជួយគាំទ្រដល់ការវិនិយោគលើបច្ចេកវិទ្យាធន់នឹងអាកាសធាតុ ដូចជា៖ ប្រព័ន្ធស្រោចស្រពឆ្លាតវៃ, ប្រព័ន្ធសម្ងួត និងស្តុកទុក, គំរូប្រព័ន្ធកសិកម្មចម្រុះ និងការប្រើប្រាស់ថាមពលកកើតឡើងវិញ។ បច្ចេកវិទ្យាទាំងអស់នេះ ត្រូវបានរំពឹងថានឹងជួយកាត់បន្ថយការចំណាយ បង្កើនផលិតភាព និងពង្រឹងសមត្ថភាពគ្រប់គ្រងក្រោយពេលប្រមូលផលរួច។

លោក សោម ធីសែន នាយកគ្រប់គ្រងសេវាធនាគារសាធារណៈនៃធនាគារ វីង បានលើកឡើងថា៖ “អនាគតរបស់កម្ពុជា គឺពឹងផ្អែកទៅលើការសម្របខ្លួនដ៏ឆាប់រហ័សរបស់យើងក្នុងការអនុវត្តកសិកម្មធន់នឹងអាកាសធាតុ និងហិរញ្ញប្បទានបៃតង។ តាមរយៈការពង្រីកលទ្ធភាពទទួលបានទុនសម្រាប់បច្ចេកវិទ្យាបៃតង យើងកំពុងជួយគាំទ្រលើកកម្ពស់ជីវភាពរស់នៅរបស់ដល់ប្រជាកសិករ ពង្រឹងសន្តិសុខស្បៀង ក៏ដូចជារួមចំណែកកសាងសេដ្ឋកិច្ចមួយដែលកាន់តែមានភាពរឹងមាំ។”

ដើម្បីគាំទ្រដល់ការអនុវត្តគំនិតផ្តួចផ្តើមនេះបានរលូន ធនាគារ វីង បានរៀបចំសិក្ខាសាលានៅទូទាំងខេត្តទាំង ៥ខេត្ត ខាងលើ កាលពីខែមីនា ឆ្នាំ២០២៦ កន្លងទៅ ដោយបានផ្តល់ការណែនាំពីរបៀបស្នើសុំឥណទាន និងការបណ្តុះបណ្តាលស្តីពីបច្ចេកទេសកសិកម្មឆ្លាតវៃសមស្របតាមអាកាសធាតុផងដែរ។ 

ការពង្រឹងកំណើនវិស័យហិរញ្ញវត្ថុ

កន្លងទៅថ្មីៗនេះ ធនាគារអភិវឌ្ឍន៍អាស៊ី (ADB) បានអនុម័តកញ្ចប់ឥណទានផ្អែកលើគោលនយោបាយចំនួន ៥០ លានដុល្លារអាមេរិក ដើម្បីជួយពង្រឹងវិស័យហិរញ្ញវត្ថុនៅកម្ពុជា។ កញ្ចប់ថវិកានេះ នឹងចូលរួមគាំទ្រយ៉ាងសំខាន់ដល់គ្រឹះស្ថានធនាគារ និងហិរញ្ញវត្ថុនានា ព្រមទាំងជួយលើកកម្ពស់ហេដ្ឋារចនាសម្ព័ន្ធហិរញ្ញវត្ថុឌីជីថល និងសមត្ថភាពផ្តល់ហិរញ្ញប្បទានប្រកបដោយចីរភាពផងដែរ។ ជាមួយគ្នានេះ គម្រោងតម្លៃ ៨២,៥ លានដុល្លារអាមេរិក ផ្សេងទៀត ដែលគាំទ្រដល់ការផ្លាស់ប្តូរទៅរកការប្រើប្រាស់ថាមពលស្អាត ក៏ទទួលបានការអនុម័តព្រមគ្នាផងដែរ។

លោក Anthony Gill នាយកស្តីទី ADB ប្រចាំប្រទេសកម្ពុជា បានលើកឡើងថា ដំណើរនៃការអភិវឌ្ឍរបស់ប្រទេសកម្ពុជា គឺផ្តោតយ៉ាងសំខាន់លើគោលដៅក្នុងការប្រែក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ ២០៥០។

លោកបានបញ្ជាក់ថា៖ “តាមរយៈការវិនិយោគនេះ ADB កំពុងជួយគាំទ្រកម្ពុជាក្នុងការពង្រឹងវិស័យហិរញ្ញវត្ថុរបស់ខ្លួន ដែលនឹងក្លាយជាគ្រឹះសម្រាប់កំណើនដ៏រឹងមាំ ពង្រីកកំណើនបរិយាបន្នហិរញ្ញវត្ថុ ក៏ដូចជាបង្កើនសក្តានុពលសម្រាប់វិស័យឯកជនផងដែរ។”

លោកបន្តទៀតថា៖ “តាមរយៈការជំរុញប្រព័ន្ធអេកូឡូស៊ីហិរញ្ញវត្ថុដែលរឹងមាំ និងប្រកបដោយបរិយាបន្ន យើងមានគោលបំណងផ្តល់ការគាំទ្រដល់អាជីវកម្ម ទាក់ទាញការវិនិយោគ និងប្រាកដថាវឌ្ឍនភាពដ៏ត្រចះត្រចង់នេះនឹងផ្តល់ប្រយោជន៍ដល់គ្រប់ស្រទាប់នៃសង្គមជាតិ។”

អ្នកស្រី កែវ ធីតា ស្ថាបនិកក្រុមហ៊ុន SOGE Solar បានលើកឡើងថា វិស័យធនាគារបានចាប់ផ្តើមទទួលស្គាល់ពីសារៈសំខាន់នៃគំនិតផ្តួចផ្តើមហិរញ្ញប្បទានបៃតងនេះហើយ។ ទោះបីជាក្រុមហ៊ុនរបស់អ្នកស្រី មិនទាន់បានស្នើសុំហិរញ្ញប្បទានបៃតងពីគ្រឹះស្ថានធនាគារនៅឡើយក្តី ប៉ុន្តែក្រុមហ៊ុនរ​បស់អ្នកស្រីធ្លាប់ទទួលបានមូលនិធិពីគម្រោងពាក់ព័ន្ធនឹងអាកាសធាតុ ដែលអាចចាត់ទុកថាជាទម្រង់មួយនៃហិរញ្ញប្បទានបៃតងផងដែរ។

អ្នកស្រីបានបន្តថា៖ “ថ្វីត្បិតតែខ្ញុំទទួលស្គាល់ពីសក្តានុពលនៃហិរញ្ញប្បទានបៃតងសម្រាប់អាជីវកម្មរបស់ខ្ញុំក៏ដោយ តែខ្ញុំមិនទាន់ត្រៀមខ្លួនរួចរាល់ក្នុងការស្នើសុំការគាំទ្រផ្នែកហិរញ្ញវត្ថុនេះនៅឡើយទេ។ យ៉ាងនេះក្តី ខ្ញុំពិតជាមានចំណាប់អារម្មណ៍ និងបើកចំហជានិច្ចសម្រាប់ឱកាសនានា នាពេលអនាគត។” 

អ្នកស្រីបានផ្តល់យោបល់ថា ការធ្វើឱ្យហិរញ្ញប្បទានបៃតងកាន់តែងាយស្រួលទទួលបាន ដូចជាការផ្តល់កម្ចីដែលមានអត្រាការប្រាក់ទាបជាង ៦% ក្នុងមួយឆ្នាំ និងមិនទាមទារទ្រព្យធានាច្រើន ដែលផ្តល់អត្ថប្រយោជន៍យ៉ាងធំធេងដល់អាជីវកម្ម សហគមន៍ និងសេដ្ឋកិច្ចជាតិទាំងមូល។

អ្នកស្រីបានគូសបញ្ជាក់ថា៖ “ការគាំទ្រផ្នែកហិរញ្ញវត្ថុបែបនេះ នឹងជួយពន្លឿនការអភិវឌ្ឍអាជីវកម្មបៃតង ផ្តល់ផលវិជ្ជមានដល់បរិស្ថាន និងចូលរួមចំណែកដល់កំណើនសេដ្ឋកិច្ចរយៈពេលវែង។”

កម្មវិធីហិរញ្ញប្បទានបៃតងនានា

លោក ខ្វៃ អាទិត្យា អ្នកនាំពាក្យក្រសួងបរិស្ថាន បានលើកឡើងថា ប្រទេសកម្ពុជាបានបង្កើត គោលនយោបាយជាតិស្តីពីការអភិវឌ្ឍបៃតង និងផែនការយុទ្ធសាស្ត្រជាតិស្តីពីការអភិវឌ្ឍបៃតង (២០១៣-២០៣០) ដើម្បីជំរុញកំណើនប្រកបដោយចីរភាព។ ក្របខណ្ឌទាំងនេះមានគោលបំណងបង្កើតឱកាសសម្រាប់អាជីវកម្មបៃតង ជំរុញសេដ្ឋកិច្ចបញ្ចេញកាបូនទាប និងលើកកម្ពស់សុខុមាលភាពសង្គមឱ្យកាន់តែប្រសើរ។

លោកបានកត់សម្គាល់ថា ការអភិវឌ្ឍសេដ្ឋកិច្ចបៃតងនេះ គឺស្របទៅនឹងយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា ហើយត្រូវបានតម្រង់ទិសដោយគោលនយោបាយជាតិ ក៏ដូចជាក្របខណ្ឌអន្តរជាតិផងដែរ។

លោក អាទិត្យា បានបន្តថា៖ “ក្រសួងបរិស្ថានបានដាក់ចេញនូវគោលនយោបាយដែលផ្តោតលើសសរស្តម្ភសំខាន់ៗចំនួន ៣ គឺ ភាពស្អាត ភាពបៃតង និងចីរភាព ដើម្បីធានាបាននូវនិរន្តរភាពបរិស្ថាន ដោះស្រាយបញ្ហាប្រែប្រួលអាកាសធាតុ និងជំរុញកំណើនសេដ្ឋកិច្ចបៃតង។ គោលដៅចម្បងរបស់យើងគឺចង់ប្រែក្លាយកម្ពុជា ឱ្យទៅជាប្រទេសដែលមានចំណូលខ្ពស់ និងមានអព្យាក្រឹតភាពកាបូននៅត្រឹមឆ្នាំ ២០៥០។”

កិច្ចការជាអាទិភាពសំខាន់ៗ រួមមាន ការពង្រីកថាមពលស្អាត និងការលើកកម្ពស់ការវិនិយោគបៃតង។ កម្ពុជាបានកាត់បន្ថយការពឹងផ្អែកលើធ្យូងថ្ម ហើយកំពុងបង្កើនការវិនិយោគលើការផលិតអគ្គិសនីពីឧស្ម័នធម្មជាតិរាវ (LNG) ជីវម៉ាស់ និងប្រភពថាមពលកកើតឡើងវិញ ដូចជាថាមពលពន្លឺព្រះអាទិត្យ និងវារីអគ្គិសនីជាដើម។

លោក អាទិត្យា បានបន្ថែមទៀតថា៖ “កម្មវិធីហិរញ្ញប្បទានបៃតងសម្រាប់គាំទ្រគម្រោងផ្សេងៗទៀតកំពុងត្រូវបានអនុវត្តជាបន្តបន្ទាប់។ នេះក៏មានការយកចិត្តទុកដាក់ខ្ពស់ផងដែរ លើវិស័យកសិកម្ម និងឧស្សាហកម្មបៃតង ការជំរុញការផលិតដែលមិនប៉ះពាល់ដល់បរិស្ថាន និងការពង្រឹងការគ្រប់គ្រងសំណល់ឱ្យកាន់តែប្រសើរ។”

លោក អាទិត្យា បានសង្កត់ធ្ងន់ថា ការអភិវឌ្ឍសេដ្ឋកិច្ចបៃតង គឺពិតជាមានសារៈសំខាន់ខ្លាំងណាស់ ក្នុងការទ្រទ្រង់កំណើនប្រទេសជាតិ ព្រមទាំងជួយធានាបាននូវការការពារបរិស្ថាន ការប្រើប្រាស់ធនធានប្រកបដោយប្រសិទ្ធភាព និងបរិយាបន្នសង្គមទៀតផង។

លោកបានថ្លែងថា៖ “ការអភិវឌ្ឍបៃតង គឺជួយឱ្យយើងរីកចម្រើនទៅមុខដោយការទទួលខុសត្រូវ ហើយមិនបន្សល់ទុកផលលំបាកដល់អ្នកជំនាន់ក្រោយនោះឡើយ។”

ក្របខណ្ឌហិរញ្ញប្បទានបៃតងរបស់ប្រទេសកម្ពុជា ត្រូវបានរៀបចំឡើងដើម្បីទាក់ទាញការវិនិយោគបញ្ចូលទៅក្នុងគម្រោងនានាដែលមានចីរភាពបរិស្ថាន ពង្រឹងភាពធន់នៃសេដ្ឋកិច្ច និងកាត់បន្ថយផលប៉ះពាល់ដល់បរិស្ថាន។ ធនាគារជាតិនៃ កម្ពុជា ក៏បានដាក់ចេញនូវវិធានការប្រព័ន្ធហិរញ្ញវត្ថុផងដែរ ដើម្បីបង្កើនតម្លាភាព ព្រមទាំងកាត់បន្ថយហានិភ័យនៃការក្លែងបន្លំជាសកម្មភាពបៃតង។

របៀបវារៈនៃការអភិវឌ្ឍបៃតងរបស់កម្ពុជា គឺផ្តោតជាសំខាន់ទៅលើកំណើនសេដ្ឋកិច្ចដែលបញ្ចេញកាបូនទាប ការប្រើប្រាស់ធនធានប្រកបដោយប្រសិទ្ធភាព និងការលើកកម្ពស់សមធម៌សង្គម។ ក្នុងន័យនេះហើយ ប្រទេសកម្ពុជាកំពុងបង្កើនការវិនិយោគយ៉ាងសកម្មលើវិស័យថាមពលស្អាត ជំរុញកសិកម្មបៃតង និងទេសចរណ៍ធម្មជាតិ ព្រមទាំងពង្រឹងយន្តការហិរញ្ញប្បទានប្រកបដោយចីរភាពឱ្យកាន់តែមានភាពរឹងមាំ ដើម្បីសម្រេចគោលដៅ អព្យាក្រឹតកាបូននៅត្រឹមឆ្នាំ ២០៥០។

ការរក្សាតុល្យភាពរវាងប្រាក់ចំណេញ និងចីរភាព

សមាគមធនាគារនៅកម្ពុជា ចាត់ទុកហិរញ្ញប្បទានបៃតងថា ជាឱកាសអាជីវកម្មដ៏មានសក្តានុពល ជាជាងឧបសគ្គរារាំង។

បច្ចុប្បន្ន ធនាគារនានាកំពុងពង្រីកប្រតិបត្តិការរបស់ខ្លួនចូលទៅក្នុងវិស័យសំខាន់ៗ ដូចជា ថាមពលកកើតឡើងវិញ ប្រសិទ្ធភាពថាមពល កសិកម្មប្រកបដោយចីរភាព និងសំណង់អគារបៃតង ដែលវិស័យទាំងនេះសុទ្ធសឹងតែមានសក្តានុពលខ្ពស់សម្រាប់ការផ្តល់ឥណទានរយៈពេលវែង។

ស្របពេលជាមួយគ្នានេះ ការរួមបញ្ចូលនូវក្របខណ្ឌ ESG ទៅក្នុងប្រតិបត្តិការគ្រឹះស្ថានធនាគារ ក៏បានជួយកាត់បន្ថយហានិភ័យហិរញ្ញវត្ថុយ៉ាងមានប្រសិទ្ធភាពផងដែរ ដែលក្នុងនោះរួមមាន ការខកខានមិនបានសងប្រាក់កម្ចី ការពិន័យផ្នែកផ្លូវច្បាប់ និងការខូចខាតកេរ្តិ៍ឈ្មោះស្ថាប័នជាដើម។

បន្ថែមពីនេះ សមាគមធនាគារនៅកម្ពុជា ក៏កំពុងសហការយ៉ាងជិតស្និទ្ធជាមួយដៃគូអន្តរជាតិធំៗ ដែលរួមមាន៖ សាជីវកម្មហិរញ្ញវត្ថុអន្តរជាតិ ធនាគារអភិវឌ្ឍន៍អាស៊ី និងវិទ្យាស្ថានកំណើនបៃតងសកល ដើម្បីបន្តពង្រឹងសមត្ថភាព និងអភិវឌ្ឍក្របខណ្ឌហិរញ្ញប្បទានប្រកបដោយចីរភាពនៅកម្ពុជាឱ្យកាន់តែមានភាពរឹងមាំ៕