ធនាគារ វីង និង អង្គការប៉ាសឺរ៉ែលនុយមេរិកកម្ពុជា សហការពង្រឹងជំនាញ និងបង្កើតឱកាសការងារសម្រាប់យុវជនកម្ពុជា

ធនាគារ វីង (ខេមបូឌា) ម.ក គឺជាធនាគារឌីជីថលដែលមានការរីកចម្រើនលឿនបំផុតមួយនៅកម្ពុជា និងអង្គការប៉ាសឺរ៉ែលនុយមេរិក កម្ពុជា (PNC) បានចុះហត្ថលេខាលើអនុស្សរណៈនៃការយោគយល់គ្នា (MoU) ដើម្បីរួមគ្នាបង្កើនសមត្ថភាពឌីជីថល និងបើកផ្លូវអាជីពក្នុងវិស័យបច្ចេកវិទ្យាសម្រាប់យុវជនកម្ពុជា។ 

លោក កាំង តាំង នាយកគ្រប់គ្រងការបណ្តុះបណ្តាល និងទំនាក់ទំនងបុគ្គលិកនៃធនាគារ វីង មានប្រសាសន៍ថា៖ «ខណៈបច្ចេកវិទ្យាដើរតួនាទីយ៉ាងសំខាន់ក្នុងការជំរុញអាជីវកម្មឱ្យរីកចម្រើន ធនធានមនុស្សដែលមានសមត្ថភាព គឺជាកត្តាចាំបាច់ក្នុងការអភិវឌ្ឍ និងប្រើប្រាស់បច្ចេកវិទ្យាឱ្យមានប្រសិទ្ធភាព។​កិច្ចសហការនេះនឹងជួយនិស្សិតយកចំណេះដឹងពីការសិក្សា​មកអនុវត្តនិងត្រៀមខ្លួនសម្រាប់ការចាប់ផ្តើមអាជីពនាពេលអនាគត»។ 

តាមរយៈកិច្ចព្រមព្រៀងនេះ និស្សិតរបស់អង្គការ PNC នឹងទទួលបានការបណ្តុះបណ្តាលបច្ចេកទេសដោយផ្ទាល់ពីអ្នកជំនាញ និងមានអាទិភាពក្នុងការចូលបម្រើការងារនៅធនាគារ វីង តាមរយៈឱកាសការងារសម្រាប់អ្នកមានទេពកោសល្យ។ ការផ្ដល់ឱកាសឱ្យយុវជនបានប្រឡូកក្នុងបរិយាកាសការងារជាក់ស្ដែងនេះ គឺជាគ្រឹះដ៏សំខាន់ក្នុងការរៀបចំខ្លួនពួកគេ ឱ្យក្លាយជាកម្លាំងពលកម្មដ៏មានសក្ដានុពលសម្រាប់សេដ្ឋកិច្ចឌីជីថល។ 

លោក ហង្ស ហ៊ីប៊ុនណា នាយកប្រចាំប្រទេសនៃអង្គការ PNC បានលើកឡើងថា៖ «យើងចង់ឃើញយុវជនយើងមិនត្រឹមតែជាអ្នកប្រើប្រាស់បច្ចេកវិទ្យាប៉ុណ្ណោះទេ ប៉ុន្តែគឺជាអ្នកដឹកនាំ និងអ្នកដោះស្រាយបញ្ហាតាមរយៈបច្ចេកវិទ្យាឌីជីថល។ ការរួមកម្លាំងជាមួយធនាគារ វីង នឹងជួយឱ្យពួកគេមានចក្ខុវិស័យវែងឆ្ងាយជាងមុន និងមានភាពជឿជាក់ក្នុងការបង្កើតសមិទ្ធផលថ្មីៗសម្រាប់សង្គមជាតិ។» 

ការវិនិយោគលើធនធានមនុស្ស គឺជាស្នូលនៃអាទិភាពរបស់ធនាគារ វីង ដែលត្រូវបានឆ្លុះបញ្ចាំងតាមរយៈកម្មវិធីអភិវឌ្ឍយុវជនជាច្រើន រួមមាន៖ កម្មវិធីអភិវឌ្ឍបុគ្គលិកកម្មសិក្សា កម្មវិធីអភិវឌ្ឍទេពកោសល្យបច្ចេកវិទ្យាវ័យក្មេង និងកម្មវិធីអភិវឌ្ឍអ្នកដឹកនាំជំនាន់ថ្មី។ ក្នុងនោះ កម្មវិធីអភិវឌ្ឍបុគ្គលិកកម្មសិក្សា សម្រេចបាននូវផ្លែផ្កាយ៉ាងត្រចះត្រចង់ ដោយបានគាំទ្រយុវជនសរុប 803 នាក់ ដែលក្នុងនោះ 296 នាក់បានបញ្ចប់កម្មវិធីដោយជោគជ័យ និង 214 នាក់ត្រូវបានជ្រើសរើសជាបុគ្គលិកផ្លូវការ ខណៈបច្ចុប្បន្នមានយុវជន 266 នាក់ទៀត កំពុងក្រេបជញ្ជក់បទពិសោធន៍ការងារជាក់ស្តែងនៅធនាគារ វីង។ 

ភាពជាដៃគូរវាងស្ថាប័នទាំងពីរ គឺជាសក្ខីភាពនៃការប្តេជ្ញាចិត្តរួម ក្នុងការគាំទ្រដល់យុទ្ធសាស្ត្ររបស់រាជរដ្ឋាភិបាលកម្ពុជា ដើម្បីកសាងសង្គមឌីជីថលប្រកបដោយបរិយាបន្ន តាមរយៈការបណ្ដុះបណ្ដាលធនធានមនុស្សឱ្យដើរទាន់ការវិវត្តនៃបច្ចេកវិទ្យា និងរួមចំណែកដល់កំណើនសេដ្ឋកិច្ចជាតិទាំងមូល។